ភ្នំពេញ ៖ យុវជន៤នាក់ត្រូវបានប៉ូលិសប៉ុស្ដិ៍នគរបាលរដ្ឋបាលទឹកថ្លាសហការជាមួយកម្លាំងប៉ូលិសអន្តរាគមន៍ខណ្ឌសែនសុខធ្វើការឃាត់ខ្លួន ខណៈពេលដែលយុវជន៤នាក់ខាងលើបានធ្វើសកម្មភាពវាយបំផ្លាញសម្ភារៈក្នុងបន្ទប់ខារ៉ាអូខេមួយយីហោ Happy ដោយសារតែខឹងនិងនារីបំរើការងារក្នុងខារ៉ាអូខេនោះចេះតែចេញទៅអង្គុយជាមួយភ្ញៀវនៅបន្ទប់ផ្សេងកាលពីវេលាម៉ោង០២និង១០នាទីរំលងអាធ្រាត្រឈានចូលថ្ងៃទី២២ខែមិនាឆ្នាំ២០១៤ តាមបណ្ដោយផ្លូវ៣៧១ ហៅផ្លូវសឡា ស្ថិតក្នុងភូមិត្រពាំងឈូក សង្កាត់ទឹកថ្លា ខណ្ឌសែនសុខ។
យុវជនទាំង៤នាក់ខាងលើដែលត្រូវប៉ូលិសឃាត់ខ្លួននោះទី១ឈ្មោះ កែវ ចាន់ធឿន អាយុ៣១ឆ្នាំមុខរបរជាងជួសជុលរថយន្ត ស្នាក់សង្កាត់ភ្នំពេញថ្មី ខណ្ឌសែនសុខ ទី២ឈ្មោះ កែវ សុខចាន់ អាយុ២៤ឆ្នាំជានិស្សិតឆ្នាំទី២ ស្នាក់ក្នុងសង្កាត់ភ្នំពេញថ្មី ខណ្ឌសែនសុខ ទី៣ឈ្មោះ ស្រ៊ុម សារី អាយុ៣៤ឆ្នាំមុខរបរកម្មកររោងចក្រ ស្នាក់នៅភូមិត្រពាំងឈូក សង្កាត់ទឹកថ្លា ខណ្ឌសែនសុខ ទី៤ឈ្មោះ ដង សុជាតិ អាយុ២៨ឆ្នាំមុខរបរជាងឈើ ស្នាក់នៅសង្កាត់ទឹកថ្លា ខណ្ឌសែនសុខ។
តាមការអោយដឹងពីសមត្ថកិច្ចខណ្ឌសែនសុខបានឱ្យដឹងថានៅមុនពេលកើតហេតុ យុវជនបង្កហេតុខាងទាំង៤នាក់បាននាំគ្នាមកចូលច្រៀងខារ៉ាអូខេហើយផឹកស្រាបៀរួចបានហៅនារី៤នាក់មកអង្គុយកំដរខ្លួន តាំងពីម៉ោង៦ល្ងាចរហូតដល់ម៉ោង២និង០០នាទីរំលងអាធ្រាត្រ ដោយផឹកស្រាបៀអស់៣កេសកន្លះ ក្នុងនោះមានអង្គរដបចំនួន១កេសកន្លះ និងស្រាបៀ
ABC ចំនួន២កេស ដោយម្នាក់ៗស្រវឹងស្រាជោកជាំ ហើយក៏កើតជាកំហឹងខឹងនិងនារីខារ៉ាអូខេទាំង៤នាក់នោះ ហើយក៏បានធ្វើសកម្មភាពបោកដបស្រាបៀនិងវាយបំផ្លាញសំភារៈមួយចំនួននៅក្នុងបន្ទប់ខារ៉ាអូខេនោះបណ្ដាលអោយបែកតុកញ្ចក់ និងឧបករណ៍ចាក់ចម្រៀងដួលរប៉ាត់រប៉ាយពេញក្នុងបន្ទប់ខារ៉ាអូខេ ឃើញដូចនោះអ្នកគ្រប់គ្រងខារ៉ាអូខេបានទូរស័ព្ទ
ប្ដឹងសមត្ថកិច្ចខណ្ឌសែនសុខចុះមកអន្តរាគមន៍និងធ្វើការឃាត់ខ្លួនបុរស៤នាក់ខាងលើយកទៅសួរនាំនៅក្នុងប៉ុស្ដិ៍នគរបាលរដ្ឋបាលទឹកថ្លា។ នៅចំពោះមុខសមត្ថកិច្ចបុរសស្រវឹងស្រាជោកជាំទាំង៤នាក់ខាងលើបានសារភាពថា ខ្លួនពិតជាបានវាយបំផ្លាញសម្ភារៈក្នុងបន្ទប់ខារ៉ាអូខេខាងលើនោះមែន ព្រោះតែខឹងនិងនារីបំរើការងារនៅក្នុងខារ៉ាអូខេនោះមិនព្រមអង្គុយ
កំដរគាត់ ហើយចេះតែចេញទៅអង្គុយជាមួយភ្ញៀវដ៏ទៃនៅបន្ទប់ផ្សេង។ បច្ចុប្បន្នយុវជនបង្កហេតុខាងលើត្រូវបានប៉ូលិសឃុំខ្លួនបណ្ដោះអាសន្ននៅក្នុងប៉ុស្ដិ៍រដ្ឋបាលទឹកថ្លា រង់ចាំធ្វើការដោះស្រាយតាមផ្លូវច្បាប់៕ 
