សៀមរាប៖ប៉ូលីសប៉ុស្តិ៍រដ្ឋបាលឃុំខ្ចាស់ នៃស្រុកសូទ្រនិគម កំពុងស៊ើបអង្កេតរកមុខ អ្នកពាក់ព័ន្ធក្នុងការដាក់បង្កៃគ្រាប់បែកដៃ ១គ្រាប់ ដើម្បីប៉ុនប៉ងសម្លាប់សកម្មជនគណបក្សសង្គ្រោះជាតិម្នាក់។ការស៊ើបអង្កេតធ្វើឡើង បន្ទាប់ពីគេប្រទះឃើញគ្រាប់បែកដៃ១គ្រាប់ ផលិតនៅប្រទេសចិន ត្រូវជនមិនស្គាល់មុខ លួចដាក់បង្កៃនៅលើទូក របស់សកម្មជននៃគណបក្ស
សង្គ្រោះជាតិម្នាក់ ដែលដាក់ទុកចោលនៅតំបន់ព្រៃលិចទឹក សម្រាប់នេសាទត្រី។
មន្ត្រីប៉ូលីសឃុំខ្ចាស់មួយរូប ដែលទៅពិនិត្យហេតុការណ៍ មានប្រសាសន៍កាលពីព្រឹកថ្ងៃសុក្រទី៦ខែកុម្ភៈថា គ្រាប់បែកដៃ ដែលជនមិនស្គាល់មុខ ដាក់បង្កៃលើទូក ដោយមានចងខ្សែអំបោះនោះគឺពិតជាគំរោងប៉ុនប៉ងធ្វើឃាតមនុស្ស ពីព្រោះនៅតំបន់នោះពុំដែលមានគ្រាប់ដែលនៅសេសសល់ពីសម័យសង្គ្រាមទេ។
((កន្លែងនោះមិនដែលមានគ្រាប់សេសសល់ពីសង្គ្រាមទេ ទាល់តែគេដាក់បានមាន។កន្លងមកមិនដឹងថាគាត់មានរឿងនិងអ្នកណា ប៉ុន្តែតាមការស្រាវជ្រាវគាត់មិនដែលមានទំនាស់ជាមួយអ្នកណាទេ))
លោក កុយ សារៀន អាយុ៦៣ឆ្នាំនៅភូមិយាងទេស ឃុំខ្ចាស់ គឺជាសកម្មជន គណបក្សសង្គ្រោះជាតិប្រចាំឃុំនោះ អះអាងថា លោកបានប្រទះឃើញគ្រាប់បែកដៃ១គ្រាប់ ដែលជនមិនស្គាល់មុខលួចបង្កៃ ក្នុងទូករបស់លោក កាលពីវេលាម៉ោង៣រសៀលថ្ងៃទី៥ខែកុម្ភៈកន្លងទៅ នៅពេលលោករុញទូក បំរុងចេញទៅនេសាទត្រី។ 
លោកកុយ សារៀម បញ្ជាក់ថាលោកមិនដែលមានទំនាស់មួយអ្នកណាទេ ក៏ប៉ុន្តែលោកមានអតីតជាសកម្មជនគណបក្សប្រជាជនកម្ពុជា នៅក្នុងសហគមន៍នេសាទប្រចាំភូមិ ហើយលោកទើបតែចាកចេញ ទៅចូលរួមជាមួយគណបក្សសង្គ្រោះជាតិ៕
ដោយ ខេង ឧត្តម
