យ៉ាងហោចណាស់ មនុស្ស ៣១នាក់បានស្លាប់ បន្ទាប់ពីជើងហោះហើរមួយ របស់អាកាសចរណ៍តៃវ៉ាន់ Trans Asia បានធ្លាក់ទៅក្នុងទន្លេគីលុង នៃទីក្រុងតៃប៉ិ កាលពីព្រឹក ថ្ងៃពុធ ទី០៤ ខែកុម្ភៈ ឆ្នាំ ២០១៥ បន្ទាប់ពីទើបធ្វើការ ហោះឡើងបាន ១០នាទីប៉ុណ្ណោះ ។
ទីភ្នាក់ងារព័ត៌មានចិន ស៊ិនហួ ចេញផ្សាយនៅថ្ងៃព្រហស្បតិ៍ ទី០៥ ខែកុម្ភៈ នេះទៀតថា គ្រោះថ្នាក់ខាងលើនេះ បាន បណ្តាលឲ្យមនុស្ស ១២នាក់រងរបួស និង១២នាក់ផ្សេងទៀត នៅបន្តបាត់ខ្លួនក្នុងទឹកទន្លេ ឬ តួយន្តហោះនៅឡើយ ដោយក្រុមសង្គ្រោះ ទើបតែរាយការណ៍ដំណឹងនេះ កាលពីវេលាម៉ោង ៦ព្រឹក ក្រោយការធ្លាក់យន្តហោះ ២០ម៉ោងមក នេះ ។
ចំពោះបុគ្គលិក នៅលើយន្តហោះ នៅមិនទាន់រកឃើញទាំងអស់នោះទេ ប៉ុន្តែសម្រាប់ពីឡុត ទាំងពីររូប ត្រូវបានគេ ស្រង់សពបានហើយ។ ដោយឡែកប្រអប់ខ្មៅទាំងពីរ ក៏ត្រូវបាន យកចេញមកដែរ តាំងពីល្ងាចថ្ងៃពុធ មកម្ល៉េះ។
គួរបញ្ជាក់ថា ជើងហោះហើរ GE 235 បានធ្វើដំណើរ ពីទីក្រុងតៃប៉ិ ទៅកាន់កោះរម្មណីយដ្ឋាន គីនមែន ដោយផ្ទុកអ្នក ដំណើរ ៥៣ និង នាវិក៥នាក់ ក្នុងនោះ ៣១នាក់ មកពីប្រទេសចិន ហើយក្នុងចំណោម ៣១នាក់នោះ មាន ០៦នាក់ ស្លាប់ និង ៣នាក់ទៀតរងរបួសធ្ងន់ ៕
