ខេត្តបន្ទាយមានជ័យ៖មេបញ្ជាការយោធាសឹករងខេត្តបន្ទាយមានជ័យ លោកឧត្តមសេនីយ៍ត្រី ភ្លន់ តារាត្រូវគេមើលឃើញថាបានប្រើប្រាស់សិទ្ធិអំណាចយកកម្លាំងយោធានៅក្រោមឱវាទរបស់ខ្លួន ឱ្យមកយាមកាមការពារគ្រឿងចក្រក្រុមហ៊ុនរបស់លោកខ្លាចក្រែងមានការតវ៉ាពីសំណាក់ប្រជាពលរដ្ឋខណៈក្រុមហ៊ុនរបស់លោកកំពុងធ្វើអាជីវកម្មជីកកកាយដីស្រះបុរាណរបស់រដ្ឋមួយកន្លែងនៅខាងក្រោយសាលាក្រុងសិរីសោភ័ណ ខេត្តបន្ទាយមានជ័យដើម្បីយកអាចម៌ដីលក់។
សកម្មភាពប្រើប្រាស់កម្លាំងយោធាដែលស៊ីប្រាក់ខែរដ្ឋក្នុងតួនាទីបំរើប្រជាជននិង ការពារជាតិបែរត្រូវគេមើលឃើញថាលោកមេបញ្ជាការយោធាសឹករងខេត្តបន្ទាយមានជ័យប្រើប្រាស់សម្រាប់ការពារផលប្រយោជន៍បុគ្គលនៅពេលនេះត្រូវរងការិះគន់ពីសំណាក់មជ្ឈដ្ឋាន ប្រជាពលរដ្ឋរស់នៅក្នុងខេត្តបន្ទាយមានជ័យ។
អាជីវកម្មជីកកកាយដីស្រះបុរាណរបស់រដ្ឋនៅខាងក្រោយសាលាក្រុងសិរីសោភ័ណរបស់ក្រុមហ៊ុនលោកមេបញ្ជាការយោធាសឹករងខេត្តបន្ទាយមានជ័យត្រូវគេសង្ស័យថាធ្វើឡើងខុសច្បាប់ហើយអាជីវកម្មនោះត្រូវគេមើលឃើញធ្វើឱ្យប្រជាពលរដ្ឋប្រកបមុខរបរ ធ្វើកសិកម្ម ដែលអាស្រ័យផលលើដីស្រះនោះពួកគាត់កំពុងមានការព្រួយបារម្មប្រឈមនិងបាត់បង់ ដីនៅពេលខាងមុខសម្រាប់ដាំដុះដំណាំកសិកម្មទទួលបានកំរ៉ៃបន្តិសបន្តួចសម្រាប់ផ្គត់ផ្គង់ជីវភាពប្រចាំថ្ងៃ។
ជុំវិញនៃការធ្វើអាជីវកម្មដីស្រះបុរាណនេះដែរ ឯកឧត្តម គោស៊ុំ សារឿត អភិបាលខេត្ត បន្ទាយមានជ័យបានប្រាប់ឱ្យដឹងនៅរសៀលថ្ងៃទី១០ ខែកុម្ភៈ នេះថា៖ ការពិតទៅ ក្រុមហ៊ុន គេបានសុំច្បាប់ធ្វើអាជីវកម្មនៅលើដីស្រះនោះចាប់តាំងពីជំនាន់អតីតអភិបាលខេត្តបន្ទាយ មានជ័យ អ៊ន ស៊ុំ មកម្លេះ ។នៅពេលនេះ លោកក៏បន្តឱ្យធ្វើអាជីវកម្មគ្រាដែលអាង ស្រះបុរាណទឹករាក់ហើយខាងក្រសួងធនធានទឹកគេក៏ចង់ឱ្យមានការស្តារស្រះនោះឡើងវិញសម្រាប់ផ្គត់ផ្គង់ទឹកនោះផងដែរ។
ឯកឧត្តមអភិបាលខេត្តបានបញ្ជាក់ឱ្យដឹងទៀតថា៖ប្រសិនក្រុមហ៊ុនធ្វើអាជីវកម្មដីស្រះ នោះប៉ះពាល់ដីប្រជាពលរដ្ឋដាំដំណាំកសិកម្មដែលអាស្រ័យផលលើដីអាងស្រះនោះ គឺក្រុម ហ៊ុនត្រូវតែធ្វើការដោះស្រាយជូនប្រជាពលរដ្ឋ។
ប្រភពព័ត៌មានពីប្រជាពលរដ្ឋបានប្រាប់ឱ្យដឹងថា៖សកម្មភាពធ្វើអាជីវកម្មជីកកកាយដីស្រះបុរាណរបស់រដ្ឋដែលមានទំហំផ្ទៃដីរាប់សិបហិកតា ត្រូវបានក្រុមហ៊ុនរបស់លោក ភ្លន់ តារា បានដំណើរការជីកកកាយយកអាចដីលក់ ជាង១សប្តាហ៍ទៅហើយ ។សកម្មភាពនោះ ត្រូវ បានអភិបាលក្រុងសិរីសោភ័ណ ដែលជាអាជ្ញាធរដែនដី លោកស្រី ចាន់ថេង អះអាង ប្រាប់ថាគឺលោកស្រីគំពុងតែឱ្យមន្ត្រីស្រាវជ្រាវពីព្រោះមកដល់ពេលនេះលោកស្រីពុំទាន់ ឃើញមានអាជ្ញាប័ណ្ណធ្វើអាជីវកម្ម នៅឡើយនោះទេ។ពាក់ព័ន្ធនិងការប្រើប្រាស់កម្លាំងយោធា ការពារគ្រឿងចក្រនិងការធ្វើអាជីវកម្មដីស្រះបុរាណ អ្នកយកព័ត៌មានយើងបានទំនាក់ទំនង លោក ភ្លន់ តារា តាមទូរស័ព្ទឱ្យជួយឆ្លើយបំភ្លឺជុំវិញករណីនេះ ទូរស័ព្ទររបស់លោក ហៅចូល ប៉ុន្តែគ្មានការឆ្លើយតប។
សូមបញ្ជាក់ថា៖ក្រុមហ៊ុនភ្លន់ ហុង របស់លោកមេបញ្ជាការសឹករងខេត្តបន្ទាយមានជ័យ កន្លងមកធ្លាប់បានធ្វើអាជីវកម្មដីភ្នំក្នុងក្រុងសិរីសោភ័យយ៉ាងរង្គាលបន្ទាប់មកអាជ្ញាប័ណ្ណធ្វើ អាជីវកម្មដីភ្នំត្រូវបានក្រសួងបញ្ចប់អាជ្ញាប័ណ្ណធ្វើអាជីវកម្មកាលពីចុងឆ្នាំ២០១៤ ។ស្រាប់តែ មួយរយៈនេះក្រុមហ៊ុនបានមកធ្វើអាជីវកម្មដីក្នុងស្រះអាងបុរាណនៅខាងក្រោយសាលាក្រុងសិរីសោភ័ណវិញម្តង។
គួរបញ្ជាក់ថា៖ជុំវិញនៃការជីកកកាយដីធ្វើអាជីវកម្មនៅក្នុងក្រុងសិរីសោភ័ណ ខេត្តបន្ទាយមានជ័យ ជាពិសេសដីភ្នំនោះតែម្តង ទោះបីដីភ្នំត្រូវបានក្រសួងរ៉ែនិង ថាមពល បញ្ចប់អាជ្ញាប័ណ្ណធ្វើអាជីវកម្មដយ៉ាងណាក៏ដោយ។ប៉ុន្តែមកដល់ពេលនេះគេមើលឃើញក្រុមហ៊ុនមួយនៅតែបន្តធ្វើសកម្មភាពប្រព្រឹត្តបទល្មើសខុសច្បាប់ជាដដែល។សក្មភាពគេធ្វើនៅចំណុចភ្នំបាក់សង្កាត់ទឹកថ្លាក្រុងសិរីសោភ័ណហើយគេពុំទាន់ដឹងឈ្មោះក្រុមហ៊ុននៅឡើយនោះទេ។ក៏ប៉ុន្តែនៅចំណុចភ្នំបាក់កន្លងមកគឺក្រុមយឿមគង់ដែលជាអ្នកធ្វើអាជីវកម្មជីកកកាយដីភ្នំនោះ។សកម្មភាពរបស់ឈ្មួញនៅតែបន្តធ្វើអាជីវកម្មដីភ្នំប្រឆាំងនិងច្បាប់បែបនេះហើយគេ
មើលឃើញថាអាជ្ញាធរខេត្តក៏ដូចជាក្រសួងរ៉ែនិងថាមពលហាក់បីដូចជាកំពុងតែដេកលង់លក់មិនទាន់មានវិធានការតាមផ្លូវច្បាប់នៅឡើយនោះទេ។ការដេកលង់លក់ស្ងៀមស្ងាត់ដោយគេដាក់សង្ស័យថាក្រែងត្រូវថ្នាំសណ្តំរបស់ឈ្មួញ។គេរង់ចាំមើលថាពេលណាអាជ្ញាធរខេត្តបន្ទាយមានជ័យនិងក្រសួងរ៉ែថាមពលចាប់ផ្តើមមានវិធានការតាមផ្លូវច្បាប់ទៅលើឈ្មួញដែលនៅតែជីកកកាយបំផ្លាញដីភ្នំរបស់រដ្ឋដែលគេចាត់ទុកជាសម្បត្តិធម្មជាតិមានតម្លៃមហាសាលនោះ៕
