ខេត្តសៀមរាបៈ កាលពីរសៀលថ្ងៃទី២៦ ខែមករា ឆ្នាំ២០១៥ កំលាំងនគរបាលប្រឆាំងបទល្មើសសេដ្ឋកិច្ចខេត្តសហការជាមួយមន្ទីរសុខាភិបាលខេត្ត ដឹកនាំដោយលោកវរសេនីយ៍ឯក អ៊ុំ អមរា ស្នងការរងទទួលបន្ទុកបទល្មើស បានចុះធ្វើការត្រួតពិនិត្យនិងឆែកឆេរគ្លីនិកឯកជនមួយកន្លែងដែលមានទីតាំងនៅក្នុងភូមិមណ្ឌល១ សង្កាត់ស្វាយដង្គំ ក្រុងសៀមរាប។
ទីតាំងគ្លីនិកដែលត្រូវបានឆែកឆេរនោះយីហោ «យ៉ា ស៊ីន»។ ការពិនិត្យឆែកឆេរនោះសមត្ថកិច្ចដកហូតបានឱសថជាប្រភេទថ្នាំចាក់ចំនួន២២មុខ ស្មើនឹង៧២៦០អំពូល និងថ្នាំគ្រាប់ចម្រុះ៧៩មុខ ស្មើ២៦០៩០គ្រាប់ និងស៊ីរ៉ូម៣មុខ ស្មើ២១០ដប ។
លោកវរសេនីយ៍ឯក សឿន សេន នាយការិយាល័យប្រឆាំងបទល្មើសសេដ្ឋកិច្ចនៃស្នងការដ្ឋាននគរបាលខេត្តសៀមរាបបានអោយដឹងថាដោយអនុវត្តជាប្រចាំតបតាមការយកចិត្តទុកដាក់ខ្ពស់ពីសំណាក់លោកឩត្តមសេនីយ៍ទោ សត ណាឌី ស្នងការនគរបាលខេត្តសៀមរាប ក៏ដូចជាធានាឱ្យបាននូវសុខុមាលភាពល្អរបស់បងប្អូនប្រជាពលរដ្ឋផងនោះសមត្ថកិច្ចរបស់លោកដោយសហការជាមួយមន្ទីរសុខាភិបាលខេត្តតែងតែបានយកចិត្តទុកដាក់ចុះធ្វើការត្រួតពិនិត្យនិងឆែកឆេរជាប្រចាំលើទីតាំងដែលមានការសង្ស័យថាបាននឹងកំពុងប្រើប្រាស់នូវឱសថហួសកាលកំណត់និងមិនបានចុះបញ្ជីការដើម្បីធ្វើការដាក់ពិន័យទៅតាមច្បាប់។
លោកបន្ថែមថា គ្លីនិកយ៉ាស៊ីនដែលត្រូវបានពិនិត្យឆែកឆេរនោះគឺគ្រប់គ្រងដោយគ្រូពេទ្យចិនឈ្មោះ HUANG GUI YUE ភេទស្រី អាយុ៤៣ឆ្នាំ ជាជនជាតិចិន កាន់លិខិតឆ្លងដែនលេខG20100415 បានចូលមករកស៊ីនៅកម្ពុជាថ្ងៃទី១៦ ធ្នូ ២០១៤ ផុតកំណត់នៅថ្ងៃទី២២ ធ្នូ ឆ្នាំ២០១៥។
គ្រូពេទ្យចិនរូបនេះបានមកបើកគ្លីនិកយ៉ាស៊ីន ដែលត្រូវគេស្គាល់ថាមានឯកទេសផ្នែកជំងឺច្រមុះនៅក្នុងខេត្តសៀមរាបអស់រយៈពេលជាង៣ឆ្នាំមកហើយ តែក៏ត្រូវបានខាងមន្ទីរសុខាភិបាលចុះមកធ្វើកិច្ចសន្យាឱ្យបញ្ឈប់២លើកមកហើយដែរក្នុងឆ្នាំ២០១៤ ប៉ុន្តែនៅមិនរាងចាលទៀត ក៏លួចព្យាបាលបន្តរហូតមកដល់ថ្ងៃទី២៦ ខែមករានេះ ជាលើកទី៣៕ដោយខេងឧត្តម
