ប្រជាពលរដ្ឋពេញក្រុងសំរោង មានការភ្ញាក់ផ្អើលយ៉ាងខ្លាំង បន្ទាប់ពីប្រធានមន្ទីរធម្មការ និងសាសនា ខេត្តឧត្តរមានជ័យ បានចាប់ផ្សឹកព្រះសង្ឃ ៣អង្គ នៅក្នុងវត្ដធម្មសណ្ដោសពុទ្ធិវិន័យនៃគណៈធម្មយុត្ដិកៈនិកាយខេត្តឧត្តរមានជ័យ ក្នុងនោះក៏មានចៅអធិការវត្តមួយអង្គផងដែរ។
លោក ឆឹម តឿ ប្រធានមន្ទីរធម្មការនិងសាសនាខេត្តឧត្តរមានជ័យបានឱ្យដឹងថា លោកបានចាប់ផ្សឹកព្រះសង្ឃ(ឱ្យលាចាកសិក្ខាបទ) ដោយសារតែព្រះអង្គប្រព្រឹតខុសនឹងវិន័យរបស់ព្រះពុទ្ធសាសនា ហើយថែមទាំងមិនទទួលការអប់រំពីមន្ត្រីសង្ឃឡើយ។
លោកក៏បានលើកឡើងជុំវិញខ្លឹមសារក្នុងសេចក្ដីសម្រេចរបស់គណះសង្ឃនាយកនៃគណះធម្មយុត្ដិកនិកាយនៃព្រះរាជាណាចក្រកម្ពុជាថា៖ មុននឹងឈានដល់ចាប់ផ្សឹកព្រះសង្ឃ ដោយសារព្រះសង្ឃទាំង៣អង្គនេះ ពុំព្រមទទួលយកគោលការណ៍ដឹកនាំរបស់គណៈសង្ឃនាយកនៃគណៈធម្មយុត្តិកនិកាយនិងមានពាក្យប្រមាថមើលងាយដល់គណៈសង្ឃនាយក ធ្វើឱ្យប៉ះពាល់ដល់ព្រះពុទ្ធសាសនា។
ចំពោះករណីចាប់ផ្សឹកព្រះសង្ឃ ៣អង្គ រួមមានព្រះសង្ឃ ទី១ ព្រះនាម អ៊ុំ វិចិត្រ ព្រះជន្ម ៣២វស្សា ជាព្រះចៅអធិការវត្តធម្មសណ្ដោសពុទ្ធវិន័យ ទី២.ភិក្ខុ ឡា ហួរ ព្រះជន្ម២៥ វស្សា និងទី៣.ភិក្ខុឃុន ឆេងព្រះជន្ម២៧វស្សា។
ចំណែកព្រះគ្រូ អឿង សំអាង ព្រះបាឡាត់គណៈខេត្តនៃគណះធម្មយុតក្តិកនិកាយមានសង្ឃដីការថា៖ បញ្ហាខាងដើមនេះវាធ្វើអោយប៉ះពាល់ដល់វិស័យព្រះពុទ្ធសាសនាយ៉ាងធ្ងន់ធ្ងរ ប៉ុន្ដែព្រះសង្ឃទាំង ៣អង្គរួមទាំងចៅអធិការវត្តផងនោះ មិនបានធ្វើខុសនិងសិល្ប៥ គឺលួចទ្រព្យគេ សំលាប់មនុស្ស និងអួតពុទ្ធិរិមនុស្សធម៌ខុសនឹងវិន័យសង្ឃឡើយ ហេតុអ្វីបានជាចោទប្រកាន់ដល់ព្រះសង្ឃ រហូតដល់ចាប់ផ្សឹកព្រះអង្គទៀត បើតាមធម្មវិន័យសង្ឃ គ្រាន់តែត្រូវអាប័ត្រ ហើយអនុវត្តន៍ទៅតាមពុទ្ធសាសនាតែប៉ុំណ្ណោះ។
លោក ចាន់ រៀន អាយុ៤៣ឆ្នាំជាតំណាងឱ្យពុទ្ធបរិស័ទ្ធក្នុងវត្តនៅ ភូមិឈូក ដែលយកចង្ហាន់ទៅប្រគេនព្រះសង្ឃលើកឡើងថា៖ ពួកគាត់មិនពេញចិត្តចំពោះចំណាត់ការរបស់មន្ទីរធម្មការធ្វើដាក់ព្រះសង្ឃបែបនេះឡើយ បើព្រះសង្ឃខុសនិងវិន័យបន្តិចបន្តូច ក៏មិនត្រូវចេញអាកប្បកិរិយា ច្រង៉េងច្រង៉ាង ចាប់ផ្សឹកព្រះសង្ឃ ដូចជាមានរឿងគំនុំអ្វីមួយជាមួយព្រះសង្ឃ ។
មិនតែប៉ុណ្ណោះក៏មានព្រះសង្ឃជាច្រើនអង្គ មកពីវត្តធម្មយុត្តិកនិកាយក្នុងខេត្តឧត្តរមានជ័យ បានទៅតវ៉ា មុខផ្ទះអភិបាលខេត្តដើម្បីអោយអាជ្ញាធរខេត្តជួយ អន្តរាគមន៍ដល់ព្រះសង្ឃទាំង៣អង្គខាងលើ។ ដោយព្រះអង្គមានសង្ឃដីការលើកឡើងថា ព្រះសង្ឃទាំង៣អង្គខាងលើ បានប្រព្រឹត្តអ្វីឱ្យខុសពីច្បាប់សង្ឃឡើយ។
គួរបញ្ជាក់ថា៖ នៅក្នុងវត្តធម្មសណ្ដោសពុទ្ធិវិន័យ នៃគណះធម្មយុត្ដិកនិកាយ ខេត្តឧត្តរមានជ័យនេះ កន្លងមកតែងតែ កើតមានឡើងនូវរឿងអាស្រូវជាយូរមកហើយ ដោយសារភាពមិនចុះសំរុងគ្នារវាងដូនជី និងព្រះសង្ឃនៅក្នុងវត្ដទាំងមូល ហើយហេតុការណ៍ដូចគ្នានេះធ្លាប់ផ្ទុះរឿងឡើងលើព្រះសង្ឃជាចៅអធិការវត្ត៤ជំនាន់មកហើយ៕
