នៅក្នុងឱកាសនោះដែរ លោកប្រធានអង្គការមូលនិធិបង្ការបួសអាស៊ី បានលើកឡើងដែរថា សហភាពសហព័ន្ធយុវជនកម្ពុជា និងអង្គការមូលនិធិបង្ការបួសអាស៊ី បានធ្វើជាដៃគូក្រៅផ្លូវការជាមួយ គ្នាតាំងពីឆ្នាំ២០១៤ ហើយពេលនេះបានក្លាយជាដៃគូជាផ្លូវការ។
តាមរយៈកិច្ចសហការនេះ យើងនឹង រួមគ្នាដើម្បីធ្វើឲ្យប្រសើរឡើងនូវអត្រាពាក់មួកសុវត្ថិភាព ក្នុងចំណោមអ្នករួមដំណើរតាមទោចក្រ យាន យន្តនៅកម្ពុជា ដែលពេលបច្ចុប្បន្ននេះមានចំនួនតែ ៩%ប៉ុណ្ណោះ ។ ប្រសាសន៍ខាងលើនេះ បានលើក ឡើងនៅក្នុងពិធីចុះកិច្ចព្រមព្រៀងលើអនុសារណៈយោគយល់គ្នា ជាមួយអង្គការមូលនិធិបង្ការរបួស អាស៊ី ដើម្បីធ្វើឲ្យប្រសើរឡើងនូវអត្រាពាក់មួកសុវត្ថិភាព ក្នុងចំណោមអ្នករួមដំណើរតាមទោចក្រ យានយន្តនៅកម្ពុជា នៅមជ្ឈមណ្ឌលសហប្រតិបត្តិការណ៍កម្ពុជា-ជប៉ុន CJCC នារសៀលថៃ្ង ទី១០កុម្ភៈ នេះ។
ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា មានប្រសាសន៍ថា សហភាព សហព័ន្ធយុវជនកម្ពុជា បានចូលរួមចំណែកបំពេញតួនាទីយ៉ាងសំខាន់ក្នុងការគៀងគរ និងអប់រំយុវជន ក៍ដូចជាប្រជាពលរដ្ឋឲ្យគោរពច្បាប់ចរាចរណ៍ និងពាក់មួកសុវត្ថិភាពជាប្រចាំ។ ឯកឧត្តម បន្តថា យុវជនបានចូលរួមយ៉ាងសកម្មក្នុងការផ្សព្វផ្សាយ អំពីសុវត្ថិភាពចរាចរណ៍ ដោយមានបំណងបង្កើន ការពាក់មួកសុវត្ថិភាព ក្នុងចំណោមអ្នករួមដំណើរតាមទោចក្រយានយន្ត ពិសេស សម្រាប់កុមារ និងយុវជន។
ព្រមជាមួយគ្នានោះ សហភាពសហព័ន្ធយុវជនកម្ពុជា ពេញចិត្តធ្វើជាដៃគូជាមួយអង្គការ មូលនិធិបង្ការបួសអាស៊ី ដើម្បីសង្គ្រោះជីវិតមនុស្ស និងបន្តគាំទ្រច្បាប់ ដែលកំណត់ឲ្យអ្នករួមដំណើរ តាមទោចក្រយានយន្ត ត្រូវពាក់មួកសុវត្ថិភាព ដើម្បីឈានទៅសំរេចគោលដៅនៅពេលអនាគត។
ឆ្លៀតក្នុងឱកាសនោះ ឯកឧត្តម ពៅ ម៉ាលី អគ្គលេខាធិការគណៈកម្មាធិការសុវត្ថិភាពចរាចរណ៍ ផ្លូវគោក មានប្រសាសន៍បញ្ជាក់ថា សហភាពសហព័ន្ធយុវជនកម្ពុជា គឺជាអង្គការដ៍មានសក្តានុពល ដែលមានលទ្ធភាពចូលរួមផ្សព្វផ្សាយសារអប់រំអំពីសុវត្ថិភាពចរាចរណ៍ ទៅដល់យុវជន ប្រជាពលរដ្ឋ រួមទាំងសិស្សានុសិស្ស-និស្សិត នៅតាមគ្រឹះដ្ឋានសិក្សាអប់រំនានាផងដែរ។
សហភាពសហព័ន្ធយុវជន កម្ពុជា និងអង្គការមូលនិធិបង្ការបួសអាស៊ី នឹងបំពេញការងាររួមគ្នា ដើម្បីបន្តគាំទ្រកិច្ចខិតខំប្រឹងប្រែង របស់រាជរដ្ឋាភិបាលកម្ពុជាក្នុងការរក្សាសុវត្ថិភាពចរាចរណ៍ដល់អ្នករួមដំណើរតាមទោចក្រយានយន្ត៕
