ខេត្តរតនគិរីៈការរដ្ឋានបូមខ្សាច់ក្នុងស្រុកវើនសៃ ចំនួន៣កន្លែង ធ្វើអាជីវកម្មជាច្រើនឆ្នាំមកហើយ ត្រូវរដ្ឋលេខាធិការក្រសួង រ៉ែ និងថាមពល មានប្រសាសថា អាជីវកម្មអាណាធិបតេយ្យពុំមានអាជ្ញាប័ននោះទេ។ ការដ្ឋានបូមខ្សាច់ខ្នាតធំចំនួន៣កន្លែង ស្ថិតក្នុងភូមិហ្វាំង ឃុំប៉ុង ស្រុកវើនសៃ ខេត្តរតនគីរី ដែលគេបានបូមចេញពីក្នុង ទន្លេសេសាន្ត ត្រូវបានគេសង្កេតឃើញថា ធ្វើអាជីវកម្មជាយូរឆ្នាំមកហើយ ពុំមានអាជ្ញាប័នត្រឹមត្រូវតាមច្បាប់នោះទេ និង ២កន្លែងទៀតមិនទាន់បានដំណើរការនៅឡើយ។ គេកំពុងតែឈូសឆាយធ្វើផ្លូវដឹកគ្រឿងចក្រចូល ហើយ២កន្លែងថ្មីនេះ ស្ថិតនៅភូមិសាស្ត្រ ស្រុកវើនសៃទាំងអស់។
លោក ហេង ដារ៉ា ជាម្ចាស់ការដ្ឋានមួយកន្លែងបានអោយដឹងថា លោកធ្វើអាជីវកម្មបូមខ្សាច់ទាំងនេះមានការអនុញ្ញាតិត្រឹមត្រូវពីអាជ្ញាធរភូមិ.ឃុំ.ស្រុក រហូតដល់ថ្នាក់ខេត្ត និងមន្ទីរធនធានទឹក បានអនុញ្ញាតិច្បាប់អោយ លោកបានបន្តថា ឃើញគេបូមបាន លោកក៏បូមបានដែរ ហើយថ្មីៗនេះឃើញនៅខាងលើតាមដងទន្លេសេសាន្ត គេចាប់ផ្តើមបើកការដ្ឋានខ្នាតធំចំនួន២កន្លែងផ្សេងទៀត ហើយសង្ស័យមិនមែនជាលក្ខណៈបូមខ្សាច់ធម្មតានោះទេ ពីព្រោះនៅក្នុងសាឡង់នោះផ្ទុកសម្ភារៈគ្រឿងចក្រទំនើបៗ គាត់សង្ស័យថា បូមយករ៉ែមាសទៀតផង។
លោកបានបញ្ជាក់ទៀតថា លោកលក់ខ្សាច់បាន ១ម៉ឺនរៀលក្នុង១ម៉ែត្រគូប ក្នុងមួយរថយន្តដឹកបានពី២០ទៅ២៤ម៉ែត្រគូប រថយន្ត១គ្រឿងអាចដឹកបាន២ជើងទៅ៣ជើងក្នុង១ថ្ងៃ ហើយធ្វើច្បាប់ម្ដង ខេត្តអនុញ្ញាតិបាន១ឆ្នាំ។
លោក ទុយ ស៊ីវិល ប្រធានសាខាពន្ធដា ខេត្តរតនគិរីបានអោយដឹងតាមទូរស័ព្ទកាលពីព្រឹកថ្ងៃទី២០ ខែមករា ឆ្នាំ២០១៥នេះថា អាជីវកម្មបូមខ្សាច់នៅស្រុកវើនសៃ ដែលបានបង់ពន្ធអាករជាប្រចាំ និងបង់ពន្ធប៉ាតង់ប្រចាំខែ មានពីរកន្លែង ១.របស់អ្នកស្រី ស៊ុំ ម៉ាយមុំ ហ៊ុនជាមួយលោក លីប ស៊ីម និងមួយកន្លែងទៀតរបស់ លោក ហេង ដារ៉ា។
លោក ចាន់ ប៊ុនធឿន ប្រធានមន្ទីរធនធានទឹកបានបញ្ជាក់ថា ការបូមខ្សាច់នៅស្រុកវើនសៃកន្លងមកមន្ទីរមិនបានអនុញ្ញាតិនោះទេ មានតែអាជ្ញាធរខេត្ត ទើបហ៊ានសម្រេច ប៉ុន្តែយើងមិនទាន់ឃើញមានលិខិតអនុញ្ញាតិពីក្រសួងអោយធ្វើអាជីវកម្មនោះទេ។ ទើបថ្មីៗនេះម្ចាស់អាជីវកម្មជាច្រើនកន្លែងនៅតាមដងទន្លេសេសាន្ត និងទន្លេស្រែពក រត់ច្បាប់អាជីវកម្មចូលមន្ទីរ រួចទៅក្រសួង តែមិនទាន់មានច្បាប់អនុញ្ញាតិណាមួយពីក្រសួងនោះទេ។
លោក ហ៊ុន ប៊ុនថាន ប្រធានមន្ទីរ ឧស្សាហកម្ម រ៉ែ និងថាមពល បានបញ្ជាក់តាមទូរស័ព្វ នៅរសៀលថ្ងៃទី២០ នេះថា បញ្ហាអាជីវកម្មបូមខ្សាច់នៅខេត្តរតនគិរី មិនទាន់មានការអនុញ្ញាតិច្បាប់ពីថ្នាក់ក្រសួងនោះទេ ប៉ុន្តែយោងតាមតម្រូវការប្រើប្រាស់ចាំំបាច់ក្នុងខេត្តទើប អាជ្ញាធរខេត្តអនុញ្ជាតិជាបណ្តោះអាសន្ន ចំពោះបញ្ហាខាងលើនេះ លោកមិនបានបញ្ជាក់អំពីវិធានការអ្វីនោះទេ លោកគ្រាន់តែបន្តថា លោកនិងប្រឹងប្រែងជម្រុញអោយក្រសួងជួយចេញច្បាប់អោយបានឆាប់តែប៉ុណ្ណោះ។
ទោះជាយ៉ាងណាក៏ដោយ ជិត១០ឆ្នាំមកហើយការធ្វើអាជីវកម្មបូមខ្សាច់នៅតាមដងទន្លេសេសាន្ត ពុំមាន អាជ្ញាប័នត្រឹមត្រូវតាមច្បាប់នោះទេ។ដោយឡែក ឯកឧត្តម ម៉េង សក្តិធារ៉ា រដ្ឋលេខាធិការក្រសួងឧស្សាហកម្មរ៉ែ និងថាមពលបានបញ្ជាក់អោយដឹងកាលពីថ្ងៃទី១២ ខែមករា ឆ្នាំ២០១៥ នៅសាលប្រជុំសាលាខេត្តរតនគិរី ឆ្លើយតបសំនួរក្រុមអ្នកយកពត៌មានយ៉ាងខ្លីថា ចំពោះការបូមខ្សាច់នៅខេត្តរតនគិរី សុទ្ធតែគ្មានច្បាប់ទាំងអស់។
