រដ្ឋមន្ត្រីការបរទេសរុស្ស៊ី លោក សឺហេ្គយ៍ ឡៅរ៉ូវ បានថ្លែងកាលពីថ្ងៃទី២១ ខែមករា ឆ្នាំ២០១៥ថា រុស្ស៊ីធ្វើអ្វីៗ គ្រប់យ៉ាងក្នុងការការពារទំនាក់ទំនងរបស់ខ្លួនជាមួយលោកខាងលិចមិនឲ្យធ្លាក់ក្នុងរណ្តៅនៃសង្គ្រាមត្រជាក់សាជាថ្មីម្តងទៀតនោះឡើយ។
ថ្លែងក្នុងសន្និសីទកាសែតលោកឡៅរ៉ូវបានបញ្ជាក់ថា «ក្រោយពីសកម្មភាពរបស់សហរដ្ឋអាមេរិក ការប្រឈមមុខហាក់កើតមានឡើងស្ថិតនៅបណ្តាប្រទេសសម្ពន្ធមិត្តអាត្លង់ទិកភាគខាងជើង ។ ជាការសម្រេចខាងផ្លូវនយោបាយនៅក្នុងការផ្អាកកិច្ចសហប្រតិបត្តិការយោធា ក៏ដូចវិស័យស៊ីវិលផងដែរ។
សរុបមក រាល់គម្រោងទាំងអស់ត្រូវផ្អាក» ។ លោកបញ្ជាក់ថា នេះមិនមែនជាជម្រើសរបស់រុស្ស៊ីឡើយ ទីក្រុងមូស្គូមិនចង់ ហើយក៏មិនអនុញ្ញាតឲ្យសង្គ្រាមត្រជាក់កើតឡើងសាជាថ្មីទៀតដែរ។
លោកបានជំរុញឲ្យដៃគូលោកខាងលិចរបស់រុស្ស៊ីគួរតែយល់ និងដឹងថា បញ្ហាសន្តិសុខនៅលើពិភពលោក វាមិនអាចទៅរួច ដោយអាស្រ័យតែទៅលើសកម្មភាពជាឯកតោភាគី និងគាបសង្កត់មកលើដៃគូនោះឡើយ។ ប្រភពពីអ្នកការទូតបានឲ្យដឹងថា ការព្យាយាមរបស់លោកខាងលិចដើម្បីឲ្យរុស្ស៊ីនៅឯកោនោះ មិនទទួលបានផលអ្វីទាំងអស់។
លោកឡៅរ៉ូវ បានអំពាវនាវឲ្យអាមេរិក និងសហគមន៍អឺរ៉ុបបន្តពិភាក្សាគ្នាជាឧបតោភាគីពាក់ព័ន្ធបញ្ហាអន្តរជាតិនានា ដោយក្នុងនោះមានវិបត្តិនៅអ៊ុយក្រែនផងដែរ ៕
