រដ្ឋមន្ត្រីការបរទេសរុស្ស៊ី លោក សឺហ្គេ ឡារ៉ូវ បាននិយាយ នៅថ្ងៃអាទិត្យថា ប្រទេសរុស្ស៊ី គឺបានត្រៀមខ្លួនរួច ជាស្រេចហើយ ដើម្បីធ្វើអ្វីគ្រប់បែបយ៉ាង ដែលខ្លួនអាចបញ្ចុះបញ្ចូលគ្រប់ភាគីទាំងអស់ នៅក្នុងប្រទេស អ៊ុយក្រែន ដើម្បីឲ្យដោះស្រាយ វិបត្តិតាមវិថីសន្តិភាព ។
ទីភ្នាក់ងារព័ត៌មានចិន ស៊ិនហួ ចេញផ្សាយ កាលពីរាត្រីថ្ងៃអាទិត្យ ទី២៥ ខែមករា ឆ្នាំ២០១៥ បានឲ្យដឹង ដោយផ្អែក តាមកិច្ចសន្ទនា តាមទូរស័ព្ទរវាងលោក ឡារ៉ូវ ជាមួយរដ្ឋមន្ត្រីការបរទេស អាម៉េរិក លោក ចន ឃឺរី ដោយលោក ឡារ៉ូវ សង្កត់ធ្ងន់ថា «លទ្ធផលពិតប្រាកដ» នៃដំណោះស្រាយរីកចម្រើន អាចសម្រេចទៅតាម គឺតាមរយៈកិច្ចពិភាក្សា ដោយ ផ្ទាល់ រវាងភាគីជម្លោះនៅក្នុងប្រទេសអ៊ុយក្រែន ។
លោក ឡារ៉ូវ ត្រូវបានដកស្រង់សម្តី ដោយបាននិយាយថា «រដ្ឋាភិបាលទីក្រុង គៀវ បានងាកចេញយ៉ាងឆ្ងាយ ពីដំ ណោះស្រាយដោយសន្តិភាព និងបានបញ្ជាក់យ៉ាងច្បាស់ អំពីការប្រើប្រាស់អំពើហិង្សា បង្ក្រាបនៅភាគខាងកើតអ៊ុយ ក្រែន»។
ជាមួយគ្នានោះដែរ លោកបានអំពាវនាវ ឲ្យសហរដ្ឋអាម៉េរិក ត្រូវប្រើប្រាស់ឥទ្ធិពល ទៅលើអាជ្ញាធររដ្ឋាភិបាលទីក្រុង គៀវ និងបញ្ចុះបញ្ចូលពួកគេ កុំឲ្យងាកមកប្រើប្រាស់យោធា ក្នុងការដោះស្រាយបញ្ហាទៀត ។
ស្ថានការណ៍ នៅអ៊ុយក្រែន គឺកាន់តែអាក្រក់ទៅ ដែលនេះជាលទ្ធផលនៃការវាយប្រហារ ដែលដឹកនាំដោយកងកម្លាំង អ៊ុយក្រែន ដែលបានរំលោភបំពាន កិច្ចព្រមព្រៀងទីក្រុង មីនស្កិ៍ ។
ខណៈនោះដែរ រដ្ឋមន្ត្រីការបរទេសរុស្ស៊ីរូបនេះ ក៏បានចោទប្រកាន់រដ្ឋាភិបាលទីក្រុងគៀវថា
បានបរាជ័យ ក្នុងការដក សព្វាវុធធុនធ្ងន់របស់ខ្លួន ចេញពីសមរភូមិ ដោយអនុលោមតាមកិច្ចចរចានៅទីក្រុង មីនស្កិ៍ និងកិច្ចព្រមព្រៀងថ្មីៗដែល ធ្វើឡើង ដោយរដ្ឋមន្ត្រីការបរទេស អាល្លឺម៉ង់ រុស្ស៊ី បារាំង និងអ៊ុយក្រែនខ្លួនឯង ៕
