កំពង់ឆ្នាំង៖រថយន្តកូរ៉េចំណុះ១តោនកន្លះ ដឹកពងទាមួយគ្រឿងបានបើកថយក្រោយ ជាន់កុមារាអាយុ១ឆ្នាំម្នាក់ស្លាប់យ៉ាងអណោចអាធម្មនៅកន្លែង។ ហេតុការណ៏ដ៏អកុសលនេះកើតឡើង នៅវេលាម៉ោង ១និង៥០នាទីរសៀលថ្ងៃទី ២០ ខែ មករា ឆ្នាំ២០១៥ នៅភូមិតាអត ឃុំពានី ស្រុកកំពង់ត្រឡាច ។
លោក ហ៊ុល វាសនា អធិការនគរបាល ស្រុកកំពង់ត្រឡាចបាននិយាយថាៈ កុមារារងគ្រោះមានឈ្មោះ ប៊ុន សួរ អាយុ១ឆ្នាំ មានឪពុកឈ្មោះ អ៊ីន វទ្ឋី អាយុ២៧ឆ្នាំ ម្តាយឈ្មោះ គាវ អាយុ២៤ឆ្នាំ ម្តាយ ជាអ្នករកស៊ីលក់ពងទាក្នុងភូមិ ។មុនពេលកើតហេតុ មានរថយន្តកូរ៉េមួយគ្រឿង ដែលជាម៉ូញរបស់ស្ត្រីជាម្តាយកុមាររងគ្រោះ បានបើករថយន្តដឹកពងទាយកមកដាក់អោយ ។
ក្រោយពេលជញ្ជូនពងទាចេញពីរថយន្តដាក់អោយរួចរាល់ ហើយ អ្នកបើកបររថយន្តបានបើករថយន្តថយក្រោយដើម្បីបត់ត្រឡប់ចេញទៅវិញ ប៉ុន្តែមិនបានប្រយ័ត្ន ខណៈពេលនោះកុមារារងគ្រោះបានដើមកពីក្រោយរថយន្តក៏បានជាន់ក្មេងនោះបណ្តាលអោយស្លាប់នៅកន្លែងកើតហេតុយ៉ាងតក់ស្លុតពីឪពុកម្តាយ និងអ្នកបានឃើញហេតុការណ៏ ។
លោកបានបន្តថាៈ ពេលកើតហេតុខណៈពេលសមត្ថកិច្ចមិនទាន់ទៅដល់ ជីតាកុមាររងគ្រោះ
បានព្រមសម្រុះសម្រួលទទួលយកសំណងពីរថយន្តបង្ករ តែមិនបានដឹងថាៈប៉ុន្មាននោះទេ ហើយក៏បាន អោយអ្នកបើករថយន្តនោះបើកចេញទៅវិញ។
ប៉ុន្តែក្រោយពីដំណឹងនេះបានដឹងដល់សមត្ថកិច្ច នគរបាល មូលដ្ឋាន និងរាយការណ៏មកលោក លោកក៏បានឆ្លងយោបល់លោកព្រះរាជអាជ្ញាអមសាលាដំបូង ខេត្តកំពង់ឆ្នាំង ហើយលោកក៏បានបញ្ជាអោយតាមចាប់ ទើបកម្លាំងសមត្ថកិច្ចទាក់ទងជាមួយនគរបាល ខេត្តកំពង់ស្ពឺ ហើយចាប់រថយន្តនោះបាននៅស្រុកឧត្តង្គខេត្តកំពង់ស្ពឺ ។
លោកបានបញ្ចាក់ថាៈ រថយន្តបង្ករនោះម៉ាកគា (ឡានកូរ៉េ )ពណ៏សពាក់ស្លាកលេខ ភ្នំពេញ2U. 5263 បើកបរដោយបុរសឈ្មោះ លី (តាលី) នៅផ្សារបាក់ដឹង ខេត្តកំពង់ស្ពឺ ។
រថយន្តនិងអ្នកបើកបរខាងលើត្រូវបាននគរបាលនាំយកមកកាន់ អធិការដ្ឋាននគរបាល ស្រុក
កំពង់ត្រឡាច ដើម្បីចាត់ការតាមនិតិវិធី ៕
