នាយករដ្ឋមន្ត្រីបារាំង លោក Manuel Valls បានថ្លែងថា បារាំងនឹងដាក់ពង្រាយកងសន្តិសុខ២.៦៨០នាក់ បន្ថែមទៀត ព្រមទាំងបង្កើនប្រាក់ចំណាយរហូតដល់៤២៥លានអឺរ៉ូ(ប្រហាក់ប្រហែល៤៩២លានដុល្លារអាមេរិក) នៅក្នុងសកម្មភាពទប់ស្កាត់ និងរារាំង ការវាយប្រហារភេរវកម្ម ។ លោកបន្តថា នាពេលបច្ចុប្បន្ននេះ បារាំងមានកងសន្តិសុខ៣ពាន់នាក់ ដែលល្បាតរក្សាសន្តិសុខនៅទូទាំងប្រទេសបារាំង ហើយកងម្លាំងទាំងអស់នេះនឹងមានសមត្ថភាពគ្រប់គ្រាន់ដើម្បីទប់ស្កាត់ និងរារាំងការគំរាមកំហែងវាយប្រហារភេរវកម្ម ។
លោក Valls បានថ្លែងបញ្ជាក់ពីគម្រោងរបស់រដ្ឋាភិបាលខាងលើនេះបន្ទាប់ពីការវាយប្រហារភេរវកម្មកើត ឡើងនៅទីក្រុងបារីសបណ្តាលឲ្យស្លាប់មនុស្ស១៧នាក់រួចមក ។
នាពេលថ្មីៗនេះ ព្រះរាជអាជ្ញាមួយរូបបានបញ្ជាក់ថា បុរស៤នាក់ត្រូវតុលាការដាក់ទោសពាក់ព័ន្ធនឹងការវាយប្រហារភេរវកម្ម ។
បុរស៣នាក់ក្នុងចំណោមនោះរងចោទពីបទផ្ទត់ផ្គង់អាវុធឲ្យឈ្មោះ Amedy Coulibaly ដែលគេដឹងថា ជាអ្នកបាញ់ប្រហារសម្លាប់ប៉ូលិសកាលពីថ្ងៃទី៨ ខែមករា ឆ្នាំ២០១៥ មួយថ្ងៃក្រោយការវាយប្រហារនៅផ្សារទំនើប Jewish ក្នុងទីក្រុងបារីស ហើយដែលចំណាប់ខ្មាំង៤នាក់បាត់បង់ជីវិតនោះ ។
នៅថ្ងៃទី៧ ខែមករា បុរសពីរនាក់បងប្អូន ឈ្មោះ Said Kouachi និងឈ្មោះ Cherif Kouachi បានវាយប្រហារទៅលើការិយាល័យទស្សនាវដ្តីរូបត្លុក Charlie Hebdo បណ្តាលឲ្យស្លាប់មនុស្ស១២នាក់ ។ ខ្មាន់កាំភ្លើង៣នាក់ត្រូវប៉ូលិសបាញ់សម្លាប់ផងដែរ។
ព្រះរាជអាជ្ញាទីក្រុងប៉ារីស Francois Molins បានថ្លែងថា កិច្ចសហប្រតិបត្តិការជាអន្តរជាតិជាមួយអាជ្ញាធរទួរគី អេស្ប៉ាញ និងប៊ែកឡាំងនៅតែបន្តធ្វើឡើង នៅក្នុងការស្រាវជ្រាវរកព័ត៌មានឲ្យដឹងប្រាកដថា តើ ជនសង្ស័យមានដំណើរទៅមកបានដោយរបៀបណា និងថា តើពួកគេទទួលអាវុធបានដោយវិធីណា? ។
នៅក្នុងគម្រោងប្រយុទ្ធប្រឆាំងអំពើភេរវកម្មថ្មីនេះ លោក Walls បានបញ្ជាក់ថា កងកម្លាំងសន្តិសុខនឹងបំពាក់ដោយឧបករណ៍ និងគ្រឿងការពារដ៏ទំនើប មានដូចជាអាវក្រោះការពារគ្រាប់ជាដើម។
ក្រោយវាយប្រហារភេរវកម្ម បារាំងបានដាក់ពង្រាយកងសន្តិសុខ១០.០០០នាក់ដើម្បីការពារសុវត្ថិភាពជូនប្រជាពលរដ្ឋនៅទីតាំងសំខាន់ទូទាំងប្រទេស ដូចជាតាមសាលារៀន ឬព្រះវិហារសាសនា៕
