ឧត្តរមានជ័យ កម្មករស៊ីឈ្នួលបើកគោយន្តកន្ត្រៃដឹកឈើគ្រឿងផ្ទះត្រូវបានមន្ត្រីកងរាជអាវុធហត្ថប្រចាំ ស្នាក់ការ សន្តិសុខ អ.២០៦ ប្រចាំនៅព្រំប្រទល់ខេត្តឧត្តរមានជ័យនិងខេត្តព្រះវិហារដកអាវុធខ្លីអាមេគំរាមបាញ់សម្លាប់ តែក្រោយមកមន្ត្រីកងរាជអាវុធហត្ថបានវាយនិងទាត់រហូតដល់សន្លប់ បន្ទាប់មកទៀតទៅវាយម្ចាស់គោយន្តស្ទើរស្លាប់ស្ទើររស់និងនាំខ្លួនទៅទីស្នាក់ការគំរាមកំហែងជំរិតទារលុយ១០០០$ រហូតដល់ជនរងគ្រោះអង្វរកនៅសល់ត្រឹម២លាន៨០ម៉ឺនរៀល។
ហេតុការណ៍ខាងលើបានកើតឡើង នាវេលាម៉ោង១យប់ថ្ងៃទី២៨ ខែមករា ឆ្នាំ២០១៥ កន្លងទៅ លើកំណាត់ផ្លូវជាតិ RP174 ស្ថិតនៅក្នុងភូមិត្រាំចាន ឃុំព្រះប្រឡាយ ស្រុកត្រពាំងប្រាសាទ ខេត្តឧត្តរមានជ័យ។
ជនបង្ករ ជាមន្ត្រីកងរាជអាវុធហត្ថត្រូវបានគេស្គាល់ឈ្មោះ អ៊ុន ចាន់ថា ហៅ ថុល មានឋានន្តរស័ក្កជាអនុសេនីយ៍ទោមុខងារផ្នែកសេដ្ឋកិច្ចរកលុយចូលអង្គរភាព។ ជនរងគ្រោះ១.ឈ្មោះ វិចិត្រ អាយុ២១ឆ្នាំ រស់នៅភូមិរមាត ឃុំស្លែងស្ពាន ស្រុកស្រីស្នំ ខេត្តសៀមរាប រងរបួសសន្លប់ ២.ឈ្មោះ ខន ឈួញ អាយុ៣៧ឆ្នាំ ជាម្ចាស់គោយន្តកន្ត្រៃរងការវាយដំយ៉ាងធ្ងន់ធ្ងរនិងមានអ្នករួមដំណើរម្នាក់ទៀតឈ្មោះ សេក សឿង អាយុ៣៦ឆ្នាំ រងរបួសស្រាល អ្នកទាំងបីររស់នៅភូមិ ឃុំជាមួយគ្នា។
មុនពេលកើតហេតុជនរងគ្រោះទាំងបីរនាក់ខាងលើបានរៀបរាប់អោយដឹងថានៅម៉ោងកើតហេតុខាងលើពួកគាត់កំពុងតែបើកគោយន្តកន្ត្រៃ ផ្ទុកឈើគ្រឿងផ្ទះជាង២ម៉ែត្រគូបនៅលើដងផ្លូវ ស្រាប់តែឃើញ មន្ត្រីកងរាជអាវុធហត្ថ មានឈ្មោះខាងលើបានជិះរថយន្តម៉ាក HILLUX មួយបាំងកន្លះ ពណ៍សរ ពាក់ស្លាកលេខ ភ្នំពេញ 2A. 1552 មកពាំងពីខាងមុខគោយន្តដែលកំពុងតែរត់យ៉ាងលឿន ជ្រុលទៅប៉ះកាងរថយន្តពីខាងក្រោយបន្តិចបន្តួចធ្វើអោយមន្ត្រីប៉េអឹមផ្ទុះកំហឹងឈានដល់ការវាយតប់មកលើពួកគាត់ និង គំរាមប្រមាថបាញ់សម្លាប់ចោលទៀតផង។
លោក អ៊ុន ចាន់ថា ហៅ ថុល ជាមន្ត្រីកងរាជអាវុធហត្ថបានអោយដឹងតាមទូរស័ព្ទថាជារៀងរាល់លើកនៅពេលយប់តែងតែមានសកម្មភាពចោរលួចធុងទឹកកកអ្នកលក់នៅតាមចញ្ចើមផ្លូវបាត់ជាហូរហែររៀងរាល់យប់លោកតែងតែដើរល្បាតរហូត នៅយប់កើតហេតុលោកបានបើករថយន្តទៅឈប់នៅខាងមុខគោយន្តដឹកឈើក៏ជ្រុលមកបុករថយន្តរបស់លោកខូចខាតផ្នែកកាងខាងក្រោយធ្វើអោយមន្ត្រីកងរាជអាវុធហត្ថរូបនោះទប់កំហឹងមិនបានក៏ជ្រុលវាយអស់ម្នាក់២ទៅ៣ដៃទៅលើជនរងគ្រោះទាំង៣នាក់ខាងលើ៕
