ឯកឧត្តម គឹម ធា ប្រធានក្រុមប្រឹក្សាខេត្ត ឯកឧត្តម ជៀង អំ អភិបាលខេត្តស្វាយរៀង បានអញ្ជើញជាអធិបតី ក្នុងអង្គសន្និបាតបូកសរុបលទ្ធផលការងារ ប្រចាំឆ្នាំ២០១៤ និងទិសដៅការងារឆ្នាំ២០១៥ របស់រដ្ឋបាលខេត្តស្វាយរៀង ដែលមានរយៈពេលមួយថ្ងៃ ដែលបានប្រព្រឹត្តទៅ នាសាលប្រជុំសណ្ឋាគារ ទន្លេវ៉ៃគោ ក្រុងស្វាយរៀង ព្រមទាំងមានការអញ្ជើញចូលរួម ពីសំណាក់ ឯកឧត្តម លោកជំទាវ ជាសមាជិកក្រុមប្រឹក្សាខេត្ត /ក្រុង/ស្រុក កងកម្លាំងប្រដាប់អាវុធ ទាំងបីប្រភេទ រួមនឹងមន្ត្រី ដែលមានការពាក់ព័ន្ធនានា នៅទូទាំងខេត្ត ប្រមាណជាង៥០០នាក់ កាលពីព្រឹកថ្ងៃទី១១ ខែកុម្ភៈ ឆ្នាំ២០១៥ ។
ឯកឧត្តម គឹម ធា ប្រធានក្រុមប្រឹក្សា ខេត្តស្វាយរៀង បានអាននូវសុន្ទរកថា បើកសន្និបាតបូកសរុបលទ្ធផលការងារ ប្រចាំឆ្នាំ២០១៤ និងលើកទិសដៅបន្តឆ្នាំ២០១៥ របស់រដ្ឋបាលខេត្តស្វាយរៀង ដោយអនុវត្តតាមកម្មវិធីនយោបាយ និងយុទ្ធសាស្ត្រចតុកោណ ដំណាក់កាលទី៣ របស់រាជរដ្ឋាភិបាលកម្ពុជា ដែលមានសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី ជាប្រមុខដឹកនាំ ប្រកបដោយគតិបណ្ឌិត ដែលបានកែទម្រង់ ស៊ីជម្រៅ និងទូលាយលើវិស័យសំខាន់ៗ ដើម្បីធានាអភិបាលកិច្ចល្អ និងការអភិវឌ្ឍសេដ្ឋកិច្ចសង្គម
ប្រកបដោយចីរភាព ពិសេសការកែទម្រង់រដ្ឋបាលសាធារណៈ ការកែទម្រង់គ្រប់គ្រងហិរញ្ញវត្ថុសាធារណៈ ការកែទម្រង់វិមជ្ឈការ និងវិសហមជ្ឈការ ការពង្រឹងសមត្ថភាពមន្ត្រីរាជការ ធ្វើឲ្យមន្ត្រីរាជការ មានភាពស្វាហាប់ក្នុងការងារ ប្រកាន់ខ្ជាប់នូវឥរិយាបថវប្បធម៌ សេវាសាធារណៈ ឆន្ទៈម្ចាស់ការ ភក្ដីភាព និងមនសិការវិជ្ជាជីវៈ ខិតខំបំពេញការងារ ពិសេសការផ្តល់
សេវាសាធារណៈ ប្រកបដោយតម្លាភាព និងគណនេយ្យភាព សំដៅពង្រឹង ការអភិវឌ្ឍតាមបែបប្រជាធិបតេយ្យ នៅថ្នាក់ក្រោមជាតិឲ្យកាន់តែមានភាពរឹងមាំ និងប្រកបដោយចីរភាព ។ តាមរយៈគណៈបញ្ជាការឯកភាពគ្រប់ថ្នាក់ អាជ្ញាធររដ្ឋបាលដែនដី បានយកចិត្តទុកដាក់បន្តជំរុញចលនា នៃការអនុវត្តគោលនយោបាយ ភូមិ/ឃុំ មានសុវត្ថិភាព ឲ្យមាននិរន្តរភាព និងសកម្មនៅគ្រប់មូលដ្ឋាន សំដៅធានារក្សាសន្តិសុខ សណ្ដាប់ធ្នាប់សាធារណៈ នៅគ្រប់មូលដ្ឋាន 
និងស្ថិរភាពនយោបាយល្អប្រសើរ ធ្វើឲ្យប្រពលរដ្ឋរស់នៅប្រកបដោយសុភមង្គល ទាំងក្នុងគ្រួសារ ទាំងក្នុងសហគមន៍ ក៏ដូចជាក្នុងខេត្តស្វាយរៀងទាំងមូល ជាពិសេសបានធ្វើឲ្យដំណើរការនៃការបោះឆ្នោត ជ្រើសរើសក្រុមប្រឹក្សាខេត្ត ក្រុង ស្រុក អាណត្តិទី២ បានប្រព្រឹត្តទៅដោយរលូន ត្រឹមត្រូវ គ្មានអំពើហិង្សា ស្របតាមគោលការណ៍លទ្ធិប្រជាធិបតេយ្យ សេរីពហុបក្ស ៕
