ខេត្តកំព់ងចាម និងខេត្តត្បូងឃ្មុំ បានត្អូញត្អែរអំពីតម្លៃដំទ្បូងមី ដែលកំពុងតែធ្លាក់ចុះខុសពីឆ្នាំមុនៗកន្លងមក ដោយសារតែទីផ្សារនៅក្នុងស្រុកមានចំនួនតិចតួច គឺមានតែទីផ្សារនៅប្រទេសវៀតណាម ឯការដឹកកសិផលយកទៅលក់នោះ គឺមន្ត្រីចម្រុះនៅច្រកទ្វារទ្វេភាគីដារ ហៅដូងប្រាំពីរដើម ស្ថិតក្នុងឃុំដារ ស្រុកមេមុត និងច្រកព្រំដែនត្រពាំងផ្លុង ស្ថិតក្នុងភូមិត្រពាំង ស្រុកពញាក្រែក ខេត្តត្បូងឃ្មុំ បានតម្រូវឲ្យពួកគាត់ បង់ប្រាក់យ៉ាងច្រើនទៅវិញ ។
ម្ចាស់រថយន្តដឹកដំទ្បូងមីម្នាក់ សុំមិនបញ្ចេញឈ្មោះ បានប្រាប់ឲ្យដឹងថា ទ្បានរបស់គាត់ចណុះ៥តោន ផ្លៅពីរ សមត្ថកិច្ចតម្រូវឲ្យបង់សេវា រត់សេអូ ចំនួន៨ម៉ឺនរៀល រីឯរថយន្តផ្លៅ៤និងផ្លៅ៥ តម្រូវឲ្យបង់ពី១០ទៅ១៣ម៉ឺនរៀល ដែលទង្វើបែបនេះប្រាស់ចាក់ពីបទបញ្ជា របស់ព្រះមុខរាជរដ្ឋាភិបាល ដែលមានសម្តេចអគ្គមហាសេនាបតីតេជោ ហ៊ុន សែន ធា្លប់បានប្រកាស មិនអនុញ្ញាតិឲ្យសម្ថកិច្ចគ្រប់លំដាប់ថ្នាក់ យកកំរៃសេវាពីប្រជាកសិករ ដែលដឹកកសិផលយកទៅលក់នៅតាមទីផ្សារនានា ។
ប្រជាកសិករ បានឲ្យដឹងទៀតថា តម្លៃដំទ្បូងមីស្រស់កាលពីឆ្នាំទៅ អាចលក់បានក្នុងចន្លោះ ពី៣០០រៀល ទៅ៣៤០រៀល ក្នុងមួយគីទ្បូក្រាម ចំណែកតម្លៃក្នុងឆ្នាំនេះ លក់បានតែពី២៧០រៀល ទៅ៣០០រៀលប៉ុណ្ណោះ គឺទាបជាងឆ្នាំទៅ ។
ប្រជាកសិករ បានឲ្យដឹងទៀតថា សំរាប់ការចំណាយដើមទន់ ក្នុងការដាំដំទ្បូងវិញ ក្នុង១ហិចតា អស់ប្រាក់១លានរៀល ហើយបើដំទ្បូងនៅតែចុះថោក ហើយសមត្ថកិច្ចនៅតាមច្រកទ្វារ នៅតែយកកម្រៃសេវាថ្លៃ ពួកគាត់អាចនិងប្រឈមនិងការខ្វះថវិកា បង់ធនាគារ ឬគ្រិះស្ថានហរិញ្ញវត្ថុ ដែលពួកគាត់បានខ្ចីមកចំណាយ ក្នុងពេលដាំដំទ្បូង ។
ពាក់ព័ន្ធនិងតម្លៃចុះថោក របស់ដំទ្បូងមីនេះដែរ លោក ហេង ពិសិទ្ធ ប្រធានមន្ទីរកសិកម្ម ខេត្តត្បូងឃ្មុំ បានប្រាប់ឲ្យដឹងថា មូលហេតុដែលធា្លក់ថ្លៃនេះ គឺដោយសារតែទីផ្សារ មានតែនៅប្រទេសវៀតណាម ចំណែកទីផ្សារក្នុងស្រុក មានចំនួនតិចតួច រីឯផលដំទ្បូងបានកើនទ្បើង ដោយសារតែប្រជាកសិករ សម្រុកដាំដំទ្បូងគ្រប់ៗគ្នា ហើយការប្រមូលផល គឺពួកប្រមូលក្នុងពេលតែមួយ ដែលអាចឲ្យឈ្មួញវៀតណាមទម្លាក់ថ្លៃ ។
ប្រជាកសិករទាំងអស់ ក្នុងខេត្តត្បូងឃ្មុំ និងខេត្តកំពង់ចាម បានសំណូមពរទៅដល់រាជរដ្ឋាភិបាល ឲ្យជួយរកក្រុមហ៊ុន មកវិនិយោគ ផលិតកសិផលដំទ្បូងមី ឲ្យក្លាយជាផលិតផលសម្រាច់នៅក្នុងស្រុក ដើម្បីនាំចេញទៅបរទេស ទើបប្រជាកសិករមានទំនុកចិត្ត ក្នុងការប្រកបមុខរបរដាំដំទ្បូងមីតទៅទៀត ៕
