កំពង់ឆ្នាំង៖ លោកស្រី អ៊ុតណារី ស្នងការរងនគរបាលខេត្តកំពង់ឆ្នាំង ទទួលបន្ទុកការិយាល័យប្រឆាំងការជួញដូរនិងការពារអនិតិជន (យេនឌ័រ) រយៈពេលចុងក្រោយជាង២ខែមកនេះមានជម្ងឺយ៉ាងធ្ងន់ធ្ងរ ក្រុមគ្រួសារបានយកចិត្តទុកដាក់ ព្យាបាលយ៉ាងអស់លទ្ធភាព ទាំងក្នុងប្រទេសនិងក្រៅប្រទេស នៅតែមិនធូរស្រាស ដោយសភាពជម្ងឺកាន់ តែធ្ងន់ធ្ងរទៅៗ នៅវេលាម៉ោង២
និង៣០នាទីរំលងអាធ្រាតឈានចូលថ្ងៃទី២៥ ខែមករា ឆ្នាំ២០១៥ លោកស្រីបានទទួលមរណៈភាពចោលលោកយើងទៅ ក្រោមការសោកស្តាយអាឡោះអាល័យយ៉ាងខ្លាំងពីសំណាក់ក្រុមគ្រួសារ ពីថ្នាក់នាំខេត្ត ពីមន្ត្រីរាជការ និងពីមន្ត្រីនគរបាលទូទាំងខេត្តកំពង់ឆ្នាំង។
លោកឧត្តមសេនីយត្រី ប្រាក់ វុទ្ធី ស្នងការនគរបាលខេត្តកំពង់ឆ្នាំងបានអោយដឹងថា៖លោកស្រី អ៊ុត ណារី កើតនៅថ្ងៃទី០៦ ខែមីនា ឆ្នាំ១៩៦២ មានស្រុកកំណើតនៅភូមិដំណាក់ពពូល ឃុំកំពង់ឆ្នាំង ស្រុករលាប្អៀរ ខេត្តកំពង់ឆ្នាំង ទីលំនៅបច្ចុប្បន្ននៅភូមិដំណាក់ពពូល សង្កាត់កំពង់ឆ្នាំង ក្រុងកំពង់ឆ្នាំង ខេត្តកំពង់ឆ្នាំង ស្វាមីលោកស្រីគឺ លោក អ៊ឹម សុវណ្ណ មន្ត្រីនគរបាលខេត្តកំពង់ឆ្នាំងបានទទួលមរណៈភាពដោយគ្រោះថ្នាក់ចរាចរណ៍កាលពីឆ្នាំ២០ ១២មកម្ល៉េះ ហើយលោកស្រី មានកូនក្នុងបន្ទុក៤នាក់ ស្រី២នាក់និងប្រុស២នាក់។
ប្រវត្តិការងារ លោកស្រីបានចូលបំរើការងារតាំងពីឆ្នាំ១៩៨១ជាបុគ្គលិកពេទ្យនៅឃុំកំពង់ឆ្នាំងហើយលោកស្រីបានផ្ទេរចូលជាកងកម្លាំងនគរបាលខេត្តកំពង់ឆ្នាំងនៅថ្ងៃទី៣០ ខែកញ្ញា ឆ្នាំ១៩៨៣ មានតួនាទីជាមន្ត្រីស្ថិតិអត្តសញ្ញាណប័ណ្ណនៃស្នងការដ្ឋាននគរបាលខេត្តកំពង់ឆ្នាំង។
ដោយមានស្នាដៃល្អក្នុងការងារជាបន្តបន្ទាប់ លោកស្រីបាន ក្លាយជានាយរងការិយាល័យសុខាភិបាលនៃស្នងការដ្ឋាននគរបាលខេត្ត នៅឆ្នាំ២០១៤ និងត្រូវបានទទួលតំណែងជាស្នងការរងនគរបាលខេត្តទទួលបន្ទុកយេនឌ័រ។នៅក្នុងការបំពេញភារកិច្ចជាង៣៤ឆ្នាំកន្លងមក លោកស្រីអ៊ុត ណារី បានទទួលបានមេដាយការពារជាតិចំនួន៣គឺ មេដាយមាស១ មេដាយប្រាក់១ មេដាយសំរិត១ និងទទួលបានមេដាយមាសការងារចំនួន១គ្រឿង ព្រមទាំងទទួលបានបណ្ណ័សរសើរចំនួន៣ផងដែរ ។
នៅវេលាម៉ោង៧និង៣០នាទីព្រឹកថ្ងៃទី២៦ ខែមករានេះ ឯកឧត្តម ឈួរ ចន្ទ័ឌឿន អភិបាលខេត្ត រួមដំណើរដោយឯកឧត្តម អ៊ុន សំអុល អភិបាលរងខេត្ត លោកមេបញ្ជាការកងកម្លាំងប្រដាប់អាវុធទាំងបីប្រភេទ និងមន្ត្រីរាជការគ្រប់អង្គភាពជុំវិញខេត្ត និងមន្ត្រីនគរបាលទូទាំងខេត្តកំពង់ឆ្នាំង បានអញ្ជើញចូលរួមរំលែកមរណៈទុក្ខនិងគោរពវិញ្ញាណក្ខន្ធលោកស្រី អ៊ុត ណារី នៅគេហដ្ឋានសពក្នុងភូមិដំណាក់ពពូល សង្កាត់កំពង់ឆ្នាំង ក្រុងកំពង់ឆ្នាំង។
ក្រុមគ្រួសារសពលោកស្រី អ៊ុត ណារី បានអោយដឹងថាៈ ពិធីបុណ្យសពនឹងប្រារពធ្វើពីថ្ងៃទី២៥ដល់២៦ខែមករាឆ្នាំ២០១៥ នៅវេលាម៉ោង២រសៀល ថ្ងៃទី២៦ ខែមករា នេះនឹងត្រូវបានដង្ហែរសពទៅបូជានៅវត្តអារញ្ញការាមស្ថិតក្នុងភូមិស្រែព្រីង សង្កាត់កំពង់ឆ្នាំង ក្រុងកំពង់ឆ្នាំង ហើយក្រុមគ្រួសារសពក៏សូមគោរពអញ្ជើញញ្ញាតិមិត្តជិតឆ្ងាយរបស់សព មេត្តាចូលរួមក្នុងពិធីបុណ្យ និងកម្មវិធីដង្ហែសពទៅបូជាតាមកម្មវិធីខាងលើដោយសេចក្តីអនុគ្រោះ។
រូបំ អនិច្ចំ អនតា កើត ចាស់ ឈឺ ស្លាប់ គឺជារឿងមិនអាចជៀសផុតរបស់មុស្សលោក សូមវិញ្ញាណក្ខន្ធរបស់លោកស្រីអ៊ុត ណាវី បានបដិសន្ធិក្នុងសុគតិភពកុំបីឃ្លាតឡើយ៕
