ភ្នំពេញ៖ស្ត្រីវ័យជាង៥០ឆ្នាំម្នាក់ បានដាច់ខ្យល់ស្លាប់ភា្លមៗនៅកន្លែងកើតហេតុយ៉ាងអណោយអធម ដោយករណីគ្រោះថ្នាក់ចរាចរណ៍រវាងរថយន្តដឹកដែកក្រុមហ៊ុន អូដ បើកបុកម៉ូតូសេ១២៥ កាលពីវេលាម៉ោង០៦ និង៣០នាទី ព្រឹកថ្ងៃទី០៣ ខែកុម្ភៈ ឆ្នាំ២០១៥ នៅលើកំណាត់ផ្លូវលេខ២១៧ ខាងជើងរង្វង់មូលដីក្រហម ស្ថិតក្នុងភូមិក្រាំងស្វាយ សង្កាត់ព្រែកកំពឹស ខណ្ឌដង្កោ រាជធានីភ្នំពេញ ។
សមត្ថកិច្ចប្រាប់ឲ្យដឹងថា ករណីគ្រោះថ្នាក់ចរាចរណ៍នេះ កើតឡើងរវាងរថយន្ត ម៉ាក FUSO ពណ៍ស្លាទុំ ពាក់ផ្លាកលេខ ភ្នំពេញ 5A-0176 ជារបស់ក្រុមហ៊ុន ជីប ម៉ុង អ្នកបើកបរ មិនស្គាល់អត្តសញ្ញាណនោះទេ ពោលគឺក្រោយពីបង្កហេតុ បានបើកទ្វារថយន្តចុះរត់គេចខ្លួនបាត់ស្រមោល ដោយបន្សល់ទុករថយន្តនៅកន្លែងកើតហេតុ ។
រថយន្តខាងលើបើកបុក ម៉ូតូ ម៉ាក សេ១២៥ ពណ៍ខ្មៅ ពាក់ស្លាកលេខ ភ្នំពេញ1CG-6882 បណ្តាលឲ្យស្ត្រីម្នាក់ឈ្មោះ ប៊ី សុផល អាយុ៥៥ឆ្នាំ រស់នៅភូមិព្រែកស្លែង ឃុំព្រែកស្លែង ស្រុកកណ្តាលស្ទឹង ខេត្តកណ្តាល បែកក្បាលដាច់ខ្យល់ស្លាប់ភ្លាមៗនៅកន្លែងកើតហេតុ។
សមត្ថកិច្ចប្រាប់បន្តឲ្យដឹងថា ក្រោយពីធ្វើការវាស់វែង រថយន្តបង្កហេតុ និងម៉ូតូជនរងគ្រោះ ត្រូវបាននាំយកទៅថែរក្សាទុកនៅការិយាល័យនគរបាលចរាចរជើងគោករាជធានីភ្នំពេញ ដើម្បីរង់ចាំធ្វើការដោះស្រាយតាមនីតិវិធី។ ចំណែកសពជនរងគ្រោះ សមត្ថកិច្ចបានប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណីនៅស្រុកកំណើត។
សាក្សីប្រាប់ឲ្យដឹងថា មុនពេលកើតហេតុ ពួកគាត់បានឃើញជនរងគ្រោះជិះម៉ូតូម្នាក់ឯង ឌុបផ្សិតចំបើង និងសត្វមាន់ពីរបីក្បាល ធ្វើដំណើរចេញពីស្រុកកំណើត ដើម្បីយកមកលក់នៅក្នុងរាជធានីភ្នំពេញ ដោយធ្វើដំណើរតាមបណ្តោយផ្លូវ២១៧ ក្នុងទិសដៅពីត្បូងទៅជើង លុះមកដល់ចំណុចកើតហេតុ មិនដឹងជាយ៉ាងម៉េចនោះទេ ស្រាប់តែត្រូវរថយន្តដឹកដែក ក្រុមហ៊ុន អូដ (ជីប ម៉ុង ) បើកបរមកពីខាងក្រោយបុកចំពេញទំហឹងតែម្តង បណ្តាលឲ្យស្ត្រីរងគ្រោះបែកក្បាលធ្លាយខួរស្លាប់ភ្លាមៗ គួរឲ្យអាណិតអាសូរ្យ។
សាក្សីប្រាប់បន្តទៀតថា ហេតុការណ៍គ្រោះថ្នាក់ចរាចរណ៍បានធ្វើឲ្យមានការភ្ញាក់ផ្អើលដល់ប្រជាពលរដ្ឋ និងកម្លាំងនគរបាលជំនាញចរាចរខណ្ឌដង្កោ និងកម្លាំងនគរបាលចរាចរជើងគោករាជធានីភ្នំពេញ ចុះមកពិនិត្យដល់កន្លែងកើតហេតុ ភ្លាមៗផងដែរ ដោយធ្វើការវាស់វែង ព្រមទាំងនាំយកមធ្យោបាយទាំង២គ្រឿង ដើម្បីរង់ចាំដោះស្រាយតាមច្បាប់។
ពាក់ព័ន្ធទៅនឹងករណីគ្រោះថ្នាក់ចរាចរណ៍នេះ នគរបាលជំនាញចរាចរខណ្ឌដង្កោប្រាប់ឲ្យដឹងថា បង្កឡើងដោយសារតែភាគីខាងរថយន្តមិនប្រកាន់ចំណែកផ្លូវរបស់ខ្លួន ទើបបណ្តាលឲ្យគៀរម៉ូតូ និងកិនចំក្បាលជនរងគ្រោះផ្ទុះខួរស្លាប់ភ្លាមៗនៅកន្លែងកើតហេតុយ៉ាងអណោចអធមបែបនេះ៕
