ភ្នំពេញ៖ ដែលហេតុការណ៍នេះបានកើតឡើងកាលពីវេលាម៉ោង៩យប់ថ្ងៃទី២០ខែមករាឆ្នាំ២០១៥ ត្រង់ចំណុចតូបលក់បង្អែម ផ្លូវលេខ៣៦០កែងផ្លូវលេខ១១៣ ស្ថិតក្នុងសង្កាត់បឹងកេងកង៣ ខណ្ឌចំការមន។ជនសង្ស័យឈ្មោះ រ័ត្ន សំណាង អាយុ២៦ឆ្នាំមុខរបរនិងទីកន្លែង
ស្នាក់នៅមិនពិតប្រាកដ មានទីកន្លែងកំណើតនៅសង្កាត់បឹងព្រលឹត ខណ្ឌ៧មករា។ ចំណែកនារីរងគ្រោះជាម្ចាស់កាបូបឈ្មោះ ឡេង មួយហុង អាយុ២០ឆ្នាំជានិស្សិត បច្ចុប្បន្នស្នាក់នៅក្នុងបុរីលឹម ឈាងហាក់ ពោធិ៍ចិនតុង ផ្ទះលេខ1D ភូមិទ្រា ខណ្ឌពោធិ៍សែនជ័យ តាមបណ្ដោយផ្លូវសហព័ន្ធរុស្ស៊ី ក្នុងកាបូបដែលជនសង្ស័យឆក់យកនោះ មានទូរស័ព្ទ អាយផេត និងលុយមួយចំនួន។ប្រភពព័ត៌មានបានអោយដឹងថា មុនពេលកើតហេតុជនរងគ្រោះនិងបងប្អូនប្រុសស្រី២នាក់ទៀតបានជិះរថយន្តមួយគ្រឿងម៉ាកលុចស៊ីសRX350 ពណ៌ខ្មៅ មិនមានស្លាកលេខ បានមកឈប់ចតអង្គុយញ៉ាំបង្អែមនៅចំណុចកើតហេតុដោយបានដាក់កាបូបនៅជិតខ្លួន ភ្លាមៗ
ស្រាប់តែលេចមុខជនសង្ស័យម្នាក់បានធ្វើសកម្មភាពឆក់យកកាបូបបានហើយព្យាយាមរត់គេច ប៉ុន្តែត្រូវប្រជាពលរដ្ឋដេញតាមចាប់បានហើយព្រួតវាយមួយដៃមួយជើងទ្រោមខ្លួន រួចក៏បានទំនាក់ទំនងទៅសមត្ថកិច្ចមូលដ្ឋានសុំការអន្តរាគមន៍។បើតាមសម្ដីរបស់ជនសង្ស័យបានរៀបរាប់ថា រូបគេបានជិះម៉ូតូឌុបពីផ្សារថ្មីមកឈប់នៅម្ដុំគីរីរម្យរួចក៏ចេះតែដើរៗទៅគ្មានគោលដៅនោះទេ ស្រាប់តែមកដល់ចំណុចកើតហេតុ មានឱកាសហើយស្ងាត់ផងនោះរូបគេក៏បានធ្វើសកម្មភាពឆក់យកកាបូបពីជនរងគ្រោះតែម្ដង ប៉ុន្តែរត់មិនរួចក៏ត្រូវប្រជាពលរដ្ឋចាប់បាន។ក្រោយពេលកើតហេតុសមត្ថកិច្ចក៏បាននាំខ្លួនជនសង្ស័យនិងជនរងគ្រោះមកប៉ុស្ដិ៍នគរបាលបឹងកេងកង៣ដាក់ពាក្យបណ្ដឹងដើម្បីកសាងសំណុំរឿងបញ្ជូនជនសង្ស័យទៅតុលាការផ្ដន្ទាទោសតាមផ្លូវច្បាប់៕
