សៀមរាប គណៈប្រតិភូខេត្តយូណាន់ នៃសាធារណរដ្ឋប្រជាមានិតចិន ដែលដឹកនាំដោយ លោកចៅ ជីន ប្រធាននាយក ដ្ឋានឃោសនាការនៃគណៈកម្មាធិការបក្សខេត្តនិង ជាគណៈអចិន្ត្រៃយ៍ខេត្តយូណាន់ នៃសាធារណរដ្ឋប្រជាមានិតចិន និង សហការី បានចូលជួបសម្តែងការគួរសម និង ពិភាក្សាការងារមួយចំនួន ជាមួយលោក ឃឹម ប៊ុនសុង អភិបាលនៃគណៈ អភិបាលខេត្តសៀមរាប ព្រមទាំងអស់លោក លោកស្រីជាថ្នាក់នាំមន្ទីរមានការពាក់ព័ន្ធ និង អាជ្ញាធរក្រុង នៅសណ្ឋាគារ បុរីអង្គរ ខេត្តសៀមរាប កាលពីព្រឹកថ្ងៃទី ១១ ខែ កុម្ភះ ឆ្នាំ២០១៥នេះ ។
ក្នុងកិច្ចស្វាគមន៍របស់លោក ឃឹម ប៊ុនសុងបានបញ្ជាក់ថា ក្នុងដំណើរទស្សនកិច្ច របស់គណៈប្រតិភូខេត្ត យូណាន់ នៅលើទឹកដីប្រវត្តិសាស្ត្រសៀមរាបនាពេលនេះ គឺជាបង្ហាញនៃការរឹតចំណងចំណងមិត្តភាពរវាងកម្ពុជា និង ចិន ក្នុងកិច្ចសហប្រតិបត្តិការឲ្យកាន់តែស្អិតរមួត ក្នុងទិសដៅឈានទៅរកការអភិវឌ្ឍន៍ជាដៃគូរយុទ្ធសាស្ត្រ គ្រប់ជ្រុងជ្រោយ ។ ម្យ៉ាងទៀតថ្ងៃនេះក៏ជាព្រឹត្តិការណ៍ដ៏ប្រពៃ រវាងខេត្តសៀមរាប និង ខេត្តយូណាន់ បន្ទាប់ពីខេត្តរបស់យើងទាំងពីរ បានចាប់ផ្តើមកិច្ចព្រមព្រៀងរវាងគ្នា ស្តីពីការបង្កើតចំណងមិត្តភាព-មិត្តភាពថ្នាក់ខេត្ត ដែលជាកាលានុវត្តភាព ក្នុងការពង្រឹងនូវចំណងសាមគ្គីភាព និង ពង្រីកទំនាក់ទំនងកិច្ចសហប្រត្តិការរវាងខេត្តនិងខេត្ត និង ប្រជាជនយើងទាំងពីរសៀមរាប-យូណាន់ផងដែរ ។
លោកបានបន្តទៀតថា ជានិច្ចជាកាលកម្ពុជាធ្វើការគាំទ្រគោលនយោបាយចិនតែមួយ និង កិច្ចអភិវឌ្ឍសេដ្ឋកិច្ច-សង្គមរួមគ្នា ព្រមទាំងជម្រុញឲ្យកាន់តែរឹងមាំក្នុងនាមជាដៃគូយុទ្ឋសាស្ត្រគ្រប់ជ្រុងជ្រោយមិនអាចខ្វះបាន នៃនយោបាយចិន-កម្ពុជាក្នុងតំបន់ឱ្យបានកាន់តែខ្លាំងក្លា និងមានសក្តានុពលទ្វេឡើង ។ លោកឃឹម ប៊ុនសុង ក៏បានលើកឡើង អំពីលទ្ធផលជាក់ស្តែង សម្រាប់ខេត្តសៀមរាបកន្លងមក រដ្ឋាភិបាល និងប្រជាជនចិន បានផ្តល់ជំនួយឧបត្ថម្ភ ក៏ដូចជាធ្វើធុរកិច្ចក្នុងការកសាងហេដ្ឋារចនាសម្ព័ន្ឋរូបវ័ន្ត នៃការបណ្តុះបណ្តាលធនធានមនុស្ស ការអភិរក្សជួសជុលសម្បត្តិបេតិកភណ្ឌវប្បធម៌ លើកកម្ពស់តម្លៃវប្បធម៌ជាតិ ជម្រុញ និង លើកកម្ពស់សេវាកម្មទេសចរណ៍នានា ។ លោកក៏មានសង្ឃឹមជឿជាក់ ពីការភ្ជាប់ទំនាក់ទំនង រវាង
ខេត្តសៀមរាប និងខេត្តយូណាន់ គឺជាគំនិតរបស់ថ្នាក់ដឹកនាំខេត្តទាំងពីរ ដែលមានមនសិការខ្ពស់ ក្នុងការរួមចំណែកពង្រឹង-ពង្រីកទំនាក់ទំនងនៃ ប្រជាជាតិយើងទាំងពីរដែលមានតាំងពីយូរលង់បន្តរហូតដល់បច្ចុប្បន្ន និងទៅអនាគត សំដៅលើកកម្ពស់ការអភិវឌ្ឍ និងវិបុលភាព ដោយអនុលោមតាមគោលការណ៍ស្មើភាព និងផលប្រយោជន៍ទៅវិញទៅមក ដោយផ្តោតលើ វិស័យសំខាន់ៗ ជាអាទិ៍វិស័យសេដ្ឋកិច្ចពាណិជ្ជកម្មទេសចរណ៍វប្បធម៌កសិកម្មអប់រំ អភិវឌ្ឍជនបទ វិស័យសុខាភិបាល និងវិស័យមួយចំនួនទៀត។ ឯកឧត្តមសូមឲ្យវប្បធម៌ នៃការចែករំលែក និងការជួយគ្នា ដ៏ល្អប្រពៃនេះ ធ្វើឲ្យ ទំនាក់ទំនងឱ្យចំណងមិត្តភាព សាមគ្គីភាព រវាងខេត្តយើងទាំងពីរនេះ ឈានឆ្ពោះទៅរកវឌ្ឍនភាពថ្មីៗ ថែមទៀត ព្រមទាំងសូមឲ្យគណៈប្រតិភូ ជួយជម្រុញដល់អ្នកវិនិយោគចិន ចូល មកធ្វើវិនិយោគនៅខេត្តសៀមរាប ហើយអាជ្ញាធរខេត្តក៏គាំទ្រនូវរាល់គម្រោងវិនិយោគនោះផងដែរ ។
មានប្រសាសន៍នោះលោក ចៅ ជីន ក៏បានបញ្ជាក់ពីគឺមានគោលបំណងសហប្រតិបត្តិការ ក្នុងការរៀបចំបញ្ចេញស្នាដៃតាមរយៈការសម្តែងសិល្បៈរួមគ្នា ក្នុងទិសដៅបង្កើតឲ្យមានភាពកាន់តែ ស្និទ្ធស្នាល និងទំនាក់ទំនងនៃដួងព្រលឹងរបស់ជាតិ និង ជាស្មារតីបង្កើតនូវមនោសញ្ចេតនាការគោរព ស្រឡាញ់រាប់អានគ្នាយ៉ាងជ្រាលជ្រៅដែលផ្តើមចេញជាមូលដ្ឋាន ក្នុងការទំនាក់ទំនងជាមិត្តភាពប្រកបដោយ ភាពរឹងមាំ ស្ថេរភាព និង ជាចលករឈានទៅដល់កម្រិតកំពូលសម្រាប់ការអភិវឌ្ឍន៍ប្រទេសទាំងពីរ ។
ឯកឧត្តមបានបញ្ជាក់ថា តាមរយៈរាត្រីស្រមោលសនេះ នៃកិច្ចប្រតិបត្តិការមនុស្សធម៌ យើងបានប្រមូលថវិកាមនុស្សធម៌ ផ្តល់ជូនដល់កាកបាទក្រហមកម្ពុជាផងដែរ ។ ម្យ៉ាងទៀត តាមរយៈនេះដែរ បានធ្វើឲ្យចំណងមិត្តភាពកម្ពុជា ចិន មានការរីកចម្រើន លើកិច្ចសហប្រតិបត្តិការលើវិស័យវប្បធម៌ នៃប្រទេសទាំងពីរ ។ ក្នុងលោក ចៅ ជីន ក៏លើកឡើង ពីកិច្ចទំនាក់ទំនងប្រតិបត្តិការរវាងខេត្តសៀមរាប . យូណាន់ បានដំណើរការទៅបានល្អ ក្នុងការសិក្សាស្វែងយល់ពីគ្នា លើវិស័យពាណិជ្ជកម្ម កសិកម្ម វប្បធម៌ អប់រំ និង សុខាភិ បាល។
ឯកឧត្តមនឹងយកចិត្តទុកដាក់លើកការជម្រុវដល់អ្នកវិនិយោគលើវិស័យកសិកម្ម ចូលមកកាន់ខេត្តសៀមរាប ក្នុងនោះឯកឧត្តមក៏បានថ្លែងអំណរគុណដល់អាជ្ញាធរខេត្តសៀមរាប ក្នុងការគាំទ្រអ្នកវិនិយោគចិននៅខេត្តសៀមរាប សំខាន់លើវិស័យវប្បធម៌ តាមរយៈស្នាមញញឹមអង្គរ ដែលបានដំណើការទៅបានល្អ ។ ម្យ៉ាងទៀតទៅថ្ងៃខាងមុខ នឹងធ្វើឲ្យរវាងខេត្តសៀមរាប និង ខេត្តយូណាន នឹងក្លាយទៅជាតំបន់សេដ្ឋកិច្ច អាស៊ានទៀតផង តាមរយៈការតាំង ពិពណ៌ពាណិជ្ជកម្មអាស៊ីប៉ាស៊ីហ្វីក ដែលនឹងធ្វើឲ្យចំណងនៃកិច្ចសហប្រតិបត្តិការរវាងខេត្តទាំងពីរកាន់តែល្អទ្វេរឡើង ទៀតផង ។ ក្នុងនោះដែរគណៈប្រតិភូ ក៏បានធ្វើការអញ្ជើញគណៈអភិបាលខេត្តសៀមរាប ចូលរួមការតាំងពិព័ណ៌ នៅខេត្តយូណាន់ នៃសាថារណរដ្ឋប្រជាមានិតចិន នាខែ មិថុនា ឆ្នាំ២០១៥ខាងមុខនេះផងដែរ ៕
