> បាត់ដំបង: បុរសវ័យចំណាស់ម្នាក់ដែលជាជនស្រវុឹងខួបបានធ្វើអត្តឃាតដោយចង កសំលាប់ខ្លួននៅក្នុងផ្ទះរបស់ខ្លួនផ្ទាល់ កាលពីថ្ងៃទី30-1-15 វេលាម៉ោង1,30នាទីរសៀល ត្រង់ចំនុចភូមិ អន្លង់មៀន ឃុំពេជ្រចិន្តា ស្រុកភ្នំព្រឹក ខេត្តបាត់ដំបង បន្ទាប់ពីបានផឹកស្រាស្រវុឹងហើយបានព្យាយាមសំលាប់ខ្លួនជាច្រើនលើកច្រើនសាររួចមក តែមិនបានសំរេច ។
> លោកសារ៉េត វិសេដ្ឋ អធិការរងនគរបាលស្រុកភ្នំព្រឹកបានលើកឡើងនូវពាក្យសំដី
> របស់សាច់ញាតិនៃសពជនរងគ្រោះនោះថា បុរសវ័យចំណាស់ម្នាក់នេះមានឈ្មោះ ផែ ផល អាយុ45ឆ្នាំ រស់នៅក្នុងកូនខ្ទមមួយត្រង់ចំនុចកើតហេតុ និងជាមនុស្សស្រវុឹងខួបដែលស្ទើរតែបាត់ការចងចាំផងដែរហើយនៅពេលដែលគាត់ផឹកស្រាម្តងៗគឺតែងតែមានគំនិតចង់សំលាប់ខ្លួនជាញឹកញាប់ ប៉ុន្តែត្រូវបានក្រុមគ្រួសារ និងសាច់ញាតិទប់ស្កាត់ ថែមទាំងជួយបានគ្រប់ពេលវេលា ។
លោកអធិការរងបានបន្តថា លុះនៅមុនពេលកើតហេតុជនរងគ្រោះបានចាប់ផ្តើមផឹកសុីដូចសព្វមួយដង ព្រមទាំងមានសភាពស្រវុឹងទន់ទោថែមទៀត គាប់ជួនពេលនោះក្រុមគ្រួសារ និងសាច់ញាតិគ្មានអ្នកណានៅផ្ទះម្នាក់សោះដែលម្នាក់ៗរវល់ការងារស្រែ ចំការទើបជាឱកាស> យ៉ាងល្អបំផុតសំរាប់ជនរងគ្រោះក្នុងការប៉ុនប៉ងធ្វើអត្តឃាតលុះត្រាតែបានសំរេច ។
ក្រោយពេលកើតហេតុពេលដែលក្រុមគ្រួសារត្រឡប់មកវិញក៏ប្រទះឃើញជនរងគ្រោះបានស្លាប់បាត់ទៅហើយដែលគេបានចង កខ្លួនឯងទៅនឹងមេដំបូល ទើបបានរាយការទៅសមត្ថកិច្ច ដើម្បីចុះទៅត្រួតពិនិត្យនៅកន្លែងកើតហេតុគឺសង្គេតឃើញថា ជនរងគ្រោះបានយកខោជើងវែងរបស់ខ្លួនមកធ្វើជាខ្សែសំរាប់ចង ក ហើយខ្លួនឯងសុខចិត្តស្លៀកតែកន្សែងតែប៉ុណ្ណោះ ដោយ សមត្ថកិច្ចបានអះអាងថា ករណីនេះគឺពិតជាការធ្វើអត្តឃាតយ៉ាងពិតប្រាកដ ដោយពុំមានពាក់ព័ន្ធទៅនឹងករណីឃាតកម្មណាមួយឡើយ បន្ទាប់មកសមត្ថកិច្ចក៏បានប្រគល់សពទៅអោយក្រុមគ្រួសារដើម្បីរៀបចំធ្វើបុណ្យតាមប្រពៃណីហើយ ៕
