ភ្នំពេញ ៖ហេតុការណ៍ភ្ញាក់ផ្អើលមួយបានកើតឡើងដោយសារ គូរសង្សារមួយគូរ ជិះម៉ូតូឌុបគ្នាចេញពីភោជនីដ្ឋាន មួយកន្លែងម្តុំផ្សារបឹងត្របែក បំណងត្រឡប់ទៅផ្ទះនៅសង្កាត់ចាក់អង្រែក្រោម ប៉ុន្តែពេលធ្វើដំណើរដល់ចំណុច ច្រកចូលខារ៉ាអូខេ បុប្ជាជាយដែន ផ្លូវលេខ ៤៨៨ កែងផ្លូវលេខ ៩៩ សង្កាត់ផ្សារដើមថ្កូវ ព្រំប្រទល់សង្កាត់បឹង ត្របែក ខណ្ឌចំការមន ក៏ត្រូវក្រុមចោរប្លន់ប្រដាប់មានគ្នា ៣នាក់ ជិះម៉ូតូស្តុបពីមួយគ្រឿងមកធ្វើសកម្មភាពភ្ជង់នឹងវាយ មួយស្នាប់កាំភ្លើងបណ្តាលឲ្យរងរបួសរួចប្លន់យកម៉ូតូសេ ១២៥ បានសម្រេច កាលពីវេលា ម៉ោង ២ នឹង ៣០ នាទីឈានចូលថ្ងៃទី ២១ ខែមីនា ឆ្នាំ ២០១៤។
ជនរងគ្រោះខាងលើមានឈ្មោះ ញោន វិបុល ភេទប្រុស អាយុ ២៧ ឆ្នាំ ស្នាក់នៅផ្ទះជួល ផ្លូវលេខ ៣១០ សង្កាត់ទួលស្វាយព្រៃទី ២ ខណ្ឌចំការមន បានជិះម៉ូតូសេ ១២៥ ពណ៌ខ្មៅ ពាក់ស្លាកលេខ ភ្នំពេញ 1AY 0243 ស៊េរី ២០១៤ ។
មុនពេលកើតហេតុជនរងគ្រោះបានជិះម៉ូតូរបស់ខ្លួនដើរសង្សារចេញពីផឹកស៊ីនៅហាងមួយកន្លែង ម្តុំផ្សារបឹងត្របែក ហើយជិះម៉ូតូឌុបគ្នាតាមបណ្តោយផ្លូវលេខ ៩៩ ទិសដៅពីជើងទៅត្បូង ដោយពុំដឹងថា មានជនសង្ស័យជិះម៉ូតូពីក្រោយឡើយ លុះដល់ចំណុចកែងផ្លូវលេខ ៤៨៨ ស្រាប់តែលិចមុខជនសង្ស័យ ៣នាក់ ស្លៀកពាក់ស៊ីវិល ប្រដាប់ដោយកាំភ្លើងខ្លីមួយដើម ជិះម៉ូតូស្តុបពី គ្មានស្លាកលេខ មួយគ្រឿង មកឈប់ធ្វើសកម្មភាពភ្ជង់ រួចវាយក្បាលឈ្មោះ ញោន វិបុល មួយកាំភ្លើងបណ្តាលឲ្យបែកហូរឈាមស្រោចខ្លួនរងរបួស ធ្ងន់ធ្ងរ ក្រោយមកក្រុមជនល្មើសបានដណ្តើមយកម៉ូតូម៉ាកសេ ១២៥ មួយគ្រឿងពីជនរងគ្រោះជិះគេចខ្លួនបាត់ស្រមោល ភ្លាមៗតែម្តងទៅ ។
ក្រោយកើតហេតុសមត្ថកិច្ចមូលដ្ឋានបានចុះអន្តាគមន៍នឹងណែនាំជនរងគ្រោះឲ្យទៅដាក់ពាក្យបណ្តឹង នៅទីស្នាក់ការនគរបាលប៉ុស្តិ៍ផ្សារដើមថ្កូវ ដើម្បីងាយស្រួលសមត្ថកិច្ចក្នុងការស្រាវជ្រាវតាមចាប់ក្រុមចោរប្លន់ យកមកផ្តន្ទាទោសតាមផ្លូវច្បាប់៕ 
