ភ្នំពេញ៖ម៉ូតូរ៉ឺម៉កដឹកត្រីមួយគ្រឿងបានក្រឡាប់ផ្ងារជើងកិនពីលើម៉ូតូសេ១២៥ ដោយសារយុវជនម្នាក់ជិះរ៉ឺម៉កម៉ូតូលឿនបត់ឆ្លងផ្លូវខ្វះការប្រុងប្រយ័ត្នក៏ជ្រុលទៅបុកចំម៉ូតូសេ១២៥ពេញទំហឹង កាលពីវេលាម៉ោង១១និង៣០នាទី ព្រឹកថ្ងៃទី២០ ខែមីនា ឆ្នាំ២០១៤ នៅចំណុចខាងជើងមជ្ឈមណ្ឌលម៉ូឌិន៥ ជាង១០០ម៉ែត្រ តាមបណ្តោយផ្លូវជាតិលេខ៥ ស្ថិតក្នុងភូមិសាមគ្គី សង្កាត់ឬស្សីកែវ ខណ្ឌឬស្សីកែវ រាជធានីភ្នំពេញ។
ប្រជាពលរដ្ឋឃើញហេតុការណ៍ខាងលើនេះប្រាប់ឲ្យដឹងថា មុនពេលមានគ្រោះថ្នាក់ចរាចរណ៍នេះ គឺយុវជនម្នាក់បានបើកម៉ូតូរ៉ឺម៉កដឹកធុងត្រីមួយគ្រឿង ដឹកម្តាយ និងបងស្រី ធ្វើដំណើរតាមបណ្តោយផ្លូវជាតិលេខ៥ ទិសដៅពីជើងទៅត្បូង ក្នុងល្បឿនលឿន ហើយពេលដល់ចំណុចខាងលើ ស្រាប់តែយុវជនរូបនោះបានទាញចង្កូតម៉ូតូបត់ឆ្វេងឆ្លងផ្លូវ ក្នុងបំណងត្រឡប់ថយក្រោយ ប៉ុន្តែស្របពេលដែលស្ត្រីម្នាក់កំពុងជិះម៉ូតូ សេ១២៥ ពណ៌ខ្មៅ ពាក់ស្លាកលេខ ភ្នំពេញ 1BU-9377 ទិសដៅពីត្បូងទៅជើង ក៏ត្រូវភាគីម៉ូតូរ៉ឺម៉កបុកចំពាក់កណ្តាលម៉ូតូរបស់នាង បណ្តាលឲ្យរ៉ឹម៉កនិង ម៉ូតូដួលកិនពីលើគ្នារងការខូចខាតទាំងសង្ខាង ប៉ុន្តែនៅក្នុងហេតុការណ៍នោះមិនបណ្តាលឲ្យភាគីណាម្នាក់ត្រូវរងរបួសធ្ងន់ធ្ងរនោះទេ។
ប្រភពព័ត៌មានពីប្រជាពលរដ្ឋប្រាប់បន្តថា អ្វីដែលជាការកត់សំគាល់ ក្រោយពីកើតហេតុភាគីទាំងពីរមិនព្រមព្យាយាមសម្របសម្រួលគ្នា ដើម្បីបញ្ចប់រឿងនោះទេ បែរជាបញ្ចេញកំហឹងដាក់គ្នា បង្កការភ្ញាក់ផ្អើលដល់អ្នកដំណើរ និងប្រជាពលរដ្ឋជាច្រើននាក់ចោមរោមមើល ហេតុការណ៍ បណ្តាលឲ្យមានការកកស្ទះចរាចរណ៍នៅត្រង់ចំណុចកើតហេតុអស់រយះពេលជាង១ម៉ោង ទើបមានសមត្ថកិច្ចមូលដ្ឋានចុះមកអន្តរាគមន៍។ ចំពោះករណីនេះនគរបាលមូលដ្ឋានដែលចុះដល់កន្លែងកើតហេតុបានបញ្ជាក់ថា ភាគី ទាំងពីរសម្រេចចរចារគ្នា បញ្ចប់រឿងនៅនឹងកន្លែងកើតហេតុតែម្តង ដោយមិនរំខានដល់សមត្ថ កិច្ចយើងឡើយ ។
ដោយឡែកករណីគ្រោះថ្នាក់ចរាចរណ៍ខាងលើនេះ គឺបង្កឡើងដោយសារម្ចាស់ម៉ូតូរ៉ឺម៉កដឹកធុងត្រីបត់ឆ្វេងឆ្លងផ្លូវមិនបញ្ចេញភ្លើងសញ្ញា និងគ្មានការប្រុងប្រយ័ត្ន ទើបបណ្តាលឲ្យកើតមានហេតុការណ៍គ្រោះថ្នាក់ចរាចរណ៍ខាតបង់ពេលវេលា ក៏ដូចជាខូចខាតទ្រព្យសម្បត្តិខ្លួនឯងផងដែរ។ ដូច្នេះដើម្បីចៀសវាងករណីគ្រោះថ្នាក់ចរាចរណ៍ដូចខាងលើ សូមអ្នកបើកបរយានយន្តទាំងអស់ ត្រូវបង្កើនការប្រុងប្រយ័ត្នឲ្យបានខ្ពស់បំផុត៕
