សៀមរាបៈ បុរសអភព័ម្នាក់នៅសល់តែ កញ្ចប់ឆ្អឹងប្រពន្ធនិងបុត្រីអាយុ១ថ្ងៃ ស្ពាយយកទៅផ្ទះវិញ បន្ទាប់ពីយក ប្រពន្ធមកឆ្លងទន្លេនៅមន្ទីរពេទ្យបង្អែកខេត្តសៀមរាប ប្រពន្ធបានស្លាប់ ខណៈពេលកូនកើតទើបបានប៉ុន្មាននាទី ក្រុមគ្រូពេទ្យអស់លទ្ធភាពក្នុងការជួយសង្គ្រោះ។
ស្ត្រីរូបនោះបានស្លាប់នៅម៉ោងជាង៨យប់ថ្ងៃទី២១ខែមិនាឆ្នាំ២០១៤។ គាត់មានឈ្មោះនៅ ពិសី មុន ពេលស្លាប់មានអាយុ៣៥ឆ្នាំ ជាកសិករធ្វើចំការនៅស្រុកអន្លង់វែង ខេត្តឧត្តរមានជ័យ។ បុរសជាប្តីឈ្មោះហ៊ាង ហឿម អាយុ៣៩ឆ្នាំ បានរៀបរាប់ថា ពួកគាត់មានស្រុកកំណើតនៅខេត្តព្រៃវែង តែបានមកប្រកបរបរធ្វើចំការ នៅស្រុកអន្លង់វែងខេត្តឧត្តរមានជ័យ។
គាត់មានកូនស្រីពីរនាក់រួចមកហើយ មកសម្រាលកូនលើកនេះជាកូនទីបី។ បុរសជាប្តីបន្តថា ក្នុងពេលប្រពន្ធគ្រប់ខែ ដោយគិតថាអន្លង់វែង គ្រាន់តែ ជាស្រុកមិនហ៊ានបង្កើតនៅទីនោះ រិទ្ធតែមិនហ៊ានឲ្យឆ្មបខ្មែរបង្កើតទៀត ពួកគាត់សម្រេចមកមន្ទីរពេទ្យបង្អែក ខេត្តសៀមរាប។ តែជីវិតប្រពន្ធរបស់គាត់ ត្រូវបញ្ចប់នៅក្នុងមន្ទីរពេទ្យសៀមរាបទៅវិញ ក្នុងរយៈពេលមួយពព្រិច ភ្នែក បន្ទាប់ពីកូនស្រីទីបី បានឃើញពន្លឺថ្ងៃនៅប៉ុន្មាននាទី។
ហ៊ាង ហឿម និយាយទៀតថា ពេលមកដល់មន្ទីរពេទ្យដំបូង ក្រោយបង់សេវាថ្លៃគ្រែ១៤ម៉ឺនរៀលហើយ គ្រូពេទ្យបញ្ជាក់ថា សុខភាពប្រពន្ធរបស់លោកល្អជាធម្មតា លុះពេលសម្រាលកូនបានប៉ុន្មាននាទី គ្រូពេទ្យរុញ ចេញមកក្រៅហើយប្រាប់ថា ត្រៀមខោរអាវផងប្រពន្ធរបស់លោក មិនអាចជួយសង្គ្រោះ បានទេឈាមច្រើន ណាស់។ ឮគ្រូពេទ្យនិយាយបែបនេះ គាត់(ប្តី) គ្មានអ្វីក្រៅពីសួរពេទ្យវិញថា ក្រែងប្រាប់ថាប្រពន្ធខ្ញុំមានសុខភាព ល្អ ចុះហេតុអីនិយាយបែបនេះទៅវិញ។
នៅទីបំផុត គាត់បានដឹកសាកសពប្រពន្ធទៅកាន់ ទីបច្ឆានៅឯវត្ត ដំណាក់ដើម្បីបូជា។ មុនពេលបុរសពោះម៉ាយស្ពាយកញ្ចប់ឆ្អឹងប្រពន្ធ និងបីកូនស្រី ដែលមានអាយុទើប១ថ្ងៃវិលទៅកាន់ខ្ទម ឯចំការ នៅស្រុកអន្លង់វែងវិញ គាត់បានបញ្ជាក់ប្រាប់អ្នកកាសែតថា គាត់អាចនឹងប្តឹង ក្រុមគ្រូពេទ្យបង្អែកខេត្ត សៀមរាប នៅពេលធ្វើបុណ្យប្រពន្ធរួច។ តែថាប្តឹងពីបទអី្វ ទាមទារអ្វីនោះ គឺមិនទាន់បញ្ជាក់បានទេ។
ករណីនេះលោកប៉ែន ផល្គុណ ប្រធានមន្ទីរពេទ្យបង្អែកខេត្តសៀមរាប បានឲ្យដឹងតាមទូរសព្ទ័ថា ស្ត្រីរង គ្រោះដោយសាតែឈាមហូរច្រើនពេក ហើយឈាមនោះជាឈាមអត់កក។
