ខេត្តប៉ៃលិន ៖ គេសង្កេតឃើញក្រុមអាជីវករប្រមាណជាង៣០នាក់ ដែលប្រកបមុខ របរលក់ដូរនៅក្នុងផ្សារសាមគ្គី (ហៅប៉ាហ៊ី) បាននាំគ្នាដើរទៅដល់មុខសាលាខេត្តប៉ៃលិន ដើម្បីធ្វើការតវ៉ាទាមទារ មិនឱ្យអាជ្ញាធរខេត្តអនុញ្ញាតិឱ្យបរទេស ចូលមកធ្វើការតាំងពីព័រណ៌ញឹកញាប់ពេក ព្រោះពួកគាត់លក់ដូរលែងដាច់ហើយ ខណៈដែលលោកអភិបាលខេត្តកំពុងនៅជាគណៈអធិបតីនៅក្នុងពិធីនោះ តែអ្នកតវ៉ាបានបំបែកគ្នាត្រឡប់ទៅផ្ទះវិញ ក្រោយពីមានការសម្របសម្រួលពីមន្ត្រីសាលាខេត្ត។
ការលើកគ្នាមកតវ៉ានេះបានកើតឡើងកាលពីវេលាម៉ោង ៣និង៤០នាទីរសៀល ថ្ងៃទី០២ខែកុម្ភៈ ឆ្នាំ២០១៤ ស្ថិតនៅមុខសាលាខេត្តប៉ៃលិន ក្នុងភូមិប៉ាហ៊ីត្បូង សង្កាត់ប៉ៃលិន ក្រុងប៉ៃលិន។
សូមបញ្ជាក់ថា កាលពីចុងឆ្នាំ២០១៤និងដើមខែមករា ឆ្នាំ២០១៥កន្លងទៅមានការតាំងពីព័រណ៌ជាញឹកញាប់ ហើយនៅខែកុម្ភៈនេះក៏ចាប់ផ្តើមបន្តទៀត តាមមើលទៅពិតជាញឹកញាប់មែនទែន ។ អ្នកមីង ប៉ាន់ មួយ អាយុ៥១ឆ្នាំ តំណាងអាជីវករម្នាក់ក្នុងចំណោមអាជីវករទាំងអស់បានប្រាប់អ្នកយកព័ត៌មានថា ពួកគាត់ជាអាជីវករដែលលក់ដូរនៅផ្សារសាមគ្គី នឹងនាំគ្នាមកតវ៉ានៅទីនេះជារៀងរាល់ថ្ងៃ បើសិនជាអាជ្ញាធរខេត្តប៉ៃលិន នៅតែបន្តឱ្យបរទេស ឬក្រុមឈ្មួញចូលមកដាក់តាំង ពិព័ណ៌លក់ទំនិញរបស់បរទេសជាញឹកញាប់នៅក្នងទឹកដីខ្មែរ ពួកគាត់ម្នាក់ៗដែលលក់ដូរនៅក្នុងផ្សារទាំងអស់ លក់លែងដាច់ជាក់ជាមិនខាន ព្រោះថាកាលពីមុនបរទេសចូលមកធ្វើកម្មវិធីនេះ ពួកគាត់ម្នាក់ៗ លក់ដាច់ក្នុង១ថ្ងៃ យ៉ាងហោចណាស់ក៏១លានរៀលទៅ៣លានរៀលដែរ លុះក្រោយពេលគេដាក់តាំងពីព័រណ៌ទំនិញគ្រប់មុខញឹកញាប់ខ្លាំងពេក រហូតមកដល់ពេលនេះពួកគាត់លក់លែងដាច់ហើយ ជាពិសេសនៅរដូវប្រមូលផលដំឡូងមី បើគេយកផលិតផលមកដាក់លក់ប្រកួតប្រជែងពួកគាត់បែបនេះគឺពួកគាត់មិនអាចលក់ដាច់អ្វីទៀតនោះទេ ។
អាជីវករទាំងអស់បានលើកឡើងបន្តទៀតថា ការតាំងពីព័រណ៌នាពេលនេះកំពុងតែចាប់ផ្តើម ដោយមានរយៈពេលជាច្រើនថ្ងៃទើបគេឈប់ ពោលគឺចាប់ផ្តើមបើកការលក់ដូរតាំងពីថ្ងៃទី០១ រហូតដល់ថ្ងៃទី១០ ខែកុម្ភៈទើបឈប់ ដូច្នេះពួកគាត់ពិតជាលំបាកក្នុងការរក ស៊ីក្នុងផ្សារខ្លាំងណាស់ បើសិនជាអាជ្ញាធរខេត្តធ្វើបែបនេះបន្តទៀត។ ពួកគាត់បញ្ជាក់ថា ការតាំងពីព័រណ៌ទើបតែបានបញ្ចប់កាលពីដើមខែមករាថ្មីៗកន្លងមកនេះ ហើយរហូតមកដល់ខែកុម្ភៈនេះចាប់ផ្តើមម្តងទៀត ។
ពួកគាត់មានការត្អូញត្អែរថា ទំនិញដែលបរទេសយកមកលក់នៅទីនេះខាង អាជ្ញាធរខេត្តមិនយកពន្ធពីគេទេ ពោលគឺឱ្យគេមកលក់ដោយបង់លុយឱ្យតែខាងមន្ត្រីពាក់ព័ន្ធមួយចំនួនប៉ុណ្ណុះ។ចំណែកពួកគាត់បង់ពន្ធនាំចូលត្រឹមត្រូវនិងបង់ពន្ធដារជូនរដ្ឋថែមទៀត។ចំណែកអ្នកខ្លះបានចងការប្រាក់ពីអង្គការ និងធនាគារ ដូច្នេះបើលក់មិនដាច់បែបនេះទៀតពិតជារត់ចោលស្រុកទាំងអស់គ្នាហើយ ។ 
ជាមួយគ្នានេះដែរ លោក ហែម ឬទ្ធី នាយកស្តីទីខុទ្ទកាល័យសាលាខេត្តប៉ៃលិន ជាតំណាងសាលាខេត្តបានចេញមក អន្តរាគមន៍ ដោយសុំឱ្យប្រជាពលរដ្ឋទាំងអស់ត្រឡប់ទៅផ្ទះវិញសិនចុះ ក្រោយមកសុំឱ្យ ធ្វើលិខិតមួយច្បាប់ ដោយមានតំណាងពីរបីនាក់ផ្តិតមេដៃផ្ញើជូនមកសាលាខេត្ត ដើម្បីធ្វើអន្តរាគមន៍ បើសិនជាពួកគាត់លើកគ្នាមកទាំងអស់បែបនេះពិតជាលំបាកក្នុងការដោះស្រាយខ្លាំងណាស់៕
