គ្រោងនឹងស្ថាបនាជាផ្លូវអាកាសបន្ថែមនាពេលខាងមុខ ក្រោយពេលដែលក្រុមហ៊ុនមកពីប្រទេសចិនបានបញ្ចប់ការសិក្សា បន្ទាប់ពីរាជរដ្ឋាភិបាលបានអនុញ្ញាតិឲ្យមានការសិក្សាស្ថាបនាផ្លូវអាកាសពីព្រលានយន្តហោះអន្តរជាតិភ្នំពេញ ចូលមកកណ្តារាជធានីភ្នំពេញរួចមក តំណាងក្រុមហ៊ុន Henan Provincial Communications planning, Survry& Design Institute Co,..Ltdបានចូលជួបពិភាក្សាជាមួយអាជ្ញាធររាជធានិភ្នំពេញ និងតំណាងក្រសួងសាធារណៈការ និងដឹកជញ្ជូន កាលពីថ្ងៃទី០២ ខែកុម្ភះ ឆ្នាំ២០១៥ ដោយមានការចូលរួមពីឯកឧត្តម អៀង អូននី និងឯកឧត្តម ត្រាក់ ថៃសៀង អភិបាលរង រាជធានីភ្នំពេញ ។
នៅក្នុងជំនួបពិភាក្សានេះ តំណាងក្រុមហ៊ុនចិនខាងលើ បានបង្ហាញជម្រើសនៃការកសាងផ្លុវអាកាសនេះចំនួន២ខ្សែដែលក្រុមហ៊ុន អាចនឹងសាងសង់ស្ពានអាកាសបានដោយមួយខ្សែចេញពីព្រលានយន្តអន្តរជាតិភ្នំពេញ កាត់តាមបណ្តោយផ្លូវដែកមកចំនុចមុខព្រះសមុនីចេតី និងមួយខ្សែទៀតចាប់ពីប្រលានយន្តហោះអន្តរជាតិចេញតាម ច្រកវត្តតាំងក្រសាំង កាត់មកផ្លូវម៉ុងរិទ្ធីត្រង់តាមទំនប់ទួលគោកមកគល់ស្ពានជ្រោយចង្វា ។
ជាមួយនឹងការបង្ហាញគម្រោងខាងលើនេះឯកឧត្តម អៀង អូននី បានលើកឡើងថានេះ ជាគម្រោងដ៏ប្រសើរដើម្បីរួមចំនែកកាត់បន្ថយការកកស្ទះចរាចណ៍ក្នុងរាជធានីភ្នំពេញ ប៉ុន្តែមុននឹងស្ថាបនាចាំបាច់ត្រូវសិក្សាឲ្យបានលំអិតពីផលប៉ះពាល់ ពីព្រោះការស្ថាបនាផ្លូវអាកាសខាងលើនេះត្រូវចំណាយថវិការច្រើន ។
ទោះយ៉ាងណានៅក្នុងកិច្ចកាលពីថ្ងៃចន្ទ មិនទាន់សម្រេចជាផ្លូវការថាត្រូវជ្រើសរើសជម្រើសណាមួយនៅឡើយទេដោយទាំងក្រុមហ៊ុន និងអាជ្ញាធររាជធានី រួមនឹងក្រសួងសាធារការ និងដឹកជញ្ជូន រួមគ្នាសិក្សាលំអិតពីផលប៉ះពាល់ជាមុនសិនហើយបើជម្រើណាមានផលប៉ះពាល់តិចនឹងត្រូវជ្រើសរើសសម្រាប់ការស្ថាបនា ។
សូមបញ្ជាក់ថា៖ នេះជាគំរោងនៃការសាសង់ផ្លូវអាកាសថ្មីមួយបន្ថែមទៀត ដែលមានប្រវែង វែងជាងគេក្នុងប្រទេសកម្ពុជា បន្ទាប់ពីស្ពានអាកាសចំនួនបី ក្នុងរាជធានីបានស្ថាបនារួច ហើយបាននឹងកំពុងប្រើប្រាស់នាពេលបច្ចុប្បន្ន ៕
