ក្រសួងការពារប្រទេសកូរ៉េខាងត្បូង ឱ្យដឹងកាលពីថ្ងៃទី៥ កុម្ភៈ ថា រដ្ឋមន្ត្រីការពារប្រទេសចិន លោក Chang Wanquan និយាយថា លោកមានការបារម្ភចំពោះការដាក់ពង្រាយជាយថាហេតុនូវប្រព័ន្ធមីស៊ីល THAAD អាមេរិក នៅកូរ៉េខាងត្បូង ដែលប្រព័ន្ធនេះជាផ្នែកមួយ នៃប្រព័ន្ធការពារប្រឆាំងមីសុីលបាលីស្ទិកអាមេរិក ។
លោក Kim Min Seok អ្នកនាំពាក្យក្រសួងការពារប្រទេសកូរ៉េខាងត្បូង ថ្លែងថា រដ្ឋមន្ត្រីការពារប្រទេសចិន លោក Chang Wanquan អះអាងថា លោកមានការបារម្ភចំពោះលទ្ធភាពនៃការដាក់ពង្រាយប្រព័ន្ធ Thaad (Terminal High Alittude Area Defense) នៅឧបទ្វីបកូរ៉េ ។ លោក Chang បានជួបពិភាក្សាកាលពីថ្ងៃទី៤ កុម្ភៈ ជាមួយរដ្ឋមន្ត្រីការពារប្រទេសកូរ៉េខាងត្បូង លោក Han Min Koo នៅក្រុងសេអ៊ូល ។
អ្នកនាំពាក្យរូបនោះបន្តថា ជាការឆ្លើយតបវិញ លោក Han អះអាងជាថ្មីថា ក្រុងវ៉ាស៊ីនតោន នៅពុំទាន់ធ្វើការសម្រេចអ្វីលើបញ្ហានេះនៅឡើយ រួចក៏ពុំបានស្នើដល់កូរ៉េខាងត្បូងដែរ ។ ពុំមានកិច្ចព្រមព្រៀងណាមួយ រវាងក្រុងសេអ៊ូល និងក្រុងវ៉ាស៊ីនតោន លើចំណុចនេះឡើយ ។ លោកបន្តថា ប្រព័ន្ធការពារប្រឆាំងមីស៊ីលបាលីស្ទិក មានទិសដៅតែបង្ការ និងប្រឆាំងបណ្តាមីស៊ីលរបស់កូរ៉េខាងជើងប៉ុណ្ណោះ ។
អ្នកនាំពាក្យ ក្រសួងការបរទេសកូរ៉េខាងត្បូង គូសបញ្ជាក់ថា កូរ៉េខាងត្បូង និងចិន បានព្រមព្រៀងគ្នាបង្កើតខ្សែគមនាគមន៍ដោយផ្ទាល់មួយ ឱ្យបានឆាប់រហ័សតាមដែលអាចធ្វើទៅបាន ដើម្បីពង្រឹងកិច្ចសហប្រតិបត្តិការខាងយោធា រវាងប្រទេសទាំង២ ។ ដើម្បីជំរុញកិច្ចសហប្រតិបត្តិការខាងយោធា ប្រទេសទាំងពីរនឹងរៀបចំធ្វើកិច្ចប្រជុំការងារមួយនាសប្តាហ៍ខាង មុខនេះ ។ យើងមានបំណងបើកខ្សែគមនាគមន៍ដោយផ្ទាល់នេះ យ៉ាងយូរបំផុតក្នុងឆ្នាំនេះតែម្តង ។
ប្រទេសកូរ៉េខាងត្បូង នឹងធ្វើមាតុភូមិនិវត្តន៍បណ្តាអដ្ឋិធាតុទាហានចិន ដែលស្លាប់កាលពីសម័យសង្គ្រាមកូរ៉េ ដែលនេះជាកាយវិការបង្ហាញពីមិត្តភាពរវាងអតីតគូសត្រូវគ្នាទាំង២ នេះ ។ ទាហានចិនដល់ទៅជាង១លាននាក់បានស្លាប់ ក្នុងសង្គ្រាមរយៈពេល៣ឆ្នាំ ពីឆ្នាំ១៩៥០ ដល់១៩៥៣ ៕
