ភ្នំពេញ ៖ ជនជាតិបរទេសម្នាក់ដែលគេសង្ស័យថាប្រើប្រាស់ថ្នាំញៀនលើសកំរិតរហូតដល់វង្វងស្មារតីរហូតដល់ថ្នាក់ចូលទៅអុកឡុកក្នុងសណ្ឋាគារមួយយីហោ អាស៊ានផាលេស បង្កអោយមានការភ្ញាក់ផ្អើលដល់សមត្ថកិច្ចប៉ុស្ដិ៍នគរបាលអូរឫស្សី៣ ចុះធ្វើការឃាត់ខ្លួនកាលពីវេលាម៉ោង១១និង៣០នាទីយប់ថ្ងៃទី២១ខែមករាឆ្នាំ២០១៤ តាមបណ្ដោយផ្លូវព្រះមុនីវង្ស ស្ថិតក្នុងសង្កាត់អូរឫស្សី៣ ខណ្ឌ៧មករា។
នៅកន្លែងកើតហេតុសមត្ថកិច្ចមិនទាន់ស្គាល់អត្តសញ្ញាណជនជាតិបរទេសបែកថ្នាំញៀនខាងលើនៅឡើយទេ។ តាមការអោយដឹងពីបុគ្គលិកដែលបំរើការនៅក្នុងសណ្ឋាគារខាងលើបានឱ្យដឹងថា មុនពេលកើតហេតុគេឃើញបុរសជនជាតិបរទេសម្នាក់ដែលសង្ស័យថាប្រើប្រាស់ថ្នាំញៀនលើសកំរិតរហូតដល់វង្វេងវង្វន់ស្មារតីបានរត់សំរុកចូលក្នុងសណ្ឋាគារ
របស់គាត់ ហើយស្រែកឡូឡានិងបង្កការអុកឡុកពេញក្នុងសណ្ឋាគាររបស់គាត់ ដោយពួកគាត់ឃាត់មិនស្ដាប់ហើយដេញមិនព្រមចេញ ទើបពួកគាត់សម្រេចចិត្តទូរស័ព្ទទៅប៉ូលិសដើម្បីចុះមកអន្តរាគមន៍ ភ្លាមៗសមត្ថកិច្ចប៉ុស្ដិ៍នគរបាលរដ្ឋបាលអូរឫស្សី៣បានចុះមកដល់កន្លែងកើតហេតុខាងលើនិងធ្វើការសួរនាំបុរសជនជាតិបរទេសខាងលើ តែដោយសារនិយាយ
ស្ដាប់គ្នាមិនបានទើបសមត្ថកិច្ចសំរេចចិត្តធ្វើការឃាត់ខ្លួនបុរសជនជាតិបរទេសខាងលើយកទៅសួរនាំនៅប៉ុស្ដិ៍នគរបាលរដ្ឋបាលអូរឫស្សី៣បន្ត និងធ្វើការស្រាវជ្រាវរកក្រុមគ្រួសាររបស់គាត់មកទទួលយកនិងធានារូបគាត់ត្រឡប់ទៅផ្ទះវិញ៕
