ស្វាយរៀងមានរថយន្តធុនយក្សមួយគ្រឿង ក្រឡាប់ចូលហាវថ្នល់ ក្អួតចេញក្របីប្រមាណជិត១០០ក្បាល តែអ្នករត់ការផ្លូវប្រាប់ថា មានតែ៤៥ក្បាលប៉ុណ្ណោះ ហើយមានការលាក់លៀម មិនឲ្យអ្នកយកព័ត៌មានដឹងឡើយ ពេលអ្នកយកព័ត៌មានសាកសួរអំពីរច្បាប់ ឬអាជ្ញាបណ្ណ័និងឈ្មោះក្រុមហ៊ុន គេឆ្លើយថា មិនស្គាល់ទេ ពួកគេគឺជាកម្មករស៊ីឈ្នួលដឹកក្របី ពីខេត្តបន្ទាយមានជ័យ មកកាន់ខេត្តស្វាយរៀង ចេញទៅប្រទេសវៀតណាម តាមច្រករបៀងសំរោង ឃុំសំរោង ស្រុកចន្ទ្រា ។
ករណីរថយន្តធុនយក្សក្រឡាប់នេះ បានកើតឡើងកាលពីវេលាម៉ោង៤និង៣០នាទីព្រឹក ថ្ងៃទី៤ ខែកុម្ភះ ឆ្នាំ២០១៥ នៅលើកំណាត់ផ្លូវជាតិលេខ១ ខាងលិចរង្វង់មូលរូបគោ ចម្ងាយ២០០ម៉ែត្រ ស្ថិតនៅភូមិចុងព្រែក សង្កាត់ស្វាយរៀង ក្រុងស្វាយរៀង ។
ទាក់ទិនរថយន្តធុនយក្សក្រឡាប់ ធ្លាយចេញសុទ្ធតែក្របីនេះ មន្ត្រីនគបាលក្រុងស្វាយរៀង បានឲ្យដឹងថា រថយន្តដឹកក្របីនេះ គឺរបស់លោក ទេព សាវេត ដែលមានទីលំនៅភូមិបាក់រនាស់ សង្កាត់សង្ឃរ័ ក្រុងស្វាយរៀង រីឯចំនួនក្របីដឹកក្នុងរថយន្ត ដែលក្រឡាប់នេះ ក្រុមកម្មករមិនហ៊ានប្រាប់អ្វីទេ ហើយពួកគេក៏មិនស្គាល់ឈ្មោះថៅកែរដែរ ។ រីឯលោក ទេព សាវេត ប្រធានក្រុមហ៊ុន ទេព សាវេត បាននិយាយថា ក្របីគាត់មានចំនួន៤៥ក្បាល ពេលសមត្ថកិច្ចរាប់សាកល្បង ឃើញរហូត៦៥ក្បាល ក៏ប៉ុន្តែពេលរាប់ជាក់ស្តែង ក្របីនៅខាងក្រៅរថយន្តមាន៣៥ក្បាល រីឯក្របីនៅក្នុងរថយន្ត ចំនួន៥០ក្បាល មិនរាប់កូនក្របី ដែលមានអាយុមួយខែ ឬពីរខែផង ។
ចុងក្រោយលោក ទេព សាវេត បានយាយថា លោកក៏មិនដឹងថា មានក្របីប៉ុន្មានក្បាលដែរ ចាំមើលឯកសារសិន ។ រីឯមហាជនរិះគន់ថា ក្រុមឈ្មួញដឹកក្របីនេះ ដឹកតាមរថយន្តធុនយក្សលើសទម្ងន់ បណ្តាលឲ្យខូចផ្លូវស្ពានលូ តែគ្មានឃើញសមត្ថកិច្ចណា ហ៊ានទៅក្បែរឡើយ ។ ហើយសមត្ថកិច្ចខ្លះ បង្ហើបឲ្យដឹងថា ពួកឈ្មួញដឹកគោក្របីជាច្រើនឆ្នាំមកហើយ អាជ្ញាបណ្ណ័១ពាន់ក្បាល ដឹករាប់ឆ្នាំឯណោះ ហើយបើមានអ្នកយកព័ត៌មាន សាកសួរពួកគេ ពួគលាក់លៀមមិនផ្តល់ព័ត៌មានឲ្យទេ ។
លុះដល់វេលាម៉ោង៦ព្រឹក ក្រុមឈ្មួញបានយករថយន្តធុនយក្ស២គ្រឿង មកផ្ទេរក្របីទាំងអស់ យកទៅប្រទេសវៀតណាម និងស្ទូចរថយន្តក្រឡាប់ឡើងលើថ្នល់វិញ នេះសំ
ណាងណាស់ ដែលក្រឡាប់ខុសផ្ទះប្រជាពលរដ្ឋ ទើបគ្មានអ្នករងគ្រោះ ។
សមត្ថកិច្ចនគបាលក្រុងស្វាយរៀងបានឲ្យដឹងទៀតថា មូលហេតុរថយន្តក្រឡាប់ គឺដោយសារអ្នកបើកបរ មិនពិនិត្យបច្ចេកទេស បណ្តាលឲ្យអស់ប្រេងឡាប ធ្វើឲ្យគាំងបាក់ឡាប រេចង្កូតធ្លាក់ហាវថ្នល់តែម្តង តែនគបាលម្នាក់និយាយថា ទំនងអ្នកបើកបរ ងងុយដេកទើបរេចង្កូតធ្លាក់ហាវថ្នល់ ។ ចំពោះមន្ត្រីការិយាល័យ បសុព្យាបាលខេត្ត មិនអាចសុំការបភ្លឺបានទេ ពាក់ព័ន្ធនិងករណីនេះ ៕
