បុរសម្នាក់ដែលមានជម្ងឺសរសៃប្រសាទ ជាយូរឆ្នាំមកហើយនោះ ត្រូវម្ដាយសំរេចចិត្ត យកច្រវាក់ដាក់ភ្ជាប់ដៃ ជើង ដោយសារទ្រាំលែងបាន ដោយបុរសខាងលើ បានវាយនិងបំផ្លាញទ្រព្យសម្បត្តិ ហើយបានគំរាមលើក្រុមគ្រួសារផងដែរ ។
ពាក់ព័ន្ធនឹងករណីខាងលើនេះ បងស្រីឈ្មោះ សែន ណី អាយុ៣៦ឆ្នាំ ត្រូវជាបងបង្កើតបុរសខាងលើ បានរៀបរាប់ទាំងអួលដើមករថា ប្អូនប្រុសគាត់មានជម្ងឺសរសៃប្រសាទនេះ មានឈ្មោះ សែន ផល្លី ហៅ ក្លី អាយុ៣៣ឆ្នាំ មានទីលំនៅក្នុងភូមិសាម៉ ឃុំខ្សែត្រ ស្រុកកំពង់រោទិ៍ មិនទាន់មានគ្រួសារទេ ។
បងស្រី សែន ណី បានបន្តទៀតថា កាលពីជាង៧ឆ្នាំមុន ប្អូនប្រុសរបស់គាត់ បានប្រឡងជាប់បាក់ឌុប ហើយ ក៏បានបន្តការសិក្សា នៅសកលវិទ្យាល័យរាជធានីភ្នំពេញ បានរយះពេល២ឆ្នាំ ។ ក្រោយមក ដោយជីវភាពមានការខ្វះខាត ក៏សំរេចចិត្តបញ្ចប់ការសិក្សា ទៅធ្វើជាកម្មករសំណង់ នៅរាជធានីភ្នំពេញ ហើយបាន មកធ្វើការនៅក្រុងបាវិត ខេត្តស្វាយរៀង ក៏មានមិត្តភ័ក្ត្រនាំគ្នាជួបជុំផឹកស៊ីរាល់ថ្ងៃ និងសង្ស័យមានលេងថ្នាំផងដែរ ។ បន្ទាប់មក ស្រាប់តែប្អូនប្រុសគាត់ និយាយលែងដឹងខុសត្រូវ និងបានវាយកំទេចសម្ភារះទ្រព្យសម្បត្តិ របស់ក្រុមគ្រួសារ ធ្វើឲ្យម្ដាយមានការសង្ស័យ ខ្លាចត្រូវអំពើររបស់គេ ក៏យកកូនទៅមើលរហូតលក់ដី ស្រែមួយចំនួន និងយកទៅព្យាបាលនៅមន្ទីរពេទ្យ បង្អែកជីភូ ក្រុងបាវិត ត្រូវបានគ្រួពេទ្យអោយថ្នាំសរសៃប្រសាទ មកលេប ប៉ុន្តែហាមមិនអោយផឹកគ្រឿងស្រវឹងនោះទេ ខ្លាចជម្ងឺរើឡើងវិញ ។
ប្រភពដដែលបន្តថា ក្រោយពីបានផឹកថ្នាំសរសៃប្រសាទ បានរយះពេលមួយឆ្នាំ ប្អូនប្រុសក៏មានស្មារតីធម្មតា ដឹងខុសត្រូវឡើងវិញ ហើយជួយធ្វើការម្ដាយនិងបងស្រី ធ្វើឲ្យពួកគាត់សប្បាយចិត្តយ៉ាងខ្លាំង ។ ប៉ុន្តែក្រោយពីបានស្គាល់មិត្តភ័ក្ត្រ ក៏នាំគ្នាផឹកស្រាទៀត ធ្វើឲ្យជម្ងឺសរសៃប្រសាទ រើរឡើងខ្លាំងជាងមុន ដើរអុកឡុក និងវាយកំទេចរបស់របរអ្នកភូមិ ធ្វើឲ្យម្ដាយពិបាកចិត្តទ្រាំលែងបាន ក៏សម្រេចចិត្តដាក់ច្រវាក់ដៃជើង និងរើអីវែអីវ៉ាន់ ទៅរស់នៅក្នុងភូមិផ្សែងទៀត ព្រោះមិនអាចទ្រាំមើលកូនវេទនាបែបនេះ ។
យោងតាមអ្នកភូមិ បានឲ្យដឹងថា ក្រោយពីម្ដាយបានចាកចេញទៅរស់នៅក្នុងភូមិផ្សេងនោះ ក៏មានបងស្រីបង្កើតឈ្មោះ សែន ណី មានទីលំនៅក្បែរភូមិ-ឃុំ យកម្ហូបអាហារ មករៀបឲ្យហូបជាប្រចាំ ប៉ុន្តែបើថ្ងៃណាជម្ងឺធ្វើទុក្ខ បុរសខាងលើ បានស្រែកជេរ វាយចានឆ្នាំង និងបានគំរាមដុតផ្ទះថែមទៀតផង ធ្វើឲ្យអ្នកភូមិ មានការភ័យខ្លាចបុរសខាងលើជាខ្លាំង ។
បងស្រី សែន ណី ត្រូវជាបងបង្កើតរបស់បុរស មានជម្ងឺប្រសៃប្រសាទខាងលើ បានសំណូមពរដល់មន្ទីរដែលពាក់ព័ន្ធដែលមានចិត្តអាណិតអាសូរដល់គ្រួសារគាត់ មេត្តាមកជួយដល់ប្អូនប្រុសរបស់គាត់ និងជួយយកទៅព្យាបាលផង ព្រោះគាត់អស់លទ្ធភាព ក្នុងការមើលថែហើយ ព្រោះជម្ងឺប្អូនគាត់ កាន់តែធ្វើទុកខ្លាំងទ្បើងៗជារៀងរាល់ថ្ងៃ ៕
