ភ្នំពេញ ៖ ស្ត្រីអ្នកលក់មាសនិងប្តូរប្រាក់នៅផ្សារដេប៉ូម្នាក់ ដែលជាមេតុងទីនប្រចាំផ្សារ ហើយបានធ្វើសកម្មភាព ឆបោកប្រាក់កូនតុង សរុបចំនួនជាង៤ម៉ឺនដុល្លារសហរដ្ឋអាមេរិក ត្រូវបានចៅក្រមស៊ើបសួរសាលាដំបូងរាជធានីភ្នំពេញ សម្រេចឃុំខ្លួនដាក់ពន្ឋនាគារបណ្តោះអាសន្ន កាលពីរសៀល ថ្ងៃទី២០ ខែមីនា ឆ្នាំ២០១៤។
ស្ត្រីមេតុងទីនរូបនេះឈ្មោះ គង់ សុភ័ក្ដ្រ អាយុ៤៥ឆ្នាំ រស់នៅភូមិត្រពាំងឈូក សង្កាត់ទឹកថ្លា ខណ្ឌសែនសុខ បានត្រូវកម្លាំងការិយាល័យស្រាវជ្រាវបទល្មើសព្រហ្មទណ្ឌនៃបញ្ជាការដ្ឋានកងរាជអាវុធហត្ថរាជធានីភ្នំពេញ ឃាត់ខ្លួនកាលពីថ្ងៃទី១៧ ខែមីនា ឆ្នាំ២០១៤ តាមដីកាបញ្ជាឲ្យនាំខ្លួន របស់លោក ហៀង សុភក្រ ព្រះរាជអាជ្ញារងអមសាលាដំបូង រាជធានីភ្នំពេញ
ក្រោមការចោទប្រកាន់ ពីបទឆបោក ។ ប្រភពពីតុលាការបានឲ្យដឹងថា ស្ត្រីមេតុងទីនរូបនេះ ត្រូវបានឈ្មោះ អៀ លឹមប៉ោ ប្ដឹងចោទប្រកាន់ពីបទឆបោកប្រាក់ចំនួន៤០.៩០០ដុល្លារអាមេរិក ដែលលេងតុងទីនជាមួយគ្នាកន្លងមក ។
ក្រោយការឃាត់ខ្លួន នៅថ្ងៃទី១៩ ខែមីនា ឆ្នាំ២០១៤ សមត្ថកិច្ចបានបញ្ជូនស្ត្រីមេតុងរូបនេះមក តុលាការដើម្បីចាត់ការតាមច្បាប់ ។ ប្រភពបន្តថា នៅពេលបញ្ជូនមកដល់តុលាការ ក្រុមគ្រួសារស្ត្រីមេ តុង បានព្យាយាមសម្របសម្រួលជាមួយកូនតុងទីន តែដោយសារពុំមានប្រាក់គ្រប់គ្រាន់សង ទៅដើមបណ្តឹង នោះ តុលាការក៏បន្តនីតិវិធី ដោយធ្វើការឃុំខ្លួនស្ត្រីមេតុងទីន ដើម្បីរង់ចាំថ្ងៃបើក សវនាការ នាពេលខាងមុខ ។
ពាក់ព័ន្ឋបញ្ហានេះ នៅរសៀលថ្ងៃទី២០ ខែមីនា មិនអាចទំនាក់ទំនងស្ត្រីជាមេតុងទីន និង ដើមបណ្តឹងជាកូនតុងទីន បានទេ ៕ 
