ភ្នំពេញ ៖ ជនសង្ស័យជាចោរលួចម៉ូតូម្នាក់ត្រូវបានកម្លាំងប្រជាការពារភូមិទឹកថ្លាសង្កាត់ទឹកថ្លាចាប់ខ្លួនបានភ្លាមៗរួចយកមកប្រគល់អោយនគបាលប៉ុស្តិ៏ទឹថ្លា បន្ទាប់ពីរួបគេបានធ្វើសកម្មភាពលួចម៉ូតូមិនបានសម្រេច។
ការចាប់ខ្លួនជនសង្ស័យខាងលើនេះបានកើត កាលពីរសៀលថ្ងៃទី២៨ ខែមករា ឆ្នាំ២០១៥ នៅក្នុង ក្រុមទី៧ផ្លូវk4B ភូមិទឹកថ្លា សង្កាត់ទឹកថ្លា ខណ្ឌសែនសុខ។
ជនជាប់ចោទដែលត្រូវបានចាប់ខ្លួននោះឈ្មោះឡុង នី ភេទប្រុសអាយុ២១ឆ្នាំមុខរបរកម្មករសំណង់ស្នាក់នៅផ្ទះជួលក្នុងសង្កាត់ស្ទឹងមានជ័យ។
ចំណែកជនរងគ្រោះមានឈ្មោះឯម រីណា អាយុ៣៣ឆ្នាំជាម្ចាស់ម៉ូតូបាននិយាយឲ្យដឹងថា នៅមុនពេលកើតហេតុគាត់បានចតម៉ូតូរបស់គាត់មួយគ្រឿងម៉ាកស្កូពីពណ៌សលាយខៀវពាក់ស្លាកលេខ ភ្នំពេញ1P 2993 នៅមុខផ្ទះដោយភ្លេចដកយកសោចេញពីម៉ូតូ។
ក្រោយមកក៏ស្រាប់តែជនជាប់ចោទរូបនេះបានមកលួចយកម៉ូតូរបស់ជិះចេញទៅ តែគាត់ឃើញក៏ស្រែកចោរៗឲ្យគេជួយ ពេលនោះក៏មានកម្លាំងប្រជាការពារភូមិដេញចាប់បានភ្លាមៗតែម្តង។
ដោយឡែកជនជាប់សង្ស័យបានសារភាពប្រាប់សមត្ថកិច្ចថា រូបគេពិតជាបានធ្វើសកម្មភាពលួចម៉ូតូពីជនរងគ្រោះពិតប្រាកដមែន ដោយសារតែឃើញម្ចាស់មិនបានដកសោរចេញពីម៉ូតូទើបប្រថុយលួច។ ប៉ុន្តែសំណាងអាក្រក់ត្រូវគេចាប់ខ្លួនបានតែម្តង។
បច្ចុប្បន្នជនសង្ស័យកំពង់ឃាត់ខ្លួននៅអធិការដ្ឋានខណ្ឌសែនសុខដើម្បីក៏សាងសំនុំរឿងបញ្ជួនខ្លួនទៅសាលាដំបូងរាជធានីភ្នំពេញចាត់ការតាមផ្លូវច្បាប់៕
