គ្រួសារជនរងគ្រោះដែលត្រូវជនសង្ស័យ មានគ្នា៦នាក់ បាញ់សម្លាប់នៅជិតវត្តទួលរាជាក្នុងឃុំពោធិបាន ស្រុកកោះធំ ខេត្តកណ្តាល កាលពីចុងខែកញ្ញាឆ្នាំ២០១៤កន្លងទៅ បានអំពាវនាវសាជាថ្មី ទៅដល់សមត្ថកិច្ចនិងតុលាការជួយរកយុត្តិធម៌ ជូនគ្រួសាររបស់ខ្លួនឲ្យបានឆាប់រហ័ស។ការអំពាវនាវធ្វើឡើង ស្របពេលដែលចៅក្រមសាលាដំបូងខេត្តកណ្តាល បានកោះហៅឪពុកជនរងគ្រោះ និងជនសង្ស័យ២នាក់ឲ្យចូលបំភ្លឺសាជាថ្មីនៅព្រឹកថ្ងៃទី២១ ខែមករា ឆ្នាំ២០១៥នេះ ។
ឪពុកជនរងគ្រោះឈ្មោះ ស៊ឹម យ៉ុង បានថ្លែងនៅមុខសាលាដំបូងនៅព្រឹកនេះឲ្យដឹងថា កាលពីរសៀលថ្ងៃទី២៣ ខែកញ្ញា ឆ្នាំ២០១៤ កន្លងទៅកូនប្រុសរបស់គាត់ឈ្មោះ យ៉ុង យ៉ាន អាយុ៣០ឆ្នាំត្រូវបានជនសង្ស័យ២នាក់ ដែលជាប្រជាការពារភូមិ បញ្ឆោតឲ្យចេញពីផ្ទះដោយប្រាប់ថាប្អូនឯងត្រូវគេវាយហើយ ឮដូច្នេះជនរងគ្រោះក៏បានរត់ចេញពីផ្ទះ សំដៅទៅកន្លែងរាំធុងបាសនៅក្នុងវត្តទួលរាជា
លុះពេលទៅដល់ក្បែរវត្តមិនដឹងថា ជនរងគ្រោះមានទំនាស់ពាក្យសំដីជាមួយប្រជាការពារភូមិដែលជាអ្នកប្រាប់ និងសមត្ថកិច្ចប៉ូលីសយ៉ាងម៉េចនោះទេ ទើបឈានដល់ការបាញ់សម្លាប់យ៉ាងសាវហាវបែបនេះ។ ហើយក្រោយពីបាញ់សម្លាប់ ជនសង្ស័យទាំង៦នាក់ដែលមានម្នាក់ជាអនុប៉ុស្ត៏ឃុំពោធិបាន ម្នាក់ទៀតជាមន្ត្រីប៉ុស្ត៏ និងគូនកន៤នាក់ទៀតបាននាំគ្នារត់គេចខ្លួនបានអស់។
ទើបតែពេលថ្មីៗគេឃើញជនសង្ស័យឈ្មោះ ឈួន សុភក្ត្រ័ ជាអនុប៉ុស្ត៏និង ឈ្មោះ រ៉ូ រ៉ានី ជាមន្ត្រីប៉ុស្ត៏វិលត្រឡប់មកផ្ទះវិញ ហើយក៏ត្រូវបានតុលាការហៅមកសាកសួរផងដែរ ប៉ុន្តែមិនដឹងថាយ៉ាងណានៅឡើយទេ ដោយចៅក្រមកាន់សំណុំរឿងខាងលើ បានអះអាងថានីតិវិធីស្ថិតក្នុងការស៊ើបអង្កេតនៅឡើយ។
លោក ហ៊ាង ស៊ីណា មេប៉ុស្ត៏ឃុំពោធិបានមិនអាចសុំការអត្ថាធិប្បាយបានទេ ដោយលោក អះអាងករណីនេះស្ថិតនៅលើដៃតុលាការ ផុតពីដៃលោកទៅហើយ។
យ៉ាងណាក៏ដោយ ក្រុមគ្រួសារជនរងគ្រោះបានអំពាវនាវដល់តុលាការ ឲ្យរកយុត្តិធម៌ជូនគ្រួសារគាត់ឲ្យបានឆាប់រហ័ស និងទាមទារសំណង៥ម៉ឺនដុល្លារ ជាថ្នូនឹងការបាត់បង់ជីវិតជនរងគ្រោះនោះ។
