សៀមរាប ក្រសួងទេសចរណ៍ បានយកចិត្តទុកដាក់ខ្ពស់ចំពោះសេវាកម្មម៉ាស្សានៅក្នុងវិស័យទេសចរណ៍ជាតិ ហើយ បុគ្គលិកជំនាញមួយនេះ បានទទួលផលដោយផ្ទាល់ពីវិស័យទេសចរណ៍ផងដែរ ។ ដោយពិនិត្យឃើញថា តាមរយៈនៃការបំរើសេវាកម្មម៉ាស្សា វាគឺជាផលិតផលទេសចរណ៍ដ៏ពេញនិយម ក្នុងការសម្រួលសុខភាពជូនភ្ញៀវទេសចរនោះ ក្រសួងទេសចរណ៍ ក្រោមកិច្ចសហការជាមួយក្រសួងសុខាភិបាល រួមទាំងមានការចូលរួមជួយជ្រោមជ្រែង ពីសំណាក់ប្រធានអង្គភាពព្យាបាលដោយចលនានៃមន្ទីរពេទ្យកាល់ម៉ែត្រ!
សិក្ខាកាមចំនួន១៥០នាក់ លើចំនួនជិត ១០០០នាក់ ដែលមកពីទីតាំងអាជីវកម្មម៉ាស្សាធំៗប្រមាណជា៥០កន្លែងនៅក្នុងក្រុងសៀមរាប កំពុងទទួលយកនូវវគ្គបំប៉នជំនាញម៉ាស្សាលើកទី១ ដែលរៀបចំឡើងដោយមន្ទីរទេសចរណ៍ខេត្តសៀមរាប ហើយវគ្គបំប៉ននេះផងដែរ បានចាប់ផ្តើមបើកដំណើរការជាផ្លូវការ ក្រោមវត្តមានរបស់ ឯកឧត្តម ប៉ាក់ សុខុម រដ្ឋលេខាធិការក្រសួងទេសចរណ៍ កាលពីថ្ងៃទី០៦ ខែកុម្ភៈកន្លងទៅ និងមានរយៈពេលសិក្សាបំប៉នចំនួន២សប្តាហ៍ ។
លោកជុង សុខេមរៈ អនុប្រធានមន្ទីរទេសចរណ៍ខេត្តសៀមរាប បាននិយាយឲ្យដឹងនាព្រឹកថ្ងៃទី១១ ខែកុម្ភៈនេះថា ៖ វាគឺជាជោគជ័យដែលមិនស្មានដល់ សម្រាប់ការបើកវគ្គបំប៉នជំនាញម៉ាស្សាលើកទី១នេះ ដោយពីដំបូង យើងបានគិតទុកក្នុងផែនការនៃការបើកវគ្គនេះជាបន្តបន្ទាប់ទៀត ឲ្យស្ថិតនៅក្នុងយន្តការនៃអប់រំអំពាវនាវ សូមឲ្យម្ចាស់ហាងម៉ាស្សាទាំងអស់ចូលរួមសហការ នឹងផ្តល់ឱកាសឲ្យបុគ្គលិករបស់ខ្លួន បានស្រូបយកចំណេះដឹងជំនាញ និងដកស្រង់យកបទពិសោធន៍ សម្រាប់អភិវឌ្ឍសមត្ថភាពរបស់ខ្លួន ឲ្យក្លាយជាអ្នកជំនាញម៉ាស្សា ដែលមានការទទួលស្គាល់ក្នុងកម្រឹតថ្នាក់ជាតិ ដោយការប្រគល់ជូននូវវិញ្ញាបនបត្រ ឬ
សញ្ញាបត្របច្ចេកទេស ផងដែរ ។ លោកបានបញ្ជាក់ក្នុងកត្តាជោគជ័យនេះថា ៖ មកទល់នឹងពេលនេះ គឺក្នុងខណៈពេលនេះ ដែលវគ្គបំប៉នជំនាញម៉ាស្សាលើកដំបូងមិនទាន់បានបញ្ចប់នោះ គឺមានម្ចាស់ទីតាំងអាជីវកម្មម៉ាស្សាជាច្រើនកន្លែងទៀត បានសុំចុះឈ្មោះឲ្យបុគ្គលិករបស់ខ្លួន បានចូលរៀនវគ្គបំប៉ននេះ ជាបន្តបន្ទាប់ ។
លោកបានបញ្ជាក់បន្ថែមថា ដើម្បីឆ្លើយតបទៅនឹងភាពជោគជ័យទាំងនេះ ក្រសួងទេសចរណ៍ បានផ្តល់លទ្ធភាពឲ្យមន្ទីរទេសចរណ៍ខេត្តសៀមរាប អនុវត្តតាមយន្តការអនុគ្រោះជាពិសេស ដោយផ្តល់អទិភាពជូនដល់ទីតាំងអាជីវកម្មម៉ាស្សាទាំងឡាយណានៅក្នុងក្រុងសៀមរាប ដែលមានបុគ្គលិកជំនាញម៉ាស្សាចាប់ពី ៧០នាក់ឡើងទៅ មន្ទីរនឹងមានដំណោះស្រាយ បញ្ជូនគ្រូបង្គោល ទៅបើកវគ្គបំប៉នជូនដល់ទីតាំងអាជីវកម្មនោះដោយផ្ទាល់ ។
លោកអនុប្រធានមន្ទីរទេសចរណ៍ខេត្តសៀមរាប បានវាយតម្លៃដែរថា ផ្អែកតាមកត្តាជោគជ័យខាងលើនេះ ទៅថ្ងៃអនាគត សេវាកម្មម៉ាស្សានៅតំបន់ទេសចរណ៍អង្គរ-សៀមរាប មិនត្រឹមតែបានក្លាយជាផលិតផលរួមចំណែកអភិវឌ្ឍន៍វិស៍យទេសចរណ៍នៅកម្ពុជាប៉ុណ្ណោះទេ តែអ្នកជំនាញបំរើសេវាកម្មម៉ាស្សាជាស្ត្រីភេទ នឹងទទួលបាននូវអត្តសញ្ញាណជំនាញពិតប្រាកដរបស់ខ្លួនហើយឈ្មោះថា ស្ត្រីម៉ាស្សា នឹងត្រូវបានលុបបំបាត់ចេញពីទស្សនៈអវិជ្ជមានទាំងឡាយ ផងដែរ ៕
