កំពង់ឆ្នាំង៖ ផ្ទះលោកមេភូមិក្បាលថ្នល់១ខ្នងត្រូវបានអគ្គីភ័យឆាបឆេះអស់ជញ្ជាំងមួយជំហៀង ភ្លាមៗបានអ្នកស្រុកជិតខាងជួយធាក់ជញ្ជាំងចោលពន្លត់ទាន់ កុំអីផ្ទះលោកមេភូមិនឹងក្លាយជាផេះតែម្តង។គ្រោះអគ្គីភ័យនេះ បានកើតឡើងនៅវេលាម៉ោង១២និង៣០នាទីថ្ងៃត្រង់ថ្ងៃទី៣១ ខែមករា ឆ្នាំ២០១៥ នៅភូមិក្បាលថ្នល់ ឃុំតាជេស ស្រុកកំពង់ត្រឡាច នៅពេលដែលលោកមេភូមិជាម្ចាស់ផ្ទះបានយកភ្លើងចំបើងទៅដុតរោលស្រម៉ើលទ្រុងមាន់ជាប់នឹងផ្ទះ ភ្លាត់ស្នៀតក៏ឆេះផ្ទះខ្លួនឯង។
លោកនាយនគរបាលប៉ុស្តិរដ្ឋបាលតាជេសបាននិយាយអោយដឹងថា៖ម្ចាស់ផ្ទះខាងលើនេះជាមេភូមិក្បាលថ្នល់មានឈ្មោះ ឡាច សឿន អាយុ៣៧ឆ្នាំ ផ្ទះដែលឆេះជញ្ជាំងអស់មួយជំហៀងនោះ មានទំហំ ៦ម គុណនិង៧ម ធ្វើពីឈើប្រក់ហ្វីប្រូស៊ីម៉ង់ដ៏ និងបាំងជញ្ជាំស្លឹក។
តាមការស្រាវជ្រាវមុនពេលកើតហេតុម្ចាស់ផ្ទះបានយកភ្លើងចំបើងទៅដុតរោលសត្វស្រម៉ើលនៅតាមជញ្ជាំងទ្រុងមាន់ដែលជាប់និងជញ្ជាំផ្ទះ ស្រាប់តែពេលនោះភ្លើងបានឆាបឆេះជញ្ជាំងស្លឹកទ្រុងមាន់ ហើយបានរាលដាលឆាបឆេះជញ្ជាំងផ្ទះសន្ឋោរសន្ឋៅឡើង ក្នុងពេលភ្លាមៗនោះដែរបានអ្នកស្រុកជិតខាងក៏បានសាមគ្គីគ្នា ស្ទុះរត់មកជួយដងទឹកពន្លត់និងខ្លះទៀតបានរត់ឡើងលើផ្ទះជួយកាត់និងធាក់ជញ្ជាំ ងស្លឹកដែលកំពុងឆេះនោះទម្លាក់មកដីទាន់ពេលវេលា នឹងទប់ស្កាត់បានការរាលដាលឆេះផ្ទះទាំងមូល។
លោកមេឃុំតាជេសបាននិយាយអោយលោកនាយនគរបាលប៉ុស្តិរដ្ឋបាលដឹងថាៈ លោកមេភូមិរូបនេះក្រោយពីប្រពន្ឋគាត់ស្លាប់ចោលទៅ រូបគាត់មានស្មារតីមិនសូវនឹងន្នរឡើយ គឺចេះតែមានការភ្លេចភ្លាំងច្រើនដោយសារតែមានវិបត្តិផ្លូវចិត្ត៕
