យុវជនម្នាក់បានរងរបួស ដោយសារតែរថយន្តវីស្តូ បុកចំពីមុខពេញទំហឹង បណ្តាលឱ្យផ្លោងខ្ទាត ចំណែកម៉ូតូបានរងការខូចខាតយ៉ាងដំណំ ហើយរថយន្ត បានព្យាយាមបើករត់ តែត្រូវបានកំលាំងសមត្ថកិច្ច កំពុងល្បាតនៅក្នុងមូលដ្ឋាន ដេញស្ទាក់ចាប់បាន រួចដោះស្រាយបញ្ចប់ត្រឹម១៥០ដុល្លារ ។
ហេតុការណ៍នេះបាន កើតឡើងកាលពីវេលាម៉ោង៩នឹង១៥នាទីយប់ ថ្ងៃទី៣ ខែកុម្ភះ ឆ្នាំ២០១៥ តាមបណ្តោយផ្លូវលេខ១៩៣ កែងនឹងផ្លូវលេខ៣៨៤ ស្ថិតក្នុងសង្កាត់ទួលស្វាយព្រៃទី១ ខណ្ឌចំការមន ។
ប្រភពពត៌មានពីសាក្សី ដែលបានឃើញហេតុការណ៍នេះ បានឱ្យដឹងថា នៅមុនពេលកើតហេតុ គេបានឃើញយុវជនម្នាក់ ជិះម៉ូតូទ្រីម សេ១២៥ពណ៍ខ្មៅ ពាក់ស្លាកលេខ ភ្នំពេញ ១AH-២៣៩០ ធ្វើដំណើរតាមបណ្តោយផ្លូវលេខ១៩៣ ទិសដៅពីជើងទៅត្បូង លុះមកដល់ចំណុចកែងនឹងផ្លូវលេខ៣៨៤ ស្រាប់តែមានរថយន្តវីស្តូពណ៍សមួយគ្រឿង ពាក់ស្លាកលេខបណ្តោះអាសន្ន ៣១៩១ ទិសដៅបញ្ច្រាសគ្នា បានបត់ទៅខាងឆ្វេងដៃ ក៏បុកម៉ូតូពេញទំហឹង បណ្តាលឱ្យអ្នកជិះម៉ូតូរងរបួស ចំណែកម៉ូតូបានរងការខូចខាតយ៉ាងដំណំ ។
បន្ទាប់ពីបង្កហេតុ រថយន្តបង្កបានព្យាយាមបើករថយន្តរត់ តែត្រូវបានកម្លាំងកងរាជអាវុធហត្ថ ដែលកំពុងជិះល្បាតនៅក្នុងមូលដ្ឋាន ដេញស្ទាក់ចាប់បាន នៅផ្លូវលេខ៣៤៨ ខាងក្រោយគុកទួលស្លែង ។
ភ្លាមៗនោះ សមត្ថកិច្ចបានឱ្យអ្នកបើករថយន្តបង្ក ទៅកន្លែងកើតហេតុវិញ ដើម្បីដោះស្រាយគ្នា ហើយភាគីខាងរថយន្ត បានដឹងពីកំហុសរបស់ខ្លួន ក៏ព្រមសងថ្លៃព្យាបាល និងខូចខាតម៉ូតូជនរងគ្រោះ ចំនួន១៥០ដុល្លារដើម្បីបញ្ចប់រឿង ហើយភាគីខាងម៉ូតូ មិនចង់មានរឿងវែងឆ្ងាយ ក៏ព្រមទទួល ព្រោះមិនចង់រំខានដល់សមត្ថកិច្ច ៕
