សៀមរាប : យុវជនម្នាក់នេះមានឈ្មោះ ចាន់ ភិរុន អាយុ ១៦ឆ្នាំ មានទីលំនៅក្នុងភូមិបឹងដូន ប៉ា សង្កាត់ស្លក្រាម ក្រុង និង ខេត្តសៀមរាប ត្រូវបានកម្លាំងការិយាល័យប្រឆាំងគ្រឿងញៀននៃស្នងការដ្ឋាននគរបាលខេត្តសៀមរាប ធ្វើការតាមដានស្រាវជ្រាវនិងឈានដល់ការចាប់
ឃាត់ខ្លួនបានកាលពីថ្ងៃទី២៤ ខែមករា ឆ្នាំ ២០១៥ កន្លងទៅរួចយកមកកាន់ការិយាល័យនគរបាលជំនាញដើម្បីធ្វើការសួរនាំជាប់ពាក់ព័ន្ធក្នុងករណី ជួញដូរដោយខុសច្បាប់នូវសារធាតុញៀន ។ ជាប់ពាក់ព័ន្ធក្នុងករណីខាងលើលោក វរសេនីយ៍ទោ អ៊ុំ សាអាត នាយការិយាល័យប្រឆាំងគ្រឿងញៀននៃស្នងការដ្ឋាននគរបាលខេត្តសៀមរាបបានអោយដឹងថាដោយអនុវត្តតាមការយកចិត្តទុកដាក់ខ្ពស់ជាប្រចាំពីសំណាក់លោក ឩត្តមសេនីយ៍ទោ សត ណាឌី ស្នងការនគរបាលខេត្តសៀមរាប ក៏ដូចជាដើម្បីធ្វើអោយការអនុវត្តនូវគោលនយោបាយភូមិឃុំមានសុវត្ថិភាព អោយ កាន់តែមានប្រសិទ្ធភាពខ្ពស់។ 
ទើបជាក់ស្តែងជនសង្ស័យភេទប្រុសម្នាក់នេះមិនអាចរត់គេចពីសមត្ថកិច្ចជំនាញបានឡើយ ។ លោក វរសេនីយ៍ទោ អ៊ុំ សាអាត បានបន្តអោយដឹងទៀតថា បន្ទាប់ពីបានធ្វើការឃាត់ខ្លួននិងបានសួរនាំជនសង្ស័យជាប់ពាក់ព័ន្ធក្នុងករណីខាងលើហើយនោះនៅមុខសមត្ថកិច្ចជនសង្ស័យបានឆ្លើយសារភាពថាគេពិតជាបានប្រព្រឹត្តនៅករណីខាងលើពិតប្រាកដមែន 
ក្នុងនោះសមត្ថកិច្ចបានធ្វើការដកហូតបាននូវវត្ថុតាងពីជនសង្ស័យបានប្រភេទគ្រឿងញៀនខុសច្បាប់ម៉ាទឹកកកចំនួន១៨កញ្ចប់តូច ស្មើរនិង ២ , ៣ ក្រាម និងសម្ភារ:វេចខ្ចប់គ្រឿងញៀនមួយចំនួនទៀតផងដែរ ។បច្ចុប្បន្នទាំងជនសង្ស័យនិងវត្ថុតាងត្រូវបានសមត្ថកិច្ចកសាងសុំណុំរឿងបញ្ជូនទៅកាន់សាលាដំបូងខេត្តសៀមរាបហើយកាលពីថ្ងៃទី២៥ខែមករា នេះ ដើម្បីចំណាត់ការទៅតាមផ្លូវច្បាប់បន្ត ៕
លោក ខេង ខេមរា
