សៀមរាប៖លោកស្រីវរសេនីយ៍ទោដួងថាវរីបានថ្លែងអះអាងថាកម្លាំងជំនាញនិងបន្តបង្ក្រាបហាងម៉ាស្សាលួចលាក់បំរើសេវាផ្លូវភេទរហូតមិនអនុញាត្តឲ្យមាននៅក្រុងសៀមរាបជាដាច់ខាត។ ការថ្លែងបែបនេះនៅក្នុងឧិកាសដែលលោកស្រីបានអនុញាត្តឲ្យក្រុមអ្នកកាសែតធ្វើការបទសម្ភាសន៍កាលពីព្រឹកម៉ិញនេះនៅស្នងការនគរបាលខេត្តសៀមរាបបន្ទាប់ពីកម្លាំងជំនាញរបស់លោកស្រីបានឃាត់ខ្លួននារី១០នាក់សង្ស័យរកស៊ីផ្លូវភេទ។
ស្ត្រីអង្គុយចាំបំរើអារម្មណ៏ភ្ញៀវពេលរាត្រីនៅក្នុងហាងម៉ាស្សាចំនួន១០នាក់ដែលសង្ស័យថាមានលួចលាក់បំរើសេវាផ្លូវភេទ(វ៉ៃស៊ិច)បានត្រូវកម្លាំងការិយាល័យនគរបាលប្រឆាំងការជួញដូរមនុស្ស និងការពារ អនីតជន ឃាត់ខ្លួនយកទៅសាកសួរ អប់រំនិងធ្វើកិច្ចសន្យា។ ការឃាត់ខ្លួនស្ត្រីសង្ស័យ១០នាក់ខាងលើនេះ ធ្វើឡើងនាម៉ោងជាង១០យប់ថ្ងៃទី១៩ខែមិនា នៅចំណុច ផ្លូវ៣០ម៉ែត្រ ក្នុងភូមិត្រពាំងសេះ សង្កាត់គោកចកក្រុងសៀមរាប។ ដែលដឹកនាំដោយលោកសំរិទ្ធិ សុខុន ព្រះរាជ អាជ្ញារងអមសាលាដំបូងខេត្ត។
ស្ត្រីចំនួន១០នាក់ដែលបានឃាត់ខ្លួន មានភាគច្រើជាជនជនជាតិវៀតណាម។ លោកស្រីវរសេនីយ៏ទោ ដួង ថាវរី នាយការិយាល័យនគរបាលប្រឆាំងការជួញដូរមនុស្សនិងការពារ អនីតិជនខេត្តបានឲ្យដឹងថា ដោយទទួលព័ត៏មានពីពលរដ្ឋក្បែរខាង និងមានការស៊ើបអង្កេតពីជំនាញផង កម្លាំងបានចុះពិនិត្យហើឈានទៅឃាត់ខ្លួនស្ត្រីសង្ស័យ១០នាក់ មានវៀតណាម២នាក់ នៅក្នុងហាងម៉ាស្សា៦កន្លែង តាមដងផ្លូវ៣០ម៉ែត្រ។
លោកស្រីបន្តថា សៀមរាបជាក្រុងទេសចរណ៏ សេវាបំរើផ្លូវភេទ ជាមួយការប្រទាញប្រទង់ បែបនេះវាបង្កអស្ថេរភាពក្នុងសង្គមយ៉ាងខ្លាំង។ បើទោះបីជាហាងម៉ាស្សាទាំង៦កន្លែងខាងលើ ពុំមានថៅកែពិត ប្រាកដ តែពួកគាត់បានជួលបន្ទប់ស្នាក់នៅ ហើយបង្កើតហាងម៉ាស្សាដោយខ្លួនឯង ដើម្បីរងចាំលួចលាក់បំរើ សេវាផ្លូវភេទ។ ហេតុដូច្នេះក្នុងនាមសមត្ថកិច្ចជំនាញ ចាំបាច់ត្រូវបង្ក្រាប រាល់អំបើអាណាចារគ្រប់ប្រភេទ។
លោកស្រី បានបន្តថា ហាងម៉ាស្សានៅក្នុងក្រុងសៀមរាប នាបច្ចុប្បន្នមានច្រើនកន្លែងណាស់ តែហាង មួយចំនួនធំពួកគាត់មានច្បាប់ ដែលចេញដោយច្រកចេញចូលតែមួយរបស់សាលាក្រុងសៀមរាប។ ពួកគាត់ មានច្បាប់ធ្វើអាជីវកម្ម ម៉ាស្សា ប៉ុន្តែបើយើងស៊ើបអង្កេតឃើញថា ហាងមួយណាមានលួចលាក់បំរើសេវាផ្លូវភេទ នឹងចុះបង្ក្រាបភ្លាម ហើយអាចបិទអាជីវកម្មនោះជាបណ្តោះអាសន្នទៀត។
លោកស្រីនាយការិយាល័យ បញ្ជាក់ថា ចំពោះនារី១០នាក់ដែលឃាត់ខ្លួននៅហាងម៉ាស្សាខាងលើ គឺប្រ គល់ឲ្យមន្ទីរសង្គមកិច្ចយកទៅអប់រំនិងធ្វើកិច្ចសន្យា។ ដោយឡែកអាជីវកម្មរបស់ពួកគាត់ គឺត្រូវបិទជាបណ្តោះ អាសន្ន។ លោកស្រីលាន សុភា អនុប្រធានការិយាល័យសុខភាពសង្គម នៃមន្ទីរសង្គមកិច្ចខេត្ត ក៏បានបញ្ជាក់ដែរ ថាក្រោយទទួលពួកគាត់(នារីម៉ាស្សា)ទាំង១០នាក់ទៅ ខាងលោកស្រីនឹងព្យាយាមពន្យល់ពួកគាត់ឲ្យចេះកែប្រែ នូវមុខរបរដែលសង្គមស្អប់ខ្ពើម។ ដោយឲ្យពួកគាត់ចាប់យកមុខរបរផ្សេងៗ តាមអ្វីដែលអាចធ្វើទៅបាន។
លោក ស្រីបន្តថា មានស្ត្រីច្រើនណាស់ដែលបានផ្ញាក់ខ្លួនហើយកែប្រែ តួយ៉ាងដូចជាស្ត្រី ដែលចាញ់បោកគេតាមរយៈ ទៅរៀបការប្តីនៅស្រុកចិនជាដើម។ គួរបញ្ជាក់ថា ក្រៅពីហាងម៉ាស្សា៦កន្លែងដែលបានបង្ក្រាបខាងលើ នៅមានហាងម៉ាស្សា រាប់សិប កន្លែងទៀតនៅក្នុងក្រុងសៀមរាប ហើយហាងខ្លះត្រូវបានប្រភពទម្លាយថា មានមន្ត្រីពាក់ពន្ធ័មួយចំនួនបានដើរ ដាក់ខែ ទៀតផង។
