> បាត់ដំបង: ផ្សារថ្មីគឺជាផ្សារមួយដែលស្ថិតនៅតាមបណ្តោយផ្លូវជាតិលេខ5 ក្នុងភូមិ13មករា សង្កាត់ព្រែកព្រះស្តេច ក្រុងបាត់ដំបង ខេត្តបាត់ដំបង ហើយក៏ជាផ្សារមួយដែលស្ថិតក្រោមការគ្រប់គ្រងដោយ លោក ឡាញ់ នី មាននាទីជាមន្ត្រីយោធាជាន់ខ្ពស់មួយរូបផងដែរដែលកំពុងតែគេងយកផលចំណេញមួយក្តារទៀតហើយទៅលើទីតាំងដីរបស់ចំណតរថយន្តដែលស្ថិតនៅក្បែផ្សារនេះ ។គួរបញ្ជាក់ដែរថាការដេញថ្លៃទៅលើភាសុីផ្សារនេះគឺត្រូវបានលើកលែងអស់រយ:ពេលជាច្រើនឆ្នាំដោយកាច់កងគ្នាទៅនឹងការសាងសង់សាលាខេត្ត
បាត់ដំបង ដោយសារតែបញ្ហានេះហើយទើបធ្វើអោយលោក ឡាញ់ នី ព្រមជាមួយនឹងដៃគូចង់ធ្វើព្យុះធ្វើភ្លៀងយ៉ាងណាក៏ស្រេចតែចិត្ត ប៉ុន្តែបានតែមួយរយ:ប៉ុណ្ណោះដោយសារតែការលោភលន់ និងមហិច្ឆិតារបស់ដង្ខៅផ្សាររូបនេះធ្វើអោយគូរកនដែលជាដៃគូរកសុីសុំផ្តាច់ភាគហ៊ុនចេញទាំងអស់ ។កន្លងមកប្រភពផ្ទៃក្នុងមួយបានលួចបង្ហើបអោយដឹងថា ចាប់ផ្តើមពីឈរសោយរាជ្យតែម្នាក់ឯងមកគឺលោកដង្ខៅបានចាប់ផ្តើមពុស អង្កន់ដីជាឡូតិ៍តូចៗដើម្បីលក់ នឹងសង់ជាផ្ទះល្វែងនៅក្នុងតំលៃរាប់មុឺនដុល្លារ ចំណែកថ្លៃភាសុី ថ្លៃភ្លើង និងថ្លៃគ្រែ កន្ទេលតូចៗដែលក្រុមអាជីវករជួលលក់ត្រកួន ព្រលិត ត្រូវបានគេកំណត់តំលៃអោយបង់មិនធម្មតាឡើយ ដែលធ្វើអោយពួកគាត់បញ្ចេញនូវប្រតិកម្មយ៉ាងខ្លាំងស្ទើរតែផ្ទុះកំហឹងម្តងៗថែមទៀតផង ។ឆ្នាំ2017គឺជាឆ្នាំដែលត្រូវដាច់អាណត្តិ ទំនងជាបញ្ហានេះហើយបានជាថ្មីៗនេះទីតាំងមួយកន្លែងដែលស្ថិតនៅខាងកើតតួផ្សារ និងជាទីតាំងចំណតរថយន្តធំ តូចគ្រប់ប្រភេទកំពុងតែចាប់ផ្តើមពុសអង្កន់ជាដុំតូចៗទៀតហើយសំរាប់ជួលអោយអាជីវករសង់ជារោងលក់ទំនិញផ្សេងៗជាបណ្តើរៗហើយដោយដីមួយដុំៗជួលក្នុងមួយខែចាប់ពី20ដុល្លារដល់50ដុល្លាដែលធ្វើអោយផ្លូវចូលទៅក្នុងចំណតរថយន្តស្ទើរតែបាត់បង់អស់ទៅហើយ ។
> រាល់បញ្ហាទាំងនេះក៏មានប្រភពជាច្រើនបានធ្វើការរិះគន់យ៉ាងចាស់ដៃពាក់ព័ន្ធទៅនឹងបញ្ហាជាច្រើនដែលបានកើតឡើងតាំងពីការយកផ្លូវសាធារណ:ជុំវិញផ្សារធ្វើជាកន្លែងផ្ញើរកង់ ម៉ូតូ ធ្វើអោយច្រកចេញចូលមានសភាពតូចចង្អៀតស្ទើរតែដើរមិនរួច។ល។
រឿងដីចំណតរថយន្តនេះក៏ធ្លាប់មានប្រភពផ្ទៃក្នុងលួចប្រាប់កម្ពុជាថ្មីដែរថាដង្ខៅផ្សារមានបំនងយូរហើយប៉ុន្តែគេនៅខ្លាចត្រង់ថាអាជីវករមិនព្រមចូលទៅលក់នៅទីនោះព្រោះវានៅខាងក្រៅទីតាំងផ្សារ វាមិនដូចក្នុងតួផ្សារនោះឡើយ លុះដល់ពេលនេះប្រហែលជាអត់ទ្រាំមិនបានដោតសារតែស្តាយលុយទើបចាប់ផ្តើមឈានមួយជំហានហើយនាឱកាសនេះ ហើយតទៅមុខក៏ប្រហែលជានឹងរលាយផងក៏មិនដឹងចំពោះទីតាំងចំណតរថយន្តនេះ ដោយសារតែការបង់ចំណតត្រូវបានគេលើកយកទៅដាក់នៅលើផ្លូវជាតិលេខ5អស់ហើយគឺនៅក្បែរង្វង់មូលព្រាបស មិនខុសអីទៅនឹងកុងត្រូលជជុះនោះទេព្រោះពេលដែលរថយន្តដឹកមនុស្សឬដឹកទំនិញមកដល់គេរត់ឆ្វែលឆ្វាត់ពេញផ្លូវដើម្បីតាមយកលុយហើយបើមានរថយន្តណាមួយមិនព្រមឈប់បង់លុយទេនោះគឺក្រុមអាមា៉តទាំងនេះត្រូវប្រើប្រាស់
ម៉ូតូដេញស្ទាក់តែម្តង នេះបានចំជាសេនាឆ្វេង ស្តាំរបស់ដង្ខៅផ្សារដ៏មានមហិច្ឆិតាមែន ។រាល់បញ្ហាទាំងនេះគេមិនដឹងថាអាជ្ញាធរពាក់ព័ន្ធ ពិសេសអាជ្ញាធរខេត្តបានជ្រាបដែរឬយ៉ាងណានោះទេ ឬក៏មិនហ៊ានក្អកដោយសារតែបានទទួលនូវអាគារសាលាខេត្តមួយខ្នងនេះ? ល្មមដល់ថ្ងៃឱសានរាទហើយសំរាប់បញ្ហានានាដែលបានកើតឡើងនៅក្នុងបរិវេណផ្សារថ្មីបាត់ដំបងនេះ៕
