រាជធានីភ្នំពេញ ៖ នៅវេលាម៉ោងប្រមាណ៨យប់ថ្ងៃទី២២ ខែមីនា ឆ្នាំ២០១៤នេះ មានហេតុការណ៍មួយបានកើតឡើងនៅចំណុចខាងជើងស្ពានជ្រោយចង្វា ស្ថិតក្នុងសង្កាត់ទួលសង្កែ ខណ្ឌឫស្សីកែវ ដោយជនមិនស្គាល់មុខបានប្រើកាំភ្លើងខ្លីបាញ់ទៅលើរថយន្តក្រុងដឹកអ្នកដំណើរ គឺជាប្រជាពលរដ្ឋនៅសហគមន៍បុរីកីឡា សហគមន៍ថ្មគោល និងកម្មករមួយចំនួនទៀតដែលសរុបមានគ្នាចំនួន៤៥នាក់ ខណៈដែលពួកគាត់បានត្រឡប់មកពីចូលរួមកិច្ចប្រជុំបញ្ហាដីធ្លីមួយនៅខេត្តសៀមរាប។
បើតាមប្រភពព័តមានបានអោយដឹងថា៖ ខណៈដែលរថយន្តរបស់ពួកគាត់មកដល់ម្ដុំគីឡូម៉ែត្រលេខ៦ស្រាប់តែមានម៉ូតូមួយគ្រឿងដែលជិះគ្នាចំនួន២នាក់គឺប្រុសម្នាក់ស្រីម្នាក់ ហើយម៉ូតូនោះបានតាមរករឿងរថយន្ត ដោយបានទៅឈប់ពីមុខរថយន្តដើម្បីឲ្យឡានប៉ះក្នុងគោលបំណងរករឿង ប៉ុន្តែរថយន្តបានព្យាយាមបើកគេច ហើយពេលដែលរថយន្តមកដល់
ខាងជើងស្ពានជ្រោយចង្វា ជនមិនស្គាល់មុខនោះក៏ដកកាំភ្លើងខ្លីបាញ់មកលើរថយន្តនោះតែម្ដងបណ្ដាលឲ្យបែកកញ្ចក់ផ្នែកខាងមុខ។ តែប្រជាពលរដ្ឋនៅលើរថយន្តនោះមិនមានរងរបួសអ្វីទេ ព្រោះនៅពេលដែលជនមិនស្គាល់មុខដកកាំភ្លើងបាញ់នោះពួកគាត់បានក្រាបចុះទាំងអស់គ្នា។ សមត្ថកិច្ចកំពុងតាមដានលើករណីកើតហេតុនេះ៕
