ភ្នំពេញ៖ទីតាំងបើកល្បែងស្ទូចត្រីមួយកន្លែងនៅក្នុងភូមិសាស្ត្រខណ្ឌសែនសុខ<
ត្រូវបាន កម្លាំងកងរាជអាវុធហត្ថរាជធានីភ្នំពេញ អាវុធហត្ថលើផ្ទៃប្រទេស សហការជាមួយកម្លាំងអាវុធហត្ថមូលដ្ឋានខណ្ឌសែនសុខ ដោយមានការចូលរួមពីអយ្យការអមសាលាដំបូងរាជធានីភ្នំពេញ ឆ្មក់ចុះបង្ក្រាប ក្នុងនោះឃាត់បានមនុស្សប្រុស ស្រី ១៤ នាក់ ។
ហេតុការណ៍បង្ក្រាប កាលពីវេលាម៉ោង ១៣និង១៥នាទី ថ្ងៃទី២៦ ខែមករា ឆ្នា២០១៥ ផ្ទះលេខ៦៦ ផ្លូវ៥៩៨ ក្រុម១ ភូមិទំនប់ សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។
សមត្ថកិច្ចប្រាប់ថា ហេតុការណ៍បង្ក្រាបនេះដឹកនាំដោយលោក សៀង សុខ ព្រះរាជអាជ្ញារងអមសាលាដំបូងរាជធានីភ្នំពេញ កម្លាំងកងរាជអាវុធហត្ថរាជធានីភ្នំពេញ អាវុធហត្ថលើផ្ទៃប្រទេស សហការជាមួយកម្លាំងអាវុធហត្ថមូលដ្ឋានខណ្ឌសែនសុខ ជាលទ្ធផលឃាត់បាន
មនុស្សប្រុស ស្រី ១៤នាក់ ម៉ូតូ ០២គ្រឿង ក្នុងនោះម៉ូតូ ម៉ាក សេ១២៥ សេរីឆ្នាំ ២០១៣ ពាក់ស្លាកលេខ ភ្នំពេញ1CH.8293 និងម៉ូតូ ម៉ាក គុប ០១គ្រឿង ពាក់ស្លាកលេខ ភ្នំពេញ 1AR.9135 ផងដែរ ទូរហ្គេម ០១ទូរ និងសំភារះពាក់ព័ន្ធមួយចំនួនទៀត។
សមត្ថកិច្ចប្រាប់បន្តឲ្យដឹងថា នៅក្នុងចំណោមមនុស្សប្រុស ស្រីទាំង ១៤នាក់នោះ គឺមាន ០១ នាក់ ជាអ្នកមើលការខុសត្រូវនៅក្នុងទីតាំងល្បែង និងម្នាក់ទៀត គឺជាម្ចាស់ទីតាំង ឈ្មោះ ឡង់ ស៊ីណា ភេទស្រី អាយុ៥១ឆ្នាំ បច្ចុប្បន្នស្នាក់នៅផ្ទះលេខ៦៦ ផ្លូវ៥៩៨ ក្រុម១ ភូមិទំនប់ សង្កាត់ភ្នំពេញថ្មី ខណ្ឌសែនសុខ។
សមត្ថកិច្ចប្រាប់បញ្ជាក់ឲ្យដឹងបន្តទៀតថា មនុស្សប្រុស ស្រី ទាំង ១៤នាក់ រួមទាំងវត្ថុ តាង ត្រូវបាននាំយកទៅកាន់ទីបញ្ជាការដ្ឋានកងរាជអាវុធហត្ថរាជធានីភ្នំពេញ ដើម្បីចាត់ការតាមផ្លូវច្បាប់។
ជាមួយគ្នានេះមតិមហាជនក៏បានលើកឡើងឲ្យដឹងថា ល្បែងស្ទូចត្រីនេះ មិនមែនមានតែមួយកន្លែងនេះនោះទេ គឺនៅក្នុងខណ្ឌសែនសុខទាំងមូល កើតមានច្រើនកន្លែងណាស់ សូម សមត្ថកិច្ចចុះបង្ក្រាបឲ្យអស់ទៅ កុំទុកឲ្យនៅ នាំឲ្យក្រុមយុវជន ក្មេងៗលែងចូលរៀនអស់ហើយ ដោយសារតែវក់និងល្បែងស្ទូចត្រីទាំងនេះ៕
