កំពង់ធំៈ ក្រោយពីទូរទស្សន៍កាសែត បានចុះផ្សព្វផ្សារស្តីពី មានគេលួចលក់ប៉ុស្តិ៍រដ្ឋបាល ឃុំទ្រា ស្រុកបារាយណ៍ ខេត្តកំពង់ធំ ដោយមានប្រតិកម្មយ៉ាងឆាប់រហ័ស ដល៉អាជ្ញាធរ និងស្នងការខេត្តកំពង់ធំ ដោយសារតែកន្លងមកពុំដែលដឹង សូម្បីតែបន្តិច ក៏ស្រាប់តែមានមេការ 
លោក ថោង ប៉េងលៀត នាំរថយន្តដឹកដីមកចាក់នៅទីតាំងប៉ុស្តិ៍រដ្ឋបាល ឃុំទ្រា ហើយបានអះអាងថា ដីប៉ុស្តិ៍បានលក់ហើយ ខណៈពេលនេះ កម្មករបានដក់ផ្តួលរលំដងទង់ជាតិ ដីមានទំហំទទឹង ២០បណ្តោយ១០០ ។
នៅព្រឹកថ្ងៃទី ៥ ខែ កុម្ភះ ឆ្នាំ ២០១៥ លោក ឧត្តមសេនីយ៍ត្រី ផាន់ សុផេង បានមានប្រសាសន៍តាមទូរស័ព្ទថា ការលក់ដូរគឺមិនបានដឹងនោះទេ ប៉ុន្តែកាលពីលោក ជាស្នងការនគរបាលខេត្តកំពង់ធំ គឺលោក លោក អ៊ឹម វ៉ុនអធិការងស្រុកបារាយណ៍ ដែលមានការស្និទ្ធស្នាលជាមួយ លោក ថោង ប៉េងលៀត បានធ្វើលិខិតសំណើរសុំផ្លាស់ប្តូរទីតាំងប៉ុស្តិ៍រដ្ឋបាលថ្មី ព្រមទាំងបានសន្យាថានិងសាងសង់ប៉ុស្តិ៍ថ្មីដែលល្អគួរសមឲ្យ ហើយលោកក៏បានចុះហត្ថលេខា ឲ្យមន្ត្រីជំនាញដែលមាន លោក ឳម ភីលី ស្នងការង ចុះត្រួតពិនិត្យ សិក្សាទីតាំងប៉ុស្តិ៍រដ្ឋបាលដើម្បីធ្វើសំណើរទៅក្រសួងមហាផ្ទៃ ដោយមិនទាន់ព្រមព្រៀងឲ្យមានការលក់ដូរនោះទេ ចំណែកការលក់ដូរក្នុងតំលៃប៉ុន្មាននោះគឺពុំបានដឹងនោះទេ រហូតមកដល់ពេលនេះ ទើបលេចលឺថា ប៉ុស្តិ៍រដ្ឋបាលត្រូវបានលក់រួចជាស្រេច ហើយពុំបានឲ្យប៉ុស្តិ៍រដ្ឋបាលដឹងផង ។
លោក ឧត្តមសេនីយ៍ត្រី ជូ សំអាន ស្នងការបច្ចុប្បន្ន បានឲ្យដឹងតាមទូរស័ព្ទថា ការពិតរឿងនេះពុំមានអ្នកណាដឹងនោះ ទេពីការលក់ប៉ុស្តិ៍រដ្ឋបាលឃុំទ្រា គឺគ្រាន់តែដឹងថា ស្នងការមុន បានអនុញ្ញាតិឲ្យមន្ត្រីជំនាញចុះសិក្សាទីតាំងប៉ុស្តិ៍រដ្ឋបាល ក្នុងគោលបំណង ធ្វើសំណើរទៅក្រសួងមហាផ្ទៃដើម្បី សុំធ្វើការដោះដូរ ដោយទីតាំងថ្មី ដែលមានលក្ខណៈសមរម្យ ជាប៉ុស្តិ៍រដ្ឋបាល ដោយពុំទាន់ព្រមព្រៀង និងឯកភាពភាគីណាមួយក្នុងទិញលក់នោះទេ ចុះហេតុអ្វី បានជាលោក អ៊ឹម វ៉ុន ជាអធិការង ស្រុកបាយរាយណ៍ ហ៊ានសម្រេចចិត្តលក់ដោយស្ងាត់ រឿងនេះគឺបណ្តាលមកពីលោក អ៊ឹម វ៉ុន តែម្នាក់ព្រោះអាជ្ញាធរ និងថ្នាក់ដឹកនាំពុំបានដឹងទាំងអស់ ចំនែកការចាក់ដី ខ្ញុំបានបញ្ជារឲ្យផ្អាកជាប្រញ៉ាប់ និងឲ្យលើកដង ទង់ជាតិឡើងវិញ។
ឯកឧត្តម អ៊ុត សំអន អភិបាលខេត្តកំពង់ធំ បានឲ្យដឹងតាមទូរស័ព្ទថា លោកពុំបានដឹងរឿងអ្វីទាំងអស់ ពីការលក់ដូរ ប៉ុស្តិ៍រដ្ឋបាលឡើយ ឯកឧត្តម និងឲ្យអភិបាលស្រុកចុះទៅ ពិនិត្យមើលជាបន្ទាន់ ។
ដោយ ប៊ុន រដ្ឋា
