រដ្ឋមន្ត្រីបានថ្លែងថា បង់ក្លាដែសបានចាប់ខ្លួនសកម្មជនប្រឆាំងជាង៧ពាន់នាក់ចាប់តាំងពីការធ្វើបាតុកម្មទូទាំងប្រទេសកាលពីពីរសប្តាហ៍កន្លងមក។អាជ្ញាធរបានព្យាយាមសម្រុះសម្រួលដោះស្រាយបញ្ហាចលាចលជាមួយក្រុមសកម្មជនទាំងនេះដែលបានបំផ្ទុះគ្រាប់បែកក្នុងរថយន្ត និងការបិទផ្លូវបណ្តាលឲ្យបាត់បង់ជីវិតមនុស្ស២៩នាក់ ។
មេដឹកនាំប្រឆាំង លោកស្រី Khaleda Zia បានអំពាវនាវឲ្យក្រុមរបស់ខ្លួនធ្វើបាតុកម្មនៅក្នុងឱកាសពិធីបុណ្យខួបថ្ងៃបោះឆ្នោតកាលពីឆ្នាំមុន។នាយករដ្ឋមន្ត្រីបង់ក្លាដែស លោកស្រី Sheikh Hasina កាលពីថ្ងៃពុធ បានថ្កោលទោសសកម្មភាពរបស់ក្រុមប្រឆាំងដោយចាត់ទុកថាជាក្រុមឧទ្ទាម ។ លោកស្រីបានបញ្ជាក់ថា សកម្មជនទាំងនោះមិនសមជាអ្នកនយោបាយឡើយ ប៉ុន្តែស័ក្តិសមជាងក្នុងអំពើភេរវកម្ម។
មេដឹកនាំទាំងពីរជានិច្ចកាលបានអំពាវនាវឲ្យមានការធ្វើបាតុកម្មទូទាំងប្រទេស ក្នុងអំឡុងពេលពួកគេជាក្រុមប្រឆាំង។ ពួកគេឆ្លាសគ្នាកាន់អំណាចស្ទើរតែអស់រយៈពេល២ទសវត្សរ៍កន្លងមក ប៉ុន្តែនៅពេលបច្ចុប្បន្ននេះ ក្រុមអ្នកវិភាគមើលឃើញថា លោកស្រី Hasina ហាក់មានសំឡង និងឥទ្ធិពលច្រើនជាង។
រដ្ឋមន្ត្រីឧស្សាហកម្ម លោក Hossain Amu បានថ្លែងថា រហូតមកដល់ពេលនេះ សកម្មជន និងមេដឹកនាំប្រឆាំង៧០១៥នាក់ត្រូវចាប់ខ្លួន។ លោកបានផ្តល់រង្វាន់ប្រហាក់ប្រហែល១៣០០ដុល្លារចំពោះព័ត៌មានឈានដល់ចាប់ខ្លួនមេដឹកនាំប្រឆាំង។ អាជ្ញាធរពិចារណាលើសកម្មភាពរបស់អ្នក បង្កឲ្យមានភាពចលចលផ្នែកនយោបាយ និងសន្តិសុខសង្គមទាំងនេះ ។
ភាគច្រើនអ្នកដែលបាត់បង់ជីវិតនៅអំឡុងពេលបាតុកម្មនោះជាអ្នករត់ម៉ូតូឌុប អ្នកបើកបរតាក់ស៊ី ដែលបានស្លាប់នៅក្នុងហេតុការណ៍បំផ្ទុះគ្រាប់បែក។ គេនៅមិនទាន់ដឹងច្បាស់នៅឡើយថា នរណានៅពីក្រោយអំពើវាយប្រហារនេះឡើយ។
លោកស្រី Zia ត្រូវឃុំខ្លួននៅក្នុងផ្ទះ អំឡុងពេលបាតុកម្មចាប់ផ្តើម ប៉ុន្តែក្រោយមកត្រូវដោះលែងឲ្យមានសេរីភាព៕
