ភ្នំពេញ៖ បុរសម្នាក់ បានបើក រថយន្តកាមរីឆ្លាមមួយគ្រឿង ទៅបុកជាមួយគូទរបស់រថយន្តកូរ៉េ ដែលកំពុងចតនៅស្ងៀម នៅកណ្តាលផ្លូវ បណ្តាលឲ្យរងការខូចខាតយ៉ាងដំណំ ហេតុការណ៏នេះបានកើតឡើងកាលពីវេលាម៉ោង ១៦ និង ៤៥នាទី ថៃ្ងទី ២៣ ខែមីនា ឆ្នាំ២០១៤ ស្ថិតនៅតាមបណ្តោយផ្លូវលេខ ២៧១ ក្នុងសង្កាត់ទួលទំពូង ២ ខណ្ឌចំការមន ។
យោងតាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុគេបានឃើញរថយន្តកាមរីឆ្លាម មួយគ្រឿង ពាក់ស្លាកលេខ ភ្នំពេញ 2Q- 8908 បើកបរដោយបុរសម្នាក់ ក្នុងទិសដៅពីកើតទៅលិចតាមបណ្តោយផ្លូវលេខ ២៧១ លុះបានមកដល់ចំណុចកើតហេតុ ស្រាប់តែទៅបុកគូទរបស់រថយន្តកូរ៉េ មួយគ្រឿង ពាក់ស្លាកលេខ ភ្នំពេញ 2A-0799 ដែលកំពុងឈប់នៅស្ងៀមកណ្តាលផ្លូវ រើដែកចេញពីក្នុងឡាន ដាក់ឲ្យគេចំខាងក្រោយ រថយន្តកូរ៉េ យ៉ាងពេញទំហឹង បណ្តាលឲ្យរងការខូចខាតយ៉ាងដំណំ ។
បន្ទាប់ពីហេតុការណ៏នេះបានកើតឡើង សមត្ថកិច្ចនគរបាលចរាចរមូលដ្ឋាន បានចុះមកដល់កន្លែងកើតហេតុ ដើម្បីធ្វើការសម្របសម្រួល ទៅដល់ភាគី រថយន្តទាំងសងខាង ដោយភាគីរថយន្តកូរ៉េ បានចេញថៃ្លជុសជុលរថយន្ត ទៅឲ្យរថយន្តកាមរីឆ្លាម ដើម្បីបញ្ចប់រឿងនៅកន្លែងកើតហេតុ តែម្តង ។
ប្រជាពលរដ្ឋ បានសូមណូមពរទៅដល់អាជ្ញាធរមូលដ្ឋាន ជួយពិនិត្យមើលចំណុចកើតហេតុខាងលើនេះផង ព្រោះបច្ចុប្បន្នត្រូវបានប្រជាពលរដ្ឋដែលបើកសិប្បកម្ម ធ្វើដែកខាងលើ កំពុងតែរំលោភយកដីចំណីផ្លូវ មកធ្វើជាសិប្បកម្មផ្ទាល់ខ្លួន ជាហេតុធ្វើឲ្យផ្លូវកាន់តែតូចចង្អៀត ធ្វើឲ្យបាត់បង់សណ្តាប់ធ្នាប់តាមដងផ្លូវ ជាហេតុធ្វើឲ្យពិបាកក្នុងការធ្វើដំណើរ ទៅវិញ ទៅមករបស់បងប្អូនប្រជាពលរដ្ឋ ដែលាបនធ្វើដំណើរឆ្លងកាត់តាមផ្លូវខាងលើនេះ ៕
