កណ្តាល ៖ នាថ្ងៃទី០៥ ខែកុម្ភៈ ឆ្នាំ២០១៥ មានកិច្ចប្រជុំពិភាក្សាគ្នាមួយរវាង អាជ្ញាធរខេត្តកណ្តាល ដែលដឹកនាំដោយឯកឧត្តម ជិន សុខុន អភិបាល រងខេត្ត អមដោយលោក ម៉េង យូឡេង ប្រធានមន្ទីរសាធារណការ និងដឹកជញ្ជូន និងលោក នឹម នីរ៉ាដេត អភិបាលស្រុកអង្គស្នួល បានជួបជាមួយតំណាងក្រុមហ៊ុន អេហ្សិត អ៊ិនវេសមេន ជាក្រុមហ៊ុនទទួលសិទ្ធិ ក្នុងការវិនិយោគជួសជុលថែទាំផ្លូវជាតិលេខ៤ ដោយមានលោក ជួន វ៉ាន់ឌន នាយកកិច្ចការធុរកិច្ច និងសហការី មន្ត្រីជំនាញ បច្ចេកទេសចូលរួមផងដែរ ។
ក្នុងជំនួបពិភាក្សានេះ ឯកឧត្តម ជិន សុខុន បានលើកឡើងនូវបញ្ហាមួយចំនួនដែលបានលើកឡើងក្នុងវេទិកាសាធារណះដែលជាសំណូមពររបស់ ប្រជាពលរដ្ឋរស់នៅ ក្នុងភូមិសាស្ត្រស្រុកអង្គស្នួលដែលមាន៖ ទី១-ការយកថ្លៃសេវាប្រើប្រាស់ផ្លូវលើរថយន្តគ្រួសារ ទី២-ការដាក់លូភ្ជាប់នឹងប្រឡាយផ្លូវជាតិ និងទី៣-សំណូមពរធ្វើឲ្យប្រសើរឡើងនូវផ្លូវរណបស្របតាមដងផ្លូវ។
ឆ្លើយតបទៅនឹងការលើកឡើងរបស់ឯកឧត្តមអភិបាលរង លោក ជួន វ៉ាន់ឌន បានបកស្រាយជូនថាចាប់តាំងពីដំណើរការវិនិយោគជួសជុលថែទាំផ្លូវជាតិលេខ៤ ក្រុមហ៊ុនបានអនុវត្តការងារចម្បងមួយចំនួនដូចជា៖ការពង្រីក និង ជួលជុលកែសម្រួលស្ថានភាពផ្ឡូវឲ្យមានលក្ខណះល្អប្រសើរការរៀប ចំហេដ្ឋា រចនាសម្ពន្ធ័តាមដងផ្លូវ និងការសហការ ជាមួយស្ថាបន័ជំនាញក្នុងការអនុវត្តន៏ការងារឲ្យបានសមស្របត្រឹមត្រូវទៅតាមលក្ខណ្ឌ័បច្ចេកទេស និងច្បាប់ជាដើម។
ចំពោះការយកតំលៃសេវាប្រើប្រាស់ផ្លូវពីអ្នកធ្វើដំណើរឆ្លងកាត់ រហូតមកដល់ពេលនេះក្រុមហ៊ុននៅមិនទាន់បានយកពេញថ្លៃនៅឡើយទេ ជាពិសេសចំពោះរថយន្តគ្រួសារដែលតាមកិច្ចសន្យា ត្រូវយក១ដុល្លារ យកបានត្រឹមតែប្រាំមួយកាក់តែប៉ុណ្ណោះ(0.6ដុល្លារជាតម្លៃមិនគិតរួមលើអាករបន្ថែម) ស្មើនឹង៦០%នៃតម្លៃកិច្ចព្រមព្រៀង។ ក្រុមហ៊ុនក៏មិនបានយកថ្លៃសេវាប្រើប្រាស់ផ្លូវពីរថយន្តក្បួនប្រតិភូ, រថយន្តដឹកសំភារៈកងទ័ព, កាកបាទក្រហម, រថយន្តសង្គ្រោះបន្ទាន់, រថយន្តអាជ្ញាដែនដីមួយចំនួននៅតាមដងផ្លូវ និងជាពិសេសរថយន្តដឹកកម្មករ….។ល។
ដែលគិតជាមធ្យមក្នុងរង្វង់ទឹកប្រាក់ប្រមាណជិត៤ម៉ឺនដុល្លារក្នុងមួយខែ។ និងម្យ៉ាងដោយអនុវត្តតាមស្មារតីនៃសេចក្តីជូនដំណឹងរបស់រាជរដ្ឋាភិបាលលេខ ៦២១ ចុះថ្ងៃទី ២០ ខែមេសា ឆ្នាំ២០០៥ ក្រុមហ៊ុនក៏បានអនុវត្តផងដែរនូវការអនុគ្រោះយកតំលៃថោកពិសេសសម្រាប់រថយន្តមន្ត្រីរាជការ និងប្រជាពលរដ្ឋតាមដងផ្លូវដែលធ្វើដំណើរឆ្លងកាត់ញឹកញាប់ក្នុងតម្លៃ១៨០០រៀល។
ទី២៖ដើម្បីនិរន្តភាពសម្រាប់ការអភិវឌ្ឍន៍ប្រកបដោយចីរភាព ក្រុមហ៊ុនក៏បានអនុវត្តន៍ផងដែរតាមរយះការសហការយ៉ាងជិតស្និទ្ធជាមួយក្រសួងសាធារណការនិងដឹកជញ្ជូន ស្ថាបន័ជំនាញពាក់ពន្ធ័ អាជ្ញាធរដែនដីក្នុងការតាមដានត្រួតពិនិត្យ ទប់ស្កាត់រាល់សំណង់អណាធិបតេយ្យតាមដងផ្លូវនិងដីចំណីផ្លូវ។ ទន្ទឹមនឹងមានការលើកឡើងថ្មីៗនេះថា ក្រុមហ៊ុនបានហាមឃាត់ប្រជាជនមួយចំនួនមិនឲ្យដាក់លូ និងបង្ហូរទឹកចូលក្នុងប្រឡាយនោះ ក៏ព្រោះតែមានការបង្ហូរនូវកាកសំណល់រាវយ៉ាងច្រើនពីរោងចក្រ ពីកន្លែងសិប្បកម្ម និងលំនៅដ្ឋានមួយចំនួន និងការតភ្ជាប់លូដែលមានធារទឹកច្រើនពីភូមិសាស្ត្រខាងក្នុងនិងពីតំបន់បុរីជាដើម បង្ហូរមកប្រឡាយផ្លូវជាតិដែលនាំឲ្យមានការលេចលង់ញឹកញាប់នៅរដូវវស្សា បានធ្វើឲ្យប៉ះពាល់ដល់គ្រឹះផ្លូវនិងសូម្បីតែរដូវប្រាំងក៏មានទឹកដក់ក្នុងលូនិងតួប្រឡាយដែលជះក្លិនមិនល្អផងដែរ។
ប្រសិនបើពុំមានការដោះស្រាយនូវការលំបាកចំពោះមុខតាមរយះការសិក្សារៀបចំនិងស្តារនូវប្រពន្ធ័ប្រឡាយមេរំដោះទឹក អាងស្តុកទឹកនិងការបន្តយន្តការរួមគ្នាអនុវត្តឲ្យបានត្រឹមត្រូវទៅតាមច្បាប់និងបទដ្ឋានគតិយុត្តិទេនោះ ប្រជាជនក្នុងតំបន់និងក្រុមហ៊ុនដែលទទួលបន្ទុកថែទាំផ្លូវ គឺជាអ្នករងគ្រោះផ្ទាល់ពីការជន់លេច ដែលនាំឲ្យខូចខាតដល់គ្រឹះផ្លូវ ខូចខាតបរិដ្ឋាននិងផលប៉ះពាល់អវិជ្ជមានដល់ផលប្រយោជន៏សេដ្ឋកិច្ចសង្គមជាក់ជាមិនខាន។
ទី៣ ៖ បន្ទាប់ពីការកាយប្រឡាយមេដើម្បីរំដោះទឹកស្របតាមដងផ្លូវនៅតាមកំណាត់ភូមិសាស្ត្រទីប្រជុំជន ក្រុមហ៊ុនបានសាងសង់ផ្លូវរណប ក្នុងគោលបំណងឲ្យប្រជាជនអាចប្រើប្រាស់លើផ្លូវគ្រួសក្រហមនេះបានមួយចំណែកនិងមួយផ្នែកទៀតគឺទប់ស្កាត់ការលូតរាលដាលនូវសំណង់ផ្សេងៗមកលើដីចំណីផ្លូវ។ មកដល់បច្ចុប្បន្ននេះ ក្នុងគម្រោងពង្រីកផ្លូវឲ្យបាន៤ជួរទៅដល់ទីរួមខេត្តកំពង់ស្ពឺ យើងក៏បានឈូសឆាយចាក់ដីពង្រីកចិញ្ចើមផ្លូវនិងបានកែសម្រួលផ្លូវរណបនិងទីតាំងប្រឡាយលូរំដោះទឹកឲ្យបានសមស្របតាមលក្ខណះបច្ចេកទេសនិង លទ្ធភាពជាក់ស្តែងនៃទីតាំងភូមិសាស្ត្រនីមួយៗ។ ដោយអន្លើនៃផ្លូវរណប មានមួយចំនួនមិនទាន់បានជួសជុល ប៉ុន្តែកំណាត់ផ្លូវដែលបានជួសជុលហើយមួយចំនួនក៏ត្រូវបានបងប្អូនអាជីវករដាក់តាំងលក់ទំនិញនិងឈប់សំចតយ៉ាងអណាធិបតេយ្យនៅតាមដងផ្លូវនេះ។ ឆ្លើយតបនឹងសំណូមពររបស់អាជ្ញាធរស្នើសុំឲ្យបន្តការជួសជុលនោះ ក្រុមហ៊ុនពុំមានការយល់ទាស់ទេ។
បន្ទាប់មកទៀតលោក ម៉េង យូឡេង ប្រធានមន្ទីរសាធារណការ និងដឹកជញ្ជូនខេត្តកណ្តាល បានមានមតិថាក្រុមហ៊ុនបានឆ្លើយតបហើយថាមិនបានយល់ទាស់ចំពោះការស្នើសុំដាក់លូទេ តែមុននឹងក្រុមហ៊ុនអនុញ្ញាតនោះអ្នកសាងសង់ត្រូវគោរពតាមបទដ្ឋានបច្ចេកទេស និងបទបញ្ញត្តិច្បាប់ពាក់ព័ន្ធ។ លោកបាន បន្ថែមទៀតថា ដូច្នេះពាក់ព័ន្ធនឹងបញ្ហាការអនុញ្ញាតនេះ ត្រូវសិក្សាសិនថាតើធារទឹកដែលត្រូវបង្ហូរចូលក្នុងប្រឡាយនោះសមស្របឫអត់ ហើយមានប្រព័ន្ធប្រព្រឹត្តិកម្ម Treatmentនិងការបង្ហូរត្រឹមត្រូវឫក៏អត់ ហើយបានដោះស្រាយផលប៉ះពាល់បរិស្ថាន។
ករណីនេះលោកបានសំណូមពរឲ្យមានការសិក្សារួមគ្នារវាងក្រុមហ៊ុន និងអាជ្ញាធរខេត្ត អំពីលទ្ធភាពរំដោះទឹកពីលំនៅដ្ឋានរបស់ប្រជាពលរដ្ឋក្នុងតំបន់នោះ មន្ទីរមិនអាចបន្តការអនុញ្ញាតដោយផ្ទុយពីបទដ្ឋានបច្ចេកទេស និងបញ្ញត្តិច្បាប់យ៉ាងដូច្នេះទៀតនោះទេ។ លោកបន្តទៀតថា ដើម្បីចូលរួមអនុវត្តច្បាប់ និងបទដ្ឋាននានាឲ្យមានប្រសិទ្ធិភាព នោះអាជ្ញាធរ ឫមន្ទីរជំនាញពាក់ព័ន្ធផ្សេងទៀតមុននឹងផ្តល់ការអនុញ្ញាតសាងសង់ ត្រូវពិនិត្យមើលពីលក្ខខណ្ឌបច្ចេកទេស និងផលប៉ះពាល់បរិស្ថានឲ្យបានត្រឹមត្រូវជាមុនសិន។
ក្នុងឱកាសនោះដែរ លោកអភិបាលស្រុកអង្គស្នូល ក៏បានថ្លែងអំណរគុណដល់ក្រុមហ៊ុន អេហ្សិតដែលបានចូលរួមសហការជាមួយអាជ្ញាធរជួយស្តារប្រឡាយនានាពេលមានជន់លិចម្តងៗនិងការសាងសង់ផ្លូវរណបឲ្យប្រជាពលរដ្ឋបានប្រើប្រាស់ជាពិសេសក្រុមហ៊ុនបានយល់ព្រមនូវការស្នើសុំរបស់ស្រុកឲ្យជួយធ្វើផ្លូវខាងមុខសាលាស្រុកឲ្យបានល្អ និងដាក់ភ្លើងបំភ្លឺនៅបង្គោលរបងមុខសាលាស្រុកដែរ។
ជាចុងក្រោយ ឯកឧត្តម ជិន សុខុន អភិបាលរងខេត្តកណ្តាល ប្រធានក្រុមការងារបានថ្លែងអំណរគុណ ចំពោះក្រុមហ៊ុនបានអនុគ្រោះតំលៃដែលបានអនុវត្តកន្លងមក ហើយឯកឧត្តមនឹងធ្វើរបាយការណ៍ជូនឯកឧត្តមអភិបាលខេត្ត និងជម្រាបជូនទៅអង្គសភា និងរាជរដ្ឋាភិបាល អំពីលទ្ធផលនៃជំនួបពិភាក្សានេះ។ ឯកឧត្តមក៏សូមថ្លែងអំណរគុណ ថ្នាក់ដឹកនាំក្រុមហ៊ុនដែលមានឧកញ៉ា អ៊ឹង ប៊ុនហ៊ូវ ខ្ញុំសង្ឃឹមថាក្រុមហ៊ុននឹងមានការអនុគ្រោះប្រជាពលរដ្ឋនៅខេត្តកណ្តាល។
កន្លងមកក្រុមហ៊ុនតែងតែយកចិត្តទុកដាក់ជួយនិងទទួលនូវសំណើទាំងអស់របស់រាជរដ្ឋាភិបាលនិងអាជ្ញាធរ ដើម្បីជួយដល់សង្គម៕
