បន្ទាប់ពីភាពតានតឹង របស់បច្ចាមិត្តទាំងពីរ អ៊ីស្រាអែល និង ប៉ាឡេស្ទីន ហាក់ ធូរស្រាលបន្តិច ឈានចូលមកដល់ដើមឆ្នាំ ២០១៥ នេះ ប្រទេសអ៊ីស្រាអែល បានសម្រេច អនុញ្ញាតនូវ ផ្ទៃទឹកសមុទ្រ ១០គីឡូម៉ែត្រក្រឡា ដល់អ្នកនេសាទ ប៉ាឡេស្ទីន នៅតំបន់ ហ្គាសា ស្ទ្រីព ដើម្បីប្រកបមុខរបរប្រចាំថ្ងៃ ក្រោយពីបានហាមឃាត់ អស់ជាច្រើនខែមក។
ទីភ្នាក់ងារព័ត៌មានចិនស៊ិនហួ ចេញផ្សាយនៅថ្ងៃសៅរ៍ ទី២៤ ខែមករា ឆ្នាំ២០១៥ នេះថា តាម កិច្ចព្រមព្រៀងសន្តិភាព ដែលរៀបចំឡើង ដោយប្រទេសអេហ្ស៊ីប និង ត្រូវបានអ៊ីស្រាអែល និង ហាម៉ាស ទទួលយកកាលពី ចុងខែសីហា នោះ ប្រទេសអ៊ីស្រាអែល ទើបតែបានសម្រេច កាលពីពេលថ្មីៗនេះ ដោយអនុញ្ញាតឲ្យ ជនជាតិប៉ាឡេស្ទីន ធ្វើការនេសាទត្រីនៅតាមទីតាំង និង ទំហំដែលខ្លួន បានកំណត់ឲ្យប៉ុណ្ណោះ ។
ទោះបីជាបែបនេះក្តី អ្នកនេសាទប៉ាឡេស្ទីន ក្នុងដែនសមុទ្រអ៊ីស្រាអែល ភាគច្រើនបាន អះអាងថា កងកម្លាំងជើងទឹករបស់ប្រទេសនេះ នៅតែមិនព្រមបញ្ឈប់ ការយាយីដល់ពួកគេ ឡើយ ព្រោះកន្លងមកទូក អ្នកនេសាទមួយចំនួនត្រូវ កងទ័ពបាញ់ប្រហារ និង ខ្លះទៀតត្រូវ បណ្តេញចេញ ឬ ចាប់ខ្លួនទៀតផង ៕
