ខេត្តកំពង់ចាម: នារី ជាអ្នករាំតាមវង់តន្ត្រីម្នាក់ បានសម្រេចចិត្តចងករ សម្លាប់ខ្លួនដោយសារ តែសង្សា របស់នាងសុំបែកគ្នា ។សពនារីរងគ្រោះ ត្រូវបានគេប្រទះឃើញនៅល្ងាចថ្ងៃទី៣ ខែកុម្ភៈ ឆ្នាំ ២០១៥ នៅក្នុងបន្ទប់ ផ្ទះជួល ស្ថិតក្នុងភូមិបឹងកុក២ សង្កាត់បឹងកុក ក្រុងកំពង់ចាម ខេត្តកំពង់ចាម ប៉ុន្តែសម្មត្ថកិច្ចជំនាញបានអះអាងថានារីរងគ្រោះអាចចងករសំលាប់ពីពេលរៀបភ្លឺក្នុងថ្ងៃដដែលព្រោះសពមិនទាន់ធុំក្លិន។
សម្មត្ថកិច្ចនគរបាលក្រុងកំពង់ចាមម្នាក់ បានប្រាប់ឲ្យដឹងថា នារីរងគ្រោះ ឈ្មោះ អានី ហៅអាណយ អាយុប្រហែល២២ឆ្នាំ មុខរបរជា អ្នករាំតាមវង់ដន្ត្រី មានស្រុកកំណើត នៅខេត្តក្រចេះ។ លោកបន្តឲ្យដឹងទៀតថា តាមម្ចាស់ផ្ទះជួលបានបំភ្លឺទៅសម្មត្ថកិច្ចថា កាលពីថ្ងៃទី២ ម្សិលមិញ នារីរងគ្រោះ បានឈ្លោះ ប្រកែកជាមួយសង្សា របស់នាង ហើយក្នុងជម្លោះនោះ គេបានឮថា ខាងសង្សារបស់សុំបែកគ្នា ហើយខាងប្រុស ក៍ចេញទៅ បាត់ ទៅនៅយប់ថ្ងៃឈ្លោះនោះ ។
លុះនៅថ្ងៃទី៣នេះ ឃើញនាងបិទទ្វារបន្ទប់មិនព្រមចេញក្រៅសោះ រហូតដល់ម៉ោង៥ល្ងាច ដោយមានការសង្ស័យព្រោះហៅមិនឆ្លើយ ទើបម្ចាស់ផ្ទះបើកទ្វារចូលក្នុងបន្ទប់ឃើញនាង បានចងក ស្លាប់បាត់ទៅហើយ។ សម្មត្ថកិច្ចបានឲដឹងទៀតថា នារីរងគ្រោះនោះ បានប្រើដៃអាវយកមក ចងក ជាប់ទៅចំរ៉ឹងបង្អួច បន្ទប់ផ្ទះជួល ។
ករណីនេះសមត្ថកិច្ចនគរបាលជំនាញបានបញ្ជាក់ថា ក្រោយពិនិត្យរួចសពនារីរងគ្រោះពិតជា ស្លាប់ដោយសារចងកធ្វើអត្តឃាតមែន បច្ចុប្បន្ន សពនារីរងគ្រោះ មិនទាន់មានសាច់ញាតិមកទទួលយកទៅធ្វើបុណ្យនៅឡើយទេ ហើយក្រោយការពិនិត្យ សពនារីរងគ្រោះ និងដឹកទៅតម្កល់ទុកនៅវត្តបឹងកុក រងចាំបូជានៅថ្ងៃទី៤ នោះ បើមិនឃើញមានសាច់ញាតិ មកទទួលយកទៅ៕
