ប្រជាពលរដ្ឋដែលជាកម្មករអូសរទេះនៅតំបន់ប៉ោយប៉ែត កំពុងតែក្រពុលមុខនិងមន្ត្រីគយពីរនាក់ដែលប្រចាំការនៅចំណុចមាត់ទ្វារព្រំដែនកម្ពុជាថៃស្ថិតក្នុងភូមិក្បាលស្ពាន១សង្កាត់និងក្រុងប៉ោយប៉ែត ខេត្តបន្ទាយមានជ័យ ។ក្រុមអ្នកអូសរទេះដែលប្រកបមុខរបរស៊ីឈ្នួលដឹកទំនិញពីដីថៃមកកាន់កម្ពុជាបានលើកឡើងថា៖ សព្វថ្ងៃនេះមន្ត្រីគយដែលប្រចាំការនៅច្រកទ្វារព្រំដែនក្បែរគល់ប្រាសាទបានកំពុងតែចងកម្មចងពៀរជាមួយនិងកម្មករក្រីក្រដូចជាពួកគាត់ ព្រោះថាពួកគយទាំងនោះបានប្រើរូបភាពគាបសង្កត់កម្មករយកលេសថា៖ខ្លួនជាអ្នករកលុយបើកឲ្យមន្ត្រីរាជការ ។
តែធាតុពិតពួកគេកំពុងតែបំផ្លាញប្រជាប្រិយភាពរបស់បក្សគ្រប់គ្រងអំណាចយ៉ាងច្បាស់ក្រឡែត ពោលគឺពួកគេបានគំរាមគំហែងកម្មករគ្រប់រូបភាពដូចជាចាប់រទេះដឹកទំនិញបន្តិចបន្តួចបង្គាប់ឲ្យបង់ប្រាក់ខុសប្រក្រតីជាដើម ។
ជាក់ស្តែងកាលពីថ្ងៃទី១១ខែមិនាឆ្នាំ២០១៤ លោកយិន ផល្លី និងអ៊ីឃីម បានចាប់រទេះដឹកទំនិញចំនួនពីររទេះ ក្នុងចំណោមរទេះដឹកទំនិញ៦រទេះនេះបើតាមការណ៏ឲ្យដឹងពីកម្មករម្នាក់ឈ្មោះ ណាងភេទប្រុសអាយុ២៨ឆ្នាំបានប្រាប់ឲ្យដឹកកាលពីព្រឹកមិញ ។ កម្មករខាងលើបានបន្តថា៖ ១ថ្ងៃខ្លួនបានចំណាយពេលនៅក្នុងផ្សាររោងក្លឿប្រទេសថៃដើម្បីរកម៉ូយដឹកទំនីញមកកាន់ដីខ្មែរគាត់ថា៖ទំនិញដែលគាត់បានដឹកនោះគឺជាទឹកដោះគោសញ្ញារូបគោក្រហម ចំនួន១៥០ដុំ ក្នុង១ដុំថ្លៃឈ្នួល៤០០រៀល ដូច្នេះទឹកដោះគោ១៥០ដុំគាត់ទទួលបានកំរ៉ៃតែ៦០០០០រៀលពេលដឹកមកដល់ដីខ្មែរ ។
ប៉ុន្តែការចំណាយរបស់គាត់ក្នុង១ជើងបង់គយប្រចាំការនៅគល់ប្រាសាទអស់ចំនួន២០០០០រៀលស្ថាបន័នាយកដ្ឋានកាំកុងត្រូលចំនួន៥០០០រៀលនគរបាលអន្តោប្រវេសន៏ចំនួន៥០០០រៀលថ្លៃសំបុត្រចូលផ្សារថៃ១០០០រៀលថ្លៃជូលរទេះចំនួន៣០០០រៀលសរុបការចំណាយទាំងអស់ក្នុង១លើកៗអស់ប្រាក់ចំនួន៣៤០០០រៀល ដូច្នេះដែលគាត់នៅសល់ក្នុងខ្លួនត្រឹមតែ២៦០០០រៀលនេះបើគយមិនចាប់រទេះជំរិតយកទេនោះ ។
កម្មករដដែលបាននាំម្តាយជរានិងកូនចំនួន៤នាក់ព្រមជាមួយប្រពន្ធសសៃខ្ចីបានមកឳបដៃសំពះគយនៅមុខការិយាល័យដោយនិយាយថា៖ខ្ញុំគ្មានប្រាក់បង់ពន្ធទេ ព្រោះពួកបងទារថ្លៃពន្ធថ្លៃពេកសំណាងនិយាយរៀបរាប់ថា៖ ទំនិញគាត់ដឹក១រទេះទទួលបានប្រាក់តែ២៦០០០រៀលសោះហេតុអីក៏គយគាត់ទារខ្ញុំដល់ទៅ៣០០ដូល្លារតើខ្ញុំបានប្រាក់មកពីណាបង់ពន្ធ ? ។
កម្មករដដែលបានប្រាប់ទៀតថា៖គយគេបង្គាប់ឲ្យគាត់បង់ពន្ធត្រឹមតែ២០០ដូល្លារទេចំណែក១០០ដូល្លារទៀតថ្លៃក្រដាស់ពន្ធនាំចូលដូច្នេះ សរុបទាំងអស់ទំនិញប្រភេទទឹកដោះគោសញ្ញារូបគោក្រហមចំនួន១៥០ដុំសំណាងត្រូវចំណាយប្រាក់អស់៣០០ដូល្លារថ្លៃបង់ពន្ធជូនរដ្ឋ ។
ចំណែកប្រជាពលរដ្ឋដែលធ្លាប់បានប្រើប្រាស់ទឹកដោះគោឆៅសញ្ញារូបគោនោះបានឲ្យដឹងថា៖ ទឹកដោះគោ១ដុំមានចំនួន៦ដប ក្នុង១ដបលក់ចេញមានតម្លៃ២០០០រៀល ដូច្នេះទឹកដោះគោដែលគយចាប់កាលពីថ្ងៃទី១១នោះមានចំនួនសរុប ៩០០ដបបើលក់ចេញបានប្រាក់សរុបត្រឹមតែ១៨០០០០០រៀលប៉ុណ្ណោះ ប៉ុន្តែហេតុអីក៏គយឈ្មោះយីន ផល្លី និង អ៊ីឃីម ចាប់រទេះបង្គាប់ឲ្យកម្មករបង់ពន្ធចូលរដ្ឋដល់១២០០០០០រៀល? បែបនេះតើជាការត្រឹមត្រូវតែឬយ៉ាងណា ? ។
ពាក់ពន្ធ័បញ្ហាចាប់រទេះកម្មករនេះដែរលោក ថោង សុខាំផូ ប្រធានសាខាគយនិងរដ្ឋករខេត្តបន្ទាយមានជ័យ ធ្លាប់បាននិយាយថា៖ រឿងទំនិញគេចពន្ធគយត្រូវតែចាប់បង្គាប់ឲ្យពន្ធជូនរដ្ឋដើម្បីការពារភាពអាណាធិបតេយ្យកើតឡើងនាំឲ្យបាត់បង់ប្រាក់ចំណូលរដ្ឋ ប៉ុន្តែលោកថោង សុខាំផូ មិនដែលបានដឹងឡើយថា៖នៅច្រកព្រំដែនប៉ោយប៉ែតនាពេលសព្វថ្ងៃនេះមានករណីរត់ពន្ធទំនិញធំភ្លួកទឹកភ្លួកដីនោះទេ ជាក់ស្តែងដូចជា៖ ករណីរថយន្តចូលទៅដឹកហ្គាសក្នុងដីថៃ១ថ្ងៃៗមិនតិចជាង៥០០គ្រឿងទេ លើសពីនេះ លោក ហួនហៃ និងយិន ផល្លី ព្រមទាំងអ៊ីឃីម បានបើកដៃឲ្យមានរូបភាពរថយន្តដឹកទំនិញបង្កប់តាមឡានដឹកហ្គាស់រាប់សិបឡានផងដែរ ប៉ុន្តែ លោក គយ យិន ផល្លី និង អ៊ីឃីម មិនដែលបើកភ្នែកធើ្វឃើញឬបង្ក្រាបម្តងណាឡើយ ៕
កត្តាចន្លោះប្រហោងទាំងនេះវាបានធើ្វឲ្យមតិជិតខាងគេមើលឃើញថា៖ គយ ចាប់រទេះអ្នកក្រចំហឲ្យរទេះអ្នកមានប្រព្រឹត្តកំហុសឆ្គងដើម្បីផលប្រយោជន៏ខ្លួនតែប៉ុណ្ណោះ ។យ៉ាងណាក៏ដោយ លោក ឈួន ហៃ ប្រធានការិយាល័យគយប្រចាំព្រំដែនអន្តរជាតិប៉ោយប៉ែត មិនអាចសុំការបំភ្លឺបានទេ នាថ្ងៃទី១២មិនាឆ្នាំ២០១៤នេះ សង្ឃឹមថាបញ្ហាពុករលួយនេះនឹងមានការស៊ើបអង្គេតពីសំណាក់អង្គភាពប្រឆាំងអំពើពុករលួយជាក់ជាមិនខាន ជាងនេះទៅទៀតបើគ្មានចំណាត់ឲ្យបានឆាប់នោះទេ មុខជា យិន ផល្លី និង អ៊ីឃីម បន្តធើ្វព្យុះធើ្វភ្ញៀងនិងកើតមានបាតុកម្មនៅច្រកទ្វារអន្តរជាតិនេះជាមិនខាន ។
