ភ្នំពេញ ៖ បុរសចំណាស់ម្នាក់កំពុងតែបើករថយន្តតាមបណ្ដោយផ្លូវក៏ត្រូវជនខ្មាំងកាំភ្លើង២នាក់ជិះម៉ូតូមួយគ្រឿងដេញតាមនិងបានដកកាំភ្លើងបាញ់មួយចង់ធ្វើឃាតតែមិនបានសម្រេច ព្រោះតែការបាញ់មួយគ្រាប់នោះមិនចំគោលដៅល្អ ក៏ធ្លាយកញ្ចក់ពីម្ខាងទៅម្ខាងបណ្ដាលអោយមានការភ្ញាក់ផ្អើលដល់កម្លាំងកងរាជអាវុធហត្ថចុះអន្តរាគមន៍ភ្លាមៗ ក្រោយពីកើតហេតុខាងលើជនខ្មាន់កាំភ្លើងជិះគេចខ្លួនបាត់បន្ទាប់ពីបានធ្វើសកម្មភាពហើយ។ ហេតុការណ៍បាញ់ប្រហារខាងលើនេះបានកើតឡើងកាលពីវេលាម៉ោង៩និង០០នាទីយប់ថ្ងៃទី១០ខែកុម្ភៈឆ្នាំ២០១៤ស្ថិតត្រង់ចំណុចទល់សាលាបឋមសិក្សា ទួលគោក តាមបណ្ដោយផ្លូវ២៨៩ ក្នុងសង្កាត់បឹងកក់២ ខណ្ឌទួលគោក។
តាមការឱ្យដឹងពីបុរសដែលត្រូវខ្មាន់កាំភ្លើងប៉ងធ្វើឃាតនេះគាត់ឈ្មោះ ជា សំឡេង អាយុ៦៣ឆ្នាំមុខរបរជាជាងជួសជុលរថយន្ត ស្នាក់នៅក្នុងសង្កាត់ទឹកល្អក់២ ខណ្ឌទួលគោក គាត់បានអោយដឹងថា មុនដំបូងគាត់ទើបតែត្រឡប់មកពីស្គន់ ទៅជួសជុលរថយន្តគេហើយត្រឡប់ទៅផ្ទះវិញ ក៏ធ្វើដំណើរតាមបណ្ដោយផ្លូវកើតហេតុខាងលើ ខណៈមកដល់ចំណុចកើតហេតុនេះ គាត់កំពុងជិះរថយន្តក្នុងទិសដៅពីជើងទៅត្បូង
ក្នុងល្បឿនលឿនល្មម ស្រាប់តែពេលនោះគាត់ឮសម្លេងផ្ទុះមួយចូលក្នុងរថយន្តរបស់គាត់ គាត់មិនដឹងជាសម្លេងអ្វីនោះទេ ហើយគាត់ស្មានតែគេគប់កញ្ចក់រថយន្តរបស់គាត់ ខណៈនោះគាត់ក៏បានឈប់រថយន្តមើលទើបដឹងថា កញ្ចក់រថយន្តរបស់គាត់មិនមែនគេគប់នោះទេ គឺស្នាមគ្រាប់កាំភ្លើងតែម្ដងព្រោះថាកញ្ចក់រថយន្តគាត់ រួមទាំងរូបគាត់ពេលដែលកំពុងបើករថយន្តក៏ត្រូវគ្រាប់កាំភ្លើងបាញ់ធ្លុះពីម្ខាងទៅម្ខាងហើយខ្ទាតមកត្រូវនឹងបបូរមាត់របស់គាត់បណ្ដាលអោយរងរបួស សំណាងហើយដែលគ្រាប់កាំភ្លើងនេះមិនត្រូវចំណុចដែលខ្មាន់កាំភ្លើងចង់ធ្វើឃាតនោះ
។ ហើយយោងតាមប្រភពព័ត៌មានដែលជាសន្តិសុខដែលឈរយាមនៅក្បែរកន្លែងកើតហេតុនេះបានឱ្យដឹងថា គាត់ក៏បានឃើញហេតុការណ៍នេះ គឺមានបុរស២នាក់ស្លៀកពាក់ខោអាវពណ៌ខ្មៅ ហើយពាក់មួយសុវត្តិភាពទាំង២ រួចជិះម៉ូតូមួយគ្រឿងម៉ាកឌ្រីមសង់C125 ពណ៌ខ្មៅ មិនចាំស្លាកលេខ បានធ្វើដំណើរដេញតាមរថយន្តមួយគ្រឿងម៉ាកRav4 ពណ៌ស្ករ ពាក់ស្លាកលេខ ភ្នំពេញ 2T-9565 ពីក្រោយរហូតមកដល់ចំណុច
ខាងលើក៏បុរស២នាក់នោះបានដកកាំភ្លើងចេញពីចង្កេះភ្ជង់ទៅកន្លែងអ្នកបើករថយន្តហើយក៏បានបាញ់មួយគ្រាប់ត្រូវរថយន្តនោះរួចបុរសទាំង២នាក់នោះបានជិះម៉ូតូគេចខ្លួនបាត់ស្រមោលភ្លាមៗពីកន្លែងកើតហេតុតែម្ដង។ ក្រោយពេលកើតហេតុប្រហែលជា១០នាទីកម្លាំងកងរាជអាវុធហត្ថខណ្ឌទួលគោកបានចុះអន្តរាគមន៍ដល់កន្លែងភ្លាមៗបាននាំបុរសរងគ្រោះខាងលើទៅធ្វើការសាកសួរនៅមូលដ្ឋាន
កងរាជអាវុធហត្ថ អោយច្បាស់ពីហេតុការណ៍នេះ។ ជំហ៊ានដំបូងសមត្ថកិច្ចបានសន្និដ្ឋានថាករណីខាងលើនេះជារឿងគំនុំក៏ថាបាន ព្រោះថា ជនខ្មាន់កាំភ្លើងបាញ់ចង់ធ្វើអត្តឃាតនេះគឺចង់សម្លាប់មនុស្សតែម្ដង ក៏ប៉ុន្តែវាជាសំណាងល្អដែលគ្រាប់កាំភ្លើងមិនត្រូវម្ចាស់រថយន្តខាងលើនេះ។គួរបញ្ជាក់ផងដែរថា ចំពោះហេតុការណ៍នេះក៏ស្រដៀងនិងការធ្វើឃាតកូនថៅកែហង្សនាគដែលត្រូវក៏បានខ្មាន់កាំភ្លើងបាញ់សម្លាប់នៅត្រង់ចំណុចខាងលើនេះផងដែរ ហើយបច្ចុប្បន្នសមត្ថកិច្ចនៅមិនទាន់វែករកមុខក្រុមឃាតករទាំងនោះបាននៅឡើយទេ៕
