ចក្រភពអង់គ្លេសនឹងមិនគាំទ្រ ចំពោះការបញ្ជូនគ្រឿងសភាវុធអោយទៅកាន់ ប្រទេសអ៊ុយក្រែនរដ្ឋលេខាធិការក្រសួងការបរទេសចក្រភពអង់គ្លេស លោក Philip Hammond បានថ្លែងថា ខ្លួននឹងមិនគាំទ្រចំពោះគម្រោងបញ្ជូនគ្រឿងសភាវុធអោយទៅកាន់ រដ្ឋាភិបាលក្រុងគៀវ ដើម្បី
ជួយដល់កងកម្លាំងអ៊ុយក្រេនប្រឆាំងនឹងក្រុមឧទ្ទាម បះបោរទាមទារផ្តាច់ខ្លួនគាំទ្ររ៉ុស្ស៊ីនោះទេ ព្រោះថាទង្វើនេះ ដូចជាការបញ្ឆេះ ភ្លើងសង្គ្រាមនៅតំបន់អឺរ៉ុប ។
ការលើកឡើងរបស់រដ្ឋលេខាធិការ ក្រសួងការបរទេសចក្រភពអង់គ្លេសរូបនេះ បានធ្វើឡើងស្របពេលដែលរដ្ឋាភិបាលក្រុងឡុង បានទទួលព័ត៌មាននាពេលថ្មីៗ នេះថា សហរដ្ឋអាមេរិកកំពុងធ្វើការពិចារណាលទ្ធភាពដែលអាចធ្វើទៅបាន ចំពោះគម្រោងបញ្ជូនអាវុធយុទ្ធភ័ណ្ឌធនធ្ងន់ទៅឱ្យរដ្ឋាភិបាលអ៊ុយក្រែន ខណៈ ដែលប្រទេសបារាំង និង អាល្លឺម៉ង់ក៏បានគាំទ្រដល់ចំណាត់ការមួយនេះផងដែរ ។
លោក Philip Hammond បានបញ្ជាក់បន្ថែមថា បើទោះបីចក្រភពអង់គ្លេសនឹងមិន ចូលរួមដោះស្រាយដោយផ្ទាល់ពាក់ព័ន្ធនឹងបញ្ហាជម្លោះនៅក្នុងប្រទេសអ៊ុយក្រែន ក៏ប៉ុន្តែរដ្ឋាភិបាលក្រុងឡុង នឹងមិនអនុញ្ញាតអោយរដ្ឋាភិបាលក្រុងគៀវដួលរលំ នោះដែរ ៕
