ខេត្តប៉ៃលិន៖រថយន្តតាក់ស៊ីមួយគ្រឿងបើកបរក្នុងទិសដៅស្របទិសគ្នា បំរ៉ុងនិងវ៉ាតែត្រូវរថយន្តសណ្តោងរម៉ករបស់ជនជាតិថៃបុកនិងកៀរ បណ្តាលឱ្យធ្លាក់ប្រឡាយផ្ងារជើងទាំង២តែម្តង សំណាងគ្មានមនុស្សគ្រោះថ្នាក់ដល់ជីវិតគ្រាន់តែរងរបួសធ្ងន់និងស្រាលមនុស្សចំនួន០៤នាក់ប៉ុណ្ណុះ ។
ហេតុការណ៍នេះកើតឡើងនៅវេលាម៉ោង ៩និង២០នាទីព្រឹកថ្ងៃទី២៦ខែមករាឆ្នាំ២០១៥នេះ នៅតាមបណ្តោយផ្លូវជាតិលេខ៥៧ស្ថិតនៅ ភូមិប៉ាងរលឹម សង្កាត់អូរតាវ៉ៅ ក្រុងប៉ៃលិន ។
ប្រភពពីសមត្ថកិច្ចបានឱ្យដឹងថា ជនរងគ្រោះមានឈ្មោះប្រិម ព្រី ភេទប្រុស អាយុ៤៧ឆ្នាំមុខរបររត់តាក់ស៊ី មានទីលំនៅភូមិទួលស្រឡៅសង្កាត់ទួលល្វាក្រុងប៉ៃលិន បើកបររថយន្តម៉ាក
កាមរីសេរីឆ្នាំ១៩៩៥ ពណ៌ស្លែ ពាក់ស្លាកលេខ បាត់ដំបង 2A-4258 រីឯអ្នករួមដំណើរ៣នាក់ទៀតមិនបានស្គាល់ឈ្មោះក្រោយពីកើតហេតុត្រូវបានសាច់ញាតិនាំចាកចេញអស់។ ចំណែកអ្នកបើកបររថយន្តសណ្តោងរម៉កម៉ាក(FUSO)ពាក់ស្លាកលេខថៃ មានឈ្មោះកៃឡុង ជាជនជាតិថៃ ។
ប្រភពពីពលរដ្ឋដែលឃើញហេតុការណ៍បានឱ្យដឹងថា ឃើញរថយន្តទាំង២បើកស្របទិសគ្នាពីប៉ៃលិនឆ្ពោះទៅខេត្តបាត់ដំបង ក្នុងសភាពលឿនដូចគ្នាលុះមកដល់ចំណុចកើតហេតុពេលរថយន្តកាមរីបំរ៉ុងនិងវ៉ាស្រាប់តែ រថយន្តសណ្តោងរម៉កជៀសពីរថយន្តមួយផ្សេងទៀតច្រាស់ទិសគ្នាក៍ទៅប៉ះជាមួយ កាមរីបណ្តាលឱ្យប្រឡាប់ធ្លាក់ប្រឡាយគ្មានទឹកនៅជិតផ្លូវនេះតែម្តង។
បច្ចុប្បន្នកំលាំងសមត្ថកិច្ចបាននាំយក រថយន្តទាំង២មកកាន់ស្នងការដ្ធានខេត្ត រងចាំម្ចាស់មកដោះស្រាយគ្នានាពេលក្រោយ៕
